| Library / Tipiṭaka / तिपिटक • Tipiṭaka / अपदानपाळि • Apadānapāḷi |
४५. विभीतकवग्गो
45. Vibhītakavaggo
१. विभीतकमिञ्जियत्थेरअपदानं
1. Vibhītakamiñjiyattheraapadānaṃ
१.
1.
‘‘ककुसन्धो महावीरो, सब्बधम्मान पारगू।
‘‘Kakusandho mahāvīro, sabbadhammāna pāragū;
गणम्हा वूपकट्ठो सो, अगमासि वनन्तरं॥
Gaṇamhā vūpakaṭṭho so, agamāsi vanantaraṃ.
२.
2.
‘‘बीजमिञ्जं गहेत्वान, लताय आवुणिं अहं।
‘‘Bījamiñjaṃ gahetvāna, latāya āvuṇiṃ ahaṃ;
भगवा तम्हि समये, झायते पब्बतन्तरे॥
Bhagavā tamhi samaye, jhāyate pabbatantare.
३.
3.
‘‘दिस्वानहं देवदेवं, विप्पसन्नेन चेतसा।
‘‘Disvānahaṃ devadevaṃ, vippasannena cetasā;
दक्खिणेय्यस्स वीरस्स, बीजमिञ्जमदासहं॥
Dakkhiṇeyyassa vīrassa, bījamiñjamadāsahaṃ.
४.
4.
दुग्गतिं नाभिजानामि, बीजमिञ्जस्सिदं फलं॥
Duggatiṃ nābhijānāmi, bījamiñjassidaṃ phalaṃ.
५.
5.
‘‘किलेसा झापिता मय्हं, भवा सब्बे समूहता।
‘‘Kilesā jhāpitā mayhaṃ, bhavā sabbe samūhatā;
नागोव बन्धनं छेत्वा, विहरामि अनासवो॥
Nāgova bandhanaṃ chetvā, viharāmi anāsavo.
६.
6.
‘‘स्वागतं वत मे आसि, मम बुद्धस्स सन्तिके।
‘‘Svāgataṃ vata me āsi, mama buddhassa santike;
तिस्सो विज्जा अनुप्पत्ता, कतं बुद्धस्स सासनं॥
Tisso vijjā anuppattā, kataṃ buddhassa sāsanaṃ.
७.
7.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
गाथायो अभासित्थाति।
Gāthāyo abhāsitthāti.
विभीतकमिञ्जियत्थेरस्सापदानं पठमं।
Vibhītakamiñjiyattherassāpadānaṃ paṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १-६०. सकिंसम्मज्जकत्थेरअपदानादिवण्णना • 1-60. Sakiṃsammajjakattheraapadānādivaṇṇanā
