| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. ৰিভত্তিসুত্তং
2. Vibhattisuttaṃ
১৭২. তত্র খো আযস্মা সারিপুত্তো ভিক্খূ আমন্তেসি – ‘‘আৰুসো ভিক্খৰে’’তি। ‘‘আৰুসো’’তি খো তে ভিক্খূ আযস্মতো সারিপুত্তস্স পচ্চস্সোসুং। আযস্মা সারিপুত্তো এতদৰোচ –
172. Tatra kho āyasmā sāriputto bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘অদ্ধমাসূপসম্পন্নেন মে, আৰুসো, অত্থপটিসম্ভিদা সচ্ছিকতা ওধিসো ব্যঞ্জনসো। তমহং অনেকপরিযাযেন আচিক্খামি দেসেমি পঞ্ঞাপেমি পট্ঠপেমি ৰিৰরামি ৰিভজামি উত্তানীকরোমি। যস্স খো পনস্স কঙ্খা ৰা ৰিমতি ৰা, সো মং পঞ্হেন। অহং ৰেয্যাকরণেন সম্মুখীভূতো নো সত্থা যো নো ধম্মানং সুকুসলো।
‘‘Addhamāsūpasampannena me, āvuso, atthapaṭisambhidā sacchikatā odhiso byañjanaso. Tamahaṃ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi. Yassa kho panassa kaṅkhā vā vimati vā, so maṃ pañhena. Ahaṃ veyyākaraṇena sammukhībhūto no satthā yo no dhammānaṃ sukusalo.
‘‘অদ্ধমাসূপসম্পন্নেন মে, আৰুসো, ধম্মপটিসম্ভিদা সচ্ছিকতা ওধিসো ব্যঞ্জনসো। তমহং অনেকপরিযাযেন আচিক্খামি দেসেমি পঞ্ঞাপেমি পট্ঠপেমি ৰিৰরামি ৰিভজামি উত্তানীকরোমি। যস্স খো পনস্স কঙ্খা ৰা ৰিমতি ৰা, সো মং পঞ্হেন। অহং ৰেয্যাকরণেন সম্মুখীভূতো নো সত্থা যো নো ধম্মানং সুকুসলো।
‘‘Addhamāsūpasampannena me, āvuso, dhammapaṭisambhidā sacchikatā odhiso byañjanaso. Tamahaṃ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi. Yassa kho panassa kaṅkhā vā vimati vā, so maṃ pañhena. Ahaṃ veyyākaraṇena sammukhībhūto no satthā yo no dhammānaṃ sukusalo.
‘‘অদ্ধমাসূপসম্পন্নেন মে, আৰুসো, নিরুত্তিপটিসম্ভিদা সচ্ছিকতা ওধিসো ব্যঞ্জনসো। তমহং অনেকপরিযাযেন আচিক্খামি দেসেমি পঞ্ঞাপেমি পট্ঠপেমি ৰিৰরামি ৰিভজামি উত্তানীকরোমি। যস্স খো পনস্স কঙ্খা ৰা ৰিমতি ৰা, সো মং পঞ্হেন। অহং ৰেয্যাকরণেন সম্মুখীভূতো নো সত্থা যো নো ধম্মানং সুকুসলো।
‘‘Addhamāsūpasampannena me, āvuso, niruttipaṭisambhidā sacchikatā odhiso byañjanaso. Tamahaṃ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi. Yassa kho panassa kaṅkhā vā vimati vā, so maṃ pañhena. Ahaṃ veyyākaraṇena sammukhībhūto no satthā yo no dhammānaṃ sukusalo.
‘‘অদ্ধমাসূপসম্পন্নেন মে, আৰুসো, পটিভানপটিসম্ভিদা সচ্ছিকতা ওধিসো ব্যঞ্জনসো। তমহং অনেকপরিযাযেন আচিক্খামি দেসেমি পঞ্ঞাপেমি পট্ঠপেমি ৰিৰরামি ৰিভজামি উত্তানীকরোমি। যস্স খো পনস্স কঙ্খা ৰা ৰিমতি ৰা, সো মং পঞ্হেন। অহং ৰেয্যাকরণেন সম্মুখীভূতো নো সত্থা যো নো ধম্মানং সুকুসলো’’তি। দুতিযং।
‘‘Addhamāsūpasampannena me, āvuso, paṭibhānapaṭisambhidā sacchikatā odhiso byañjanaso. Tamahaṃ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi. Yassa kho panassa kaṅkhā vā vimati vā, so maṃ pañhena. Ahaṃ veyyākaraṇena sammukhībhūto no satthā yo no dhammānaṃ sukusalo’’ti. Dutiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. ৰিভত্তিসুত্তৰণ্ণনা • 2. Vibhattisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২. ৰিভত্তিসুত্তৰণ্ণনা • 2. Vibhattisuttavaṇṇanā
