| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༢. ཝེརཉྫཀསུཏྟཝཎྞནཱ
2. Verañjakasuttavaṇṇanā
༤༤༤. ཝེརཉྫཝཱསིནོཏི ཝེརཉྫགཱམཝཱསིནོ། ཀེཙི པན ‘‘ཝིཝིདྷརཊྛཝཱསིནོ ཝེརཉྫཀཱ’’ཏི ཨེཏམཏྠཾ ཝདནྟི, ཏེསཾ མཏེན ‘‘ཝེརཛྫཀཱ’’ཏི པཱལི༹ཡཱ བྷཝིཏབྦནྟི། ཨནིཡམིཏཀིཙྩེནཱཏི ‘‘ཨིམིནཱ ནཱམཱ’’ཏི ཨེཝཾ ན ནིཡམིཏེན ཀིཙྩེན། ཨཡཾ ཝིསེསོཏི ཨཡཾ པུགྒལཱདྷིཊྛཱནདྷམྨཱདྷིཊྛཱནཀཏོ ཨིམེསུ དྭཱིསུ སུཏྟེསུ དེསནཱཡ ཝིསེསོ, ཨཏྠོ པན དེསནཱནཡོ ཙ མཛ྄ཛྷེ བྷིནྣསུཝཎྞཾ ཝིཡ ཨཝིསིཊྛོཏི དསྶེཏི། ཀསྨཱ པན བྷགཝཱ ཀཏྠཙི པུགྒལཱདྷིཊྛཱནདེསནཾ དེསེཏི, ཀཏྠཙི དྷམྨཱདྷིཊྛཱནནྟི? དེསནཱཝིལཱསཏོ ཝེནེཡྻཛ྄ཛྷཱསཡཏོ ཙ། དེསནཱཝིལཱསཔྤཏྟཱ ཧི བུདྡྷཱ བྷགཝནྟོ, ཏེ ཡཐཱརུཙི ཀཏྠཙི པུགྒལཱདྷིཊྛཱནཾ ཀཏྭཱ, ཀཏྠཙི དྷམྨཱདྷིཊྛཱནཾ ཀཏྭཱ དྷམྨཾ དེསེནྟི། ཡེ པན ཝེནེཡྻཱ སཱསནཀྐམཾ ཨནོཏིཎྞཱ, ཏེསཾ པུགྒལཱདྷིཊྛཱནདེསནཾ དེསེནྟི། ཡེ ཨོཏིཎྞཱ, ཏེསཾ དྷམྨཱདྷིཊྛཱནཾ། སམྨུཏིསཙྩཝིསཡཱ པུགྒལཱདྷིཊྛཱནཱ, ཨིཏརཱ པརམཏྠསཙྩཝིསཡཱ། པུརིམཱ ཀརུཎཱནུཀཱུལཱ, ཨིཏརཱ པཉྙཱནུཀཱུལཱ། སདྡྷཱནུསཱརིགོཏྟཱནཾ ཝཱ པུརིམཱ། ཏེ ཧི པུགྒལཔྤམཱཎཱ, པཙྪིམཱ དྷམྨཱནུསཱརཱིནཾ། སདྡྷཱཙརིཏཏཱཡ ཝཱ ལོཀཱདྷིཔཏཱིནཾ ཝསེན པུགྒལཱདྷིཊྛཱནཱ, པཉྙཱཙརིཏཏཱཡ དྷམྨཱདྷིཔཏཱིནཾ ཝསེན དྷམྨཱདྷིཊྛཱནཱ། པུརིམཱ ཙ ནེཡྻཏྠཱ, པཙྪིམཱ ནཱིཏཏྠཱ། ཨིཏི བྷགཝཱ ཏཾ ཏཾ ཝིསེསཾ ཨཝེཀྑིཏྭཱ ཏཏྠ ཏཏྠ དུཝིདྷཾ དེསནཾ དེསེཏཱིཏི ཝེདིཏབྦཾ།
444.Verañjavāsinoti verañjagāmavāsino. Keci pana ‘‘vividharaṭṭhavāsino verañjakā’’ti etamatthaṃ vadanti, tesaṃ matena ‘‘verajjakā’’ti pāḷiyā bhavitabbanti. Aniyamitakiccenāti ‘‘iminā nāmā’’ti evaṃ na niyamitena kiccena. Ayaṃ visesoti ayaṃ puggalādhiṭṭhānadhammādhiṭṭhānakato imesu dvīsu suttesu desanāya viseso, attho pana desanānayo ca majjhe bhinnasuvaṇṇaṃ viya avisiṭṭhoti dasseti. Kasmā pana bhagavā katthaci puggalādhiṭṭhānadesanaṃ deseti, katthaci dhammādhiṭṭhānanti? Desanāvilāsato veneyyajjhāsayato ca. Desanāvilāsappattā hi buddhā bhagavanto, te yathāruci katthaci puggalādhiṭṭhānaṃ katvā, katthaci dhammādhiṭṭhānaṃ katvā dhammaṃ desenti. Ye pana veneyyā sāsanakkamaṃ anotiṇṇā, tesaṃ puggalādhiṭṭhānadesanaṃ desenti. Ye otiṇṇā, tesaṃ dhammādhiṭṭhānaṃ. Sammutisaccavisayā puggalādhiṭṭhānā, itarā paramatthasaccavisayā. Purimā karuṇānukūlā, itarā paññānukūlā. Saddhānusārigottānaṃ vā purimā. Te hi puggalappamāṇā, pacchimā dhammānusārīnaṃ. Saddhācaritatāya vā lokādhipatīnaṃ vasena puggalādhiṭṭhānā, paññācaritatāya dhammādhipatīnaṃ vasena dhammādhiṭṭhānā. Purimā ca neyyatthā, pacchimā nītatthā. Iti bhagavā taṃ taṃ visesaṃ avekkhitvā tattha tattha duvidhaṃ desanaṃ desetīti veditabbaṃ.
ཝེརཉྫཀསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Verañjakasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༢. ཝེརཉྫཀསུཏྟཾ • 2. Verañjakasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༢. ཝེརཉྫཀསུཏྟཝཎྞནཱ • 2. Verañjakasuttavaṇṇanā
