| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
2. வேத³னாத்திகவண்ணனா
2. Vedanāttikavaṇṇanā
1. வேத³னாத்திகே திஸ்ஸோ வேத³னா ரூபங் நிப்³பா³னந்தி இமே த⁴ம்மா ந லப்³ப⁴ந்தி, தஸ்மா ஏகங் க²ந்த⁴ங் படிச்ச த்³வே க²ந்தா⁴திஆதி³ வுத்தங். படிஸந்தி⁴க்க²ணே ஸுகா²ய வேத³னாயாதி ஸஹேதுகபடிஸந்தி⁴வஸேன வுத்தங். து³க்க²வேத³னா படிஸந்தி⁴யங் ந லப்³ப⁴தீதி து³தியவாரே படிஸந்தி⁴க்³க³ஹணங் ந கதங். ததியவாரே படிஸந்தி⁴க்க²ணேதி ஸஹேதுகபடிஸந்தி⁴வஸேன வுத்தங். ஸேஸமெத்த² இதோ பரேஸு ச பச்சயேஸு யதா²பாளிமேவ நிய்யாதி. ஸப்³ப³த்த² தயோ தயோ வாரா வுத்தா. தேன வுத்தங் ஹேதுயா தீணி…பே॰… அவிக³தே தீணீதி.
1. Vedanāttike tisso vedanā rūpaṃ nibbānanti ime dhammā na labbhanti, tasmā ekaṃ khandhaṃ paṭicca dve khandhātiādi vuttaṃ. Paṭisandhikkhaṇe sukhāya vedanāyāti sahetukapaṭisandhivasena vuttaṃ. Dukkhavedanā paṭisandhiyaṃ na labbhatīti dutiyavāre paṭisandhiggahaṇaṃ na kataṃ. Tatiyavāre paṭisandhikkhaṇeti sahetukapaṭisandhivasena vuttaṃ. Sesamettha ito paresu ca paccayesu yathāpāḷimeva niyyāti. Sabbattha tayo tayo vārā vuttā. Tena vuttaṃ hetuyā tīṇi…pe… avigate tīṇīti.
6. பச்சயஸங்ஸந்த³னே பன ஸஹேதுகாய விபாகது³க்க²வேத³னாய அபா⁴வதோ ஹேதுமூலகனயே விபாகே த்³வேதி வுத்தங். அதி⁴பதிஆதீ³ஹி ஸத்³தி⁴ங் ஸங்ஸந்த³னேஸுபி விபாகே த்³வேயேவ. கஸ்மா? விபாகே து³க்க²வேத³னாய அதி⁴பதிஜா²னமக்³கா³னங் அபா⁴வதோ. யேஹி ச ஸத்³தி⁴ங் ஸங்ஸந்த³னே விபாகே த்³வே வாரா லப்³ப⁴ந்தி, விபாகேன ஸத்³தி⁴ங் ஸங்ஸந்த³னே தேஸுபி த்³வேயேவ.
6. Paccayasaṃsandane pana sahetukāya vipākadukkhavedanāya abhāvato hetumūlakanaye vipāke dveti vuttaṃ. Adhipatiādīhi saddhiṃ saṃsandanesupi vipāke dveyeva. Kasmā? Vipāke dukkhavedanāya adhipatijhānamaggānaṃ abhāvato. Yehi ca saddhiṃ saṃsandane vipāke dve vārā labbhanti, vipākena saddhiṃ saṃsandane tesupi dveyeva.
10. பச்சனீயே நபுரேஜாதே ஆருப்பே ச படிஸந்தி⁴யஞ்ச து³க்க²வேத³னாய அபா⁴வதோ த்³வே வாரா ஆக³தா. நவிப்பயுத்தேபி ஆருப்பே து³க்கா²பா⁴வதோ த்³வேயேவ. ஸப்³ப³அரூபத⁴ம்மபரிக்³கா³ஹகா பன ஸஹஜாதாத³யோ பச்சயா இமஸ்மிங் பச்சனீயவாரே பரிஹாயந்தி. கஸ்மா? வேத³னாஸம்பயுத்தஸ்ஸ த⁴ம்மஸ்ஸ வேத³னாஸம்பயுத்தங் படிச்ச ஸஹஜாதாதீ³ஹி வினா அனுப்பத்திதோ பச்சா²ஜாதபச்சயஞ்ச வினாவ உப்பத்திதோ.
10. Paccanīye napurejāte āruppe ca paṭisandhiyañca dukkhavedanāya abhāvato dve vārā āgatā. Navippayuttepi āruppe dukkhābhāvato dveyeva. Sabbaarūpadhammapariggāhakā pana sahajātādayo paccayā imasmiṃ paccanīyavāre parihāyanti. Kasmā? Vedanāsampayuttassa dhammassa vedanāsampayuttaṃ paṭicca sahajātādīhi vinā anuppattito pacchājātapaccayañca vināva uppattito.
17. பச்சயஸங்ஸந்த³னே பன நபுரேஜாதே ஏகந்தி ஆருப்பே படிஸந்தி⁴யஞ்ச அஹேதுகாது³க்க²மஸுக²வேத³னாஸம்பயுத்தங் ஸந்தா⁴ய வுத்தங். நகம்மே த்³வேதி அஹேதுககிரியஸம்பயுத்தசேதனாவஸேன வுத்தங். ஸுகா²ய ஹி அது³க்க²மஸுகா²ய ச வேத³னாய ஸம்பயுத்தே த⁴ம்மே படிச்ச தாஹி வேத³னாஹி ஸம்பயுத்தா அஹேதுககிரியசேதனா உப்பஜ்ஜந்தி. நஹேதுபச்சயா நவிபாகேபி ஏஸேவ நயோ. நவிப்பயுத்தே ஏகந்தி ஆருப்பே ஆவஜ்ஜனவஸேன வுத்தங். இமினா உபாயேன ஸப்³ப³ஸங்ஸந்த³னேஸு க³ணனா வேதி³தப்³பா³.
17. Paccayasaṃsandane pana napurejāte ekanti āruppe paṭisandhiyañca ahetukādukkhamasukhavedanāsampayuttaṃ sandhāya vuttaṃ. Nakamme dveti ahetukakiriyasampayuttacetanāvasena vuttaṃ. Sukhāya hi adukkhamasukhāya ca vedanāya sampayutte dhamme paṭicca tāhi vedanāhi sampayuttā ahetukakiriyacetanā uppajjanti. Nahetupaccayā navipākepi eseva nayo. Navippayutte ekanti āruppe āvajjanavasena vuttaṃ. Iminā upāyena sabbasaṃsandanesu gaṇanā veditabbā.
25-37. அனுலோமபச்சனீயே பச்சனீயே லத்³த⁴பச்சயா ஏவ பச்சனீயதோ திட்ட²ந்தி. பச்சனீயானுலோமே ஸப்³பா³ ரூபத⁴ம்மபரிக்³கா³ஹகா ஸஹஜாதாத³யோ அனுலோமதோவ திட்ட²ந்தி, ந பச்சனீயதோ. அஹேதுகஸ்ஸ பன சித்துப்பாத³ஸ்ஸ அதி⁴பதி நத்தீ²தி அதி⁴பதிபச்சயோ அனுலோமதோ ந திட்ட²தி. படிச்சவாராதீ³ஸு பன பச்சா²ஜாதோ அனுலோமதோ ந லப்³ப⁴தியேவாதி பரிஹீனோ. யே செத்த² அனுலோமதோ லப்³ப⁴ந்தி, தே பச்சனீயதோ லப்³ப⁴மானேஹி ஸத்³தி⁴ங் பரிவத்தெத்வாபி யோஜிதாயேவ. தேஸு தீணி த்³வே ஏகந்தி தயோவ வாரபரிச்சே²தா³, தே ஸப்³ப³த்த² யதா²னுரூபங் ஸல்லக்கே²தப்³பா³. யோ சாயங் படிச்சவாரே வுத்தோ, ஸஹஜாதவாராதீ³ஸுபி அயமேவ வண்ணனானயோ.
25-37. Anulomapaccanīye paccanīye laddhapaccayā eva paccanīyato tiṭṭhanti. Paccanīyānulome sabbā rūpadhammapariggāhakā sahajātādayo anulomatova tiṭṭhanti, na paccanīyato. Ahetukassa pana cittuppādassa adhipati natthīti adhipatipaccayo anulomato na tiṭṭhati. Paṭiccavārādīsu pana pacchājāto anulomato na labbhatiyevāti parihīno. Ye cettha anulomato labbhanti, te paccanīyato labbhamānehi saddhiṃ parivattetvāpi yojitāyeva. Tesu tīṇi dve ekanti tayova vāraparicchedā, te sabbattha yathānurūpaṃ sallakkhetabbā. Yo cāyaṃ paṭiccavāre vutto, sahajātavārādīsupi ayameva vaṇṇanānayo.
38. பஞ்ஹாவாரே பன ஸம்பயுத்தகானங் க²ந்தா⁴னந்தி தேன ஸத்³தி⁴ங் ஸம்பயுத்தகானங் க²ந்தா⁴னங் தேஹியேவ வா ஹேதூஹி ஸுக²வேத³னாதீ³ஹி வா.
38. Pañhāvāre pana sampayuttakānaṃ khandhānanti tena saddhiṃ sampayuttakānaṃ khandhānaṃ tehiyeva vā hetūhi sukhavedanādīhi vā.
39. விப்படிஸாரிஸ்ஸாதி தா³னாதீ³ஸு தாவ ‘‘கஸ்மா மயா இத³ங் கதங், து³ட்டு² மே கதங், அகதங் ஸெய்யோ ஸியா’’தி ஏவங் விப்படிஸாரிஸ்ஸ. ஜா²னபரிஹானியங் பன ‘‘பரிஹீனங் மே ஜா²னங், மஹாஜானியோ வதம்ஹீ’’தி ஏவங் விப்படிஸாரிஸ்ஸ. மோஹோ உப்பஜ்ஜதீதி தோ³ஸஸம்பயுத்தமோஹோ. ததா² மோஹங் அரப்³பா⁴தி தோ³ஸஸம்பயுத்தமோஹமேவ.
39. Vippaṭisārissāti dānādīsu tāva ‘‘kasmā mayā idaṃ kataṃ, duṭṭhu me kataṃ, akataṃ seyyo siyā’’ti evaṃ vippaṭisārissa. Jhānaparihāniyaṃ pana ‘‘parihīnaṃ me jhānaṃ, mahājāniyo vatamhī’’ti evaṃ vippaṭisārissa. Moho uppajjatīti dosasampayuttamoho. Tathā mohaṃ arabbhāti dosasampayuttamohameva.
45. ஸுகா²ய வேத³னாய ஸம்பயுத்தங் ப⁴வங்க³ங் அது³க்க²மஸுகா²ய வேத³னாய ஸம்பயுத்தஸ்ஸ ப⁴வங்க³ஸ்ஸாதி ததா³ரம்மணஸங்கா²தங் பிட்டி²ப⁴வங்க³ங் மூலப⁴வங்க³ஸ்ஸ. வுட்டா²னஸ்ஸாதி ததா³ரம்மணஸ்ஸ ப⁴வங்க³ஸ்ஸ வா. உப⁴யம்பி ஹேதங் குஸலாகுஸலஜவனதோ வுட்டி²தத்தா வுட்டா²னந்தி வுச்சதி. கிரியங் வுட்டா²னஸ்ஸாதி எத்தா²பி ஏஸேவ நயோ. ப²லங் வுட்டா²னஸ்ஸாதி ப²லசித்தங் ப⁴வங்க³ஸ்ஸ. ப⁴வங்கே³ன ஹி ப²லதோ வுட்டி²தோ நாம ஹோதி. பரதோ ‘‘வுட்டா²ன’’ந்தி ஆக³தட்டா²னேஸுபி ஏஸேவ நயோ.
45. Sukhāya vedanāya sampayuttaṃ bhavaṅgaṃ adukkhamasukhāya vedanāya sampayuttassa bhavaṅgassāti tadārammaṇasaṅkhātaṃ piṭṭhibhavaṅgaṃ mūlabhavaṅgassa. Vuṭṭhānassāti tadārammaṇassa bhavaṅgassa vā. Ubhayampi hetaṃ kusalākusalajavanato vuṭṭhitattā vuṭṭhānanti vuccati. Kiriyaṃ vuṭṭhānassāti etthāpi eseva nayo. Phalaṃ vuṭṭhānassāti phalacittaṃ bhavaṅgassa. Bhavaṅgena hi phalato vuṭṭhito nāma hoti. Parato ‘‘vuṭṭhāna’’nti āgataṭṭhānesupi eseva nayo.
46. து³க்கா²ய வேத³னாய ஸம்பயுத்தா க²ந்தா⁴தி தோ³மனஸ்ஸஸம்பயுத்தா அகுஸலா க²ந்தா⁴. அது³க்க²மஸுகா²ய வேத³னாய ஸம்பயுத்தஸ்ஸ வுட்டா²னஸ்ஸாதி ததா³ரம்மணஸங்கா²தஸ்ஸ ஆக³ந்துகப⁴வங்க³ஸ்ஸ வா உபெக்கா²ஸம்பயுத்தமூலப⁴வங்க³ஸ்ஸ வா. ஸசே பன ஸோமனஸ்ஸஸஹக³தங் மூலப⁴வங்க³ங் ஹோதி, ததா³ரம்மணஸ்ஸ ச உப்பத்திகாரணங் ந ஹோதி, ஜவனஸ்ஸ ஆரம்மணதோ அஞ்ஞஸ்மிம்பி ஆரம்மணே அது³க்க²மஸுக²வேத³னங் அகுஸலவிபாகங் உப்பஜ்ஜதேவ. தம்பி ஹி ஜவனதோ வுட்டி²தத்தா வுட்டா²னந்தி வுச்சதி. ஸஹஜாதபச்சயாதி³னித்³தே³ஸா உத்தானத்தா²யேவ. நஹெத்த² கிஞ்சி அத்தி², யங் ந ஸக்கா ஸியா ஹெட்டா² வுத்தனயேன வேதே³துங், தஸ்மா ஸாது⁴கங் உபலக்கே²தப்³ப³ங்.
46. Dukkhāya vedanāya sampayuttā khandhāti domanassasampayuttā akusalā khandhā. Adukkhamasukhāya vedanāya sampayuttassa vuṭṭhānassāti tadārammaṇasaṅkhātassa āgantukabhavaṅgassa vā upekkhāsampayuttamūlabhavaṅgassa vā. Sace pana somanassasahagataṃ mūlabhavaṅgaṃ hoti, tadārammaṇassa ca uppattikāraṇaṃ na hoti, javanassa ārammaṇato aññasmimpi ārammaṇe adukkhamasukhavedanaṃ akusalavipākaṃ uppajjateva. Tampi hi javanato vuṭṭhitattā vuṭṭhānanti vuccati. Sahajātapaccayādiniddesā uttānatthāyeva. Nahettha kiñci atthi, yaṃ na sakkā siyā heṭṭhā vuttanayena vedetuṃ, tasmā sādhukaṃ upalakkhetabbaṃ.
62. இதா³னி யஸ்மிங் யஸ்மிங் பச்சயே யே யே வாரா லத்³தா⁴, ஸப்³பே³ தே ஸங்கி²பித்வா க³ணனாய த³ஸ்ஸேதுங் ஹேதுயா தீணீதிஆதி³ வுத்தங். தத்த² ஸப்³பா³னி தீணி ஸுத்³தா⁴னங் திண்ணங் பதா³னங் வஸேன வேதி³தப்³பா³னி. ஆரம்மணே நவ ஏகமூலகேகாவஸானானி. அதி⁴பதியா பஞ்ச ஸஹஜாதாதி⁴பதிவஸேன அமிஸ்ஸானி தீணி, ஆரம்மணாதி⁴பதிவஸேன ச ‘‘ஸுகா²ய ஸம்பயுத்தோ ஸுகா²ய ஸம்பயுத்தஸ்ஸ, அது³க்க²மஸுகா²ய ஸம்பயுத்தோ அது³க்க²மஸுகா²ய ஸம்பயுத்தஸ்ஸா’’தி த்³வே, தானி ந க³ணேதப்³பா³னி. ஸுகா²ய பன ஸம்பயுத்தோ அது³க்க²மஸுகா²ய, அது³க்க²மஸுகா²ய ஸம்பயுத்தோ ஸுகா²யாதி இமானி த்³வே க³ணேதப்³பா³னீதி ஏவங் பஞ்ச. அனந்தரஸமனந்தரேஸு ஸத்தாதி ஸுகா² த்³வின்னங், ததா² து³க்கா², அது³க்க²மஸுகா² திண்ணம்பீதி ஏவங் ஸத்த. உபனிஸ்ஸயே நவாதி ஸுக²ஸம்பயுத்தோ ஸுக²ஸம்பயுத்தஸ்ஸ தீஹிபி உபனிஸ்ஸயேஹி, து³க்க²ஸம்பயுத்தஸ்ஸ பகதூபனிஸ்ஸயேனேவ, உபெக்கா²ஸம்பயுத்தஸ்ஸ தீஹிபி, து³க்க²ஸம்பயுத்தோ து³க்க²ஸம்பயுத்தஸ்ஸ அனந்தரபகதூபனிஸ்ஸயேஹி, ஸுக²ஸம்பயுத்தஸ்ஸ பகதூபனிஸ்ஸயேன, அது³க்க²மஸுக²ஸம்பயுத்தஸ்ஸ த்³விதா⁴, அது³க்க²மஸுக²ஸம்பயுத்தோ அது³க்க²மஸுக²ஸம்பயுத்தஸ்ஸ திதா⁴பி, ததா² ஸுக²ஸம்பயுத்தஸ்ஸ, து³க்க²ஸம்பயுத்தஸ்ஸ அனந்தரபகதூபனிஸ்ஸயேஹீதி ஏவங் நவ. பச்சயபே⁴த³தோ பனெத்த² பகதூபனிஸ்ஸயா நவ, அனந்தரூபனிஸ்ஸயா ஸத்த, ஆரம்மணூபனிஸ்ஸயா சத்தாரோதி வீஸதி உபனிஸ்ஸயா. புரேஜாதபச்சா²ஜாதா பனெத்த² சி²ஜ்ஜந்தி. ந ஹி புரேஜாதா பச்சா²ஜாதா வா அரூபத⁴ம்மா அரூபத⁴ம்மானங் பச்சயா ஹொந்தி.
62. Idāni yasmiṃ yasmiṃ paccaye ye ye vārā laddhā, sabbe te saṅkhipitvā gaṇanāya dassetuṃ hetuyā tīṇītiādi vuttaṃ. Tattha sabbāni tīṇi suddhānaṃ tiṇṇaṃ padānaṃ vasena veditabbāni. Ārammaṇe nava ekamūlakekāvasānāni. Adhipatiyā pañca sahajātādhipativasena amissāni tīṇi, ārammaṇādhipativasena ca ‘‘sukhāya sampayutto sukhāya sampayuttassa, adukkhamasukhāya sampayutto adukkhamasukhāya sampayuttassā’’ti dve, tāni na gaṇetabbāni. Sukhāya pana sampayutto adukkhamasukhāya, adukkhamasukhāya sampayutto sukhāyāti imāni dve gaṇetabbānīti evaṃ pañca. Anantarasamanantaresu sattāti sukhā dvinnaṃ, tathā dukkhā, adukkhamasukhā tiṇṇampīti evaṃ satta. Upanissaye navāti sukhasampayutto sukhasampayuttassa tīhipi upanissayehi, dukkhasampayuttassa pakatūpanissayeneva, upekkhāsampayuttassa tīhipi, dukkhasampayutto dukkhasampayuttassa anantarapakatūpanissayehi, sukhasampayuttassa pakatūpanissayena, adukkhamasukhasampayuttassa dvidhā, adukkhamasukhasampayutto adukkhamasukhasampayuttassa tidhāpi, tathā sukhasampayuttassa, dukkhasampayuttassa anantarapakatūpanissayehīti evaṃ nava. Paccayabhedato panettha pakatūpanissayā nava, anantarūpanissayā satta, ārammaṇūpanissayā cattāroti vīsati upanissayā. Purejātapacchājātā panettha chijjanti. Na hi purejātā pacchājātā vā arūpadhammā arūpadhammānaṃ paccayā honti.
கம்மே அட்டா²தி ஸுக²ஸம்பயுத்தோ ஸுக²ஸம்பயுத்தஸ்ஸ த்³விதா⁴பி, து³க்க²ஸம்பயுத்தஸ்ஸ நானாக்க²ணிகதோவ ததா² இதரஸ்ஸ. து³க்க²ஸம்பயுத்தோ து³க்க²ஸம்பயுத்தஸ்ஸ த்³விதா⁴பி, ஸுக²ஸம்பயுத்தஸ்ஸ நத்தி², இதரஸ்ஸ நானாக்க²ணிகதோவ அது³க்க²மஸுக²ஸம்பயுத்தோ அது³க்க²மஸுக²ஸம்பயுத்தஸ்ஸ த்³விதா⁴பி, இதரேஸங் நானாக்க²ணிகதோதி ஏவங் அட்ட². பச்சயபே⁴த³தோ பனெத்த² நானாக்க²ணிகா அட்ட², ஸஹஜாதா தீணீதி ஏகாத³ஸ கம்மபச்சயா. யதா² ச புரேஜாதபச்சா²ஜாதா, ஏவங் விப்பயுத்தபச்சயோபெத்த² சி²ஜ்ஜதி. அரூபத⁴ம்மா ஹி அரூபத⁴ம்மானங் விப்பயுத்தபச்சயோ ந ஹொந்தி. நத்தி²விக³தேஸு ஸத்த அனந்தரஸதி³ஸாவ. ஏவமெத்த² தீணி பஞ்ச ஸத்த அட்ட² நவாதி பஞ்ச க³ணனபரிச்சே²தா³. தேஸங் வஸேன பச்சயஸங்ஸந்த³னே ஊனதரக³ணனேன ஸத்³தி⁴ங் ஸங்ஸந்த³னேஸு அதிரேகஞ்ச அலப்³ப⁴மானஞ்ச அபனெத்வா க³ணனா வேதி³தப்³பா³.
Kammeaṭṭhāti sukhasampayutto sukhasampayuttassa dvidhāpi, dukkhasampayuttassa nānākkhaṇikatova tathā itarassa. Dukkhasampayutto dukkhasampayuttassa dvidhāpi, sukhasampayuttassa natthi, itarassa nānākkhaṇikatova adukkhamasukhasampayutto adukkhamasukhasampayuttassa dvidhāpi, itaresaṃ nānākkhaṇikatoti evaṃ aṭṭha. Paccayabhedato panettha nānākkhaṇikā aṭṭha, sahajātā tīṇīti ekādasa kammapaccayā. Yathā ca purejātapacchājātā, evaṃ vippayuttapaccayopettha chijjati. Arūpadhammā hi arūpadhammānaṃ vippayuttapaccayo na honti. Natthivigatesu satta anantarasadisāva. Evamettha tīṇi pañca satta aṭṭha navāti pañca gaṇanaparicchedā. Tesaṃ vasena paccayasaṃsandane ūnataragaṇanena saddhiṃ saṃsandanesu atirekañca alabbhamānañca apanetvā gaṇanā veditabbā.
63-64. ஹேதுயா ஸத்³தி⁴ங் ஆரம்மணங் ந லப்³ப⁴தி, ததா² அனந்தராத³யோ. அதி⁴பதியா த்³வேதி து³க்க²பத³ங் ட²பெத்வா ஸேஸானி த்³வே. து³க்க²ஸம்பயுத்தோ ஹி ஹேது அதி⁴பதி நாம நத்தி², தஸ்மா ஸோ ந லப்³ப⁴தீதி அபனீதோ. ஸேஸத்³வயேஸுபி ஏஸேவ நயோ. இதி ஹேதுமூலகே த்³வேயேவ க³ணனபரிச்சே²தா³, தேஸங் வஸேன ச² க⁴டனானி வுத்தானி. தேஸு பட²மங் அவிபாகபூ⁴தானங் ஞாணவிப்பயுத்தனிராதி⁴பதித⁴ம்மானங் வஸேன வுத்தங், து³தியங் தேஸஞ்ஞேவ விபாகபூ⁴தானங், ததியசதுத்தா²னி தேஸஞ்ஞேவ ஞாணஸம்பயுத்தானங், பஞ்சமங் அவிபாகபூ⁴தஸாதி⁴பதிஅமோஹவஸேன, ச²ட்ட²ங் விபாகபூ⁴தஸாதி⁴பதிஅமோஹவஸேன. பட²மங் வா ஸப்³ப³ஹேதுவஸேன, து³தியங் ஸப்³ப³விபாகஹேதுவஸேன, ததியங் ஸப்³பா³மோஹஹேதுவஸேன, சதுத்த²ங் ஸப்³ப³விபாகாமோஹஹேதுவஸேன. பஞ்சமங் ஸப்³ப³ஸாதி⁴பதிஅமோஹவஸேன, ச²ட்ட²ங் ஸப்³ப³ஸாதி⁴பதிவிபாகாமோஹவஸேன.
63-64. Hetuyā saddhiṃ ārammaṇaṃ na labbhati, tathā anantarādayo. Adhipatiyā dveti dukkhapadaṃ ṭhapetvā sesāni dve. Dukkhasampayutto hi hetu adhipati nāma natthi, tasmā so na labbhatīti apanīto. Sesadvayesupi eseva nayo. Iti hetumūlake dveyeva gaṇanaparicchedā, tesaṃ vasena cha ghaṭanāni vuttāni. Tesu paṭhamaṃ avipākabhūtānaṃ ñāṇavippayuttanirādhipatidhammānaṃ vasena vuttaṃ, dutiyaṃ tesaññeva vipākabhūtānaṃ, tatiyacatutthāni tesaññeva ñāṇasampayuttānaṃ, pañcamaṃ avipākabhūtasādhipatiamohavasena, chaṭṭhaṃ vipākabhūtasādhipatiamohavasena. Paṭhamaṃ vā sabbahetuvasena, dutiyaṃ sabbavipākahetuvasena, tatiyaṃ sabbāmohahetuvasena, catutthaṃ sabbavipākāmohahetuvasena. Pañcamaṃ sabbasādhipatiamohavasena, chaṭṭhaṃ sabbasādhipativipākāmohavasena.
66. ஆரம்மணமூலகே அதி⁴பதியா சத்தாரீதி ஆரம்மணாதி⁴பதிவஸேன ஸுக²ங் ஸுக²ஸ்ஸ, அது³க்க²மஸுக²ஸ்ஸ, அது³க்க²மஸுக²ங் அது³க்க²மஸுக²ஸ்ஸ, ஸுக²ஸ்ஸாதி ஏவங் சத்தாரி. உபனிஸ்ஸயேபி ஆரம்மணூபனிஸ்ஸயவஸேன சத்தாரோ வுத்தா. க⁴டனானி பனெத்த² ஏகமேவ. அதி⁴பதிமூலகாதீ³ஸுபி ஹெட்டா² வுத்தனயேனேவ யங் லப்³ப⁴தி யஞ்ச ந லப்³ப⁴தி, தங் ஸப்³ப³ங் ஸாது⁴கங் ஸல்லக்கெ²த்வா ஸங்ஸந்த³னக⁴டனக³ணனா வேதி³தப்³பா³.
66. Ārammaṇamūlake adhipatiyā cattārīti ārammaṇādhipativasena sukhaṃ sukhassa, adukkhamasukhassa, adukkhamasukhaṃ adukkhamasukhassa, sukhassāti evaṃ cattāri. Upanissayepi ārammaṇūpanissayavasena cattāro vuttā. Ghaṭanāni panettha ekameva. Adhipatimūlakādīsupi heṭṭhā vuttanayeneva yaṃ labbhati yañca na labbhati, taṃ sabbaṃ sādhukaṃ sallakkhetvā saṃsandanaghaṭanagaṇanā veditabbā.
83-87. பச்சனீயம்ஹி குஸலத்திகே வுத்தனயேனேவ அனுலோமதோ பச்சயே உத்³த⁴ரித்வா தத்த² லத்³தா⁴னங் வாரானங் வஸேன பச்சனீயதோ க³ணனவஸேன நஹேதுயா நவாதி ஸப்³ப³பச்சயேஸு நவ வாரா த³ஸ்ஸிதா . தே ஏகமூலகேகாவஸானானங் நவன்னங் விஸ்ஸஜ்ஜனானங் வஸேன ‘‘ஸுகா²ய வேத³னாய ஸம்பயுத்தோ த⁴ம்மோ ஸுகா²ய வேத³னாய ஸம்பயுத்தஸ்ஸ த⁴ம்மஸ்ஸ நஹேதுபச்சயேன பச்சயோ, ஸுகா²ய வேத³னாய ஸம்பயுத்தேன சித்தேன தா³னங் த³த்வா’’திஆதி³னா நயேன பாளிங் உத்³த⁴ரித்வா த³ஸ்ஸேதப்³பா³. பச்சயஸங்ஸந்த³னே பனெத்த² நஹேதுபச்சயா…பே॰… நஉபனிஸ்ஸயே அட்டா²தி நானாக்க²ணிககம்மபச்சயவஸேன வேதி³தப்³பா³. து³ப்³ப³லகம்மஞ்ஹி விபாகஸ்ஸ ந உபனிஸ்ஸயோ ஹோதி. கேவலங் பன நானாக்க²ணிககம்மபச்சயேனேவ பச்சயோ ஹோதி. ஸேஸமெத்த² அனுலோமபச்சனீயபச்சனீயானுலோமேஸு ச தேஸங் தேஸங் பச்சயானங் யோகே³ லத்³த⁴வாரவஸேன ஸக்கா ஹெட்டா² வுத்தனயேனேவ க³ணேதுங், தஸ்மா ந வித்தா²ரிதந்தி.
83-87. Paccanīyamhi kusalattike vuttanayeneva anulomato paccaye uddharitvā tattha laddhānaṃ vārānaṃ vasena paccanīyato gaṇanavasena nahetuyā navāti sabbapaccayesu nava vārā dassitā . Te ekamūlakekāvasānānaṃ navannaṃ vissajjanānaṃ vasena ‘‘sukhāya vedanāya sampayutto dhammo sukhāya vedanāya sampayuttassa dhammassa nahetupaccayena paccayo, sukhāya vedanāya sampayuttena cittena dānaṃ datvā’’tiādinā nayena pāḷiṃ uddharitvā dassetabbā. Paccayasaṃsandane panettha nahetupaccayā…pe… naupanissaye aṭṭhāti nānākkhaṇikakammapaccayavasena veditabbā. Dubbalakammañhi vipākassa na upanissayo hoti. Kevalaṃ pana nānākkhaṇikakammapaccayeneva paccayo hoti. Sesamettha anulomapaccanīyapaccanīyānulomesu ca tesaṃ tesaṃ paccayānaṃ yoge laddhavāravasena sakkā heṭṭhā vuttanayeneva gaṇetuṃ, tasmā na vitthāritanti.
வேத³னாத்திகவண்ணனா.
Vedanāttikavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / 2. வேத³னாத்திகங் • 2. Vedanāttikaṃ
