| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
৬. ৰত্তাদিকণ্ডনিদ্দেসৰণ্ণনা
6. Vattādikaṇḍaniddesavaṇṇanā
৯৬. ইদানি ৰত্তং দস্সেতুং ‘‘উপজ্ঝাচরিযৰত্ত’’ন্তি ৰুত্তং। তত্থ উপজ্ঝাযৰত্তঞ্চ আচরিযৰত্তঞ্চ গমিকৰত্তঞ্চ আগন্তুকৰত্তঞ্চ সেনাসনাদিৰত্তঞ্চ পিযসীলেন ভিক্খুনা কাতব্বন্তি সম্বন্ধো। গমিকাগন্তুকন্তি গমিকং আগন্তুকন্তি ছেদো, গমিকৰত্তং আগন্তুকৰত্তঞ্চাতি অত্থো।
96. Idāni vattaṃ dassetuṃ ‘‘upajjhācariyavatta’’nti vuttaṃ. Tattha upajjhāyavattañca ācariyavattañca gamikavattañca āgantukavattañca senāsanādivattañca piyasīlena bhikkhunā kātabbanti sambandho. Gamikāgantukanti gamikaṃ āgantukanti chedo, gamikavattaṃ āgantukavattañcāti attho.
৯৭. দাতুকামো হত্থপাসে ঠিতো কিঞ্চি গহিতব্বং একেন পুরিসেন গহিতব্বং উক্খিপনক্খমং ৰত্থুং তিধা তীসু পকারেসু একেনাকারেন দদেয্য, গহেতুকামো ভিক্খু দ্ৰিধা দ্ৰীসু একেন গণ্হেয্য, অযং পঞ্চঙ্গো পটিগ্গহোতি অত্থো।
97. Dātukāmo hatthapāse ṭhito kiñci gahitabbaṃ ekena purisena gahitabbaṃ ukkhipanakkhamaṃ vatthuṃ tidhā tīsu pakāresu ekenākārena dadeyya, gahetukāmo bhikkhu dvidhā dvīsu ekena gaṇheyya, ayaṃ pañcaṅgo paṭiggahoti attho.
৯৮-১০০. দূরে ঠিতং চীৰরং ঠপিতোকাসং সল্লক্খেত্ৰা ‘‘এত’’ন্তি ৰত্তব্বং। হত্থপাসে ঠিতং হত্থেন আমসিত্ৰা ‘‘ইম’’ন্তি ৰত্তব্বং। ‘‘এতং অধিট্ঠামি, ইমং অধিট্ঠামী’’তি ইমেসং পদানং মজ্ঝে সঙ্ঘাটিআদীসু পচ্চেকং যোজেত্ৰা তিচীৰরং অধিট্ঠেয্য। কথং? ‘‘এতং সঙ্ঘাটিং অধিট্ঠামি, ইমং সঙ্ঘাটিং অধিট্ঠামী’’তি অধিট্ঠেয্য। এৰং সেসেসু চ চীৰরেসু। যথা চীৰরাদিং ৰিধানং এৰং পত্তেপি অধিট্ঠেয্য পচ্চুদ্ধরেয্যাতি অত্থো।
98-100. Dūre ṭhitaṃ cīvaraṃ ṭhapitokāsaṃ sallakkhetvā ‘‘eta’’nti vattabbaṃ. Hatthapāse ṭhitaṃ hatthena āmasitvā ‘‘ima’’nti vattabbaṃ. ‘‘Etaṃ adhiṭṭhāmi, imaṃ adhiṭṭhāmī’’ti imesaṃ padānaṃ majjhe saṅghāṭiādīsu paccekaṃ yojetvā ticīvaraṃ adhiṭṭheyya. Kathaṃ? ‘‘Etaṃ saṅghāṭiṃ adhiṭṭhāmi, imaṃ saṅghāṭiṃ adhiṭṭhāmī’’ti adhiṭṭheyya. Evaṃ sesesu ca cīvaresu. Yathā cīvarādiṃ vidhānaṃ evaṃ pattepi adhiṭṭheyya paccuddhareyyāti attho.
১০১. সঞ্চরিত্তং ঠপেত্ৰা সেসা গরুকা চ পারাজিকা চ সচিত্তকাতি সম্বন্ধো। অন্তিমাতি পারাজিকা। অচ্ছিন্নসিক্খাপদং, পরিণতসিক্খাপদঞ্চাতি ইমং দ্ৰযং ঠপেত্ৰা সেসং নিস্সগ্গিযং অচিত্তকন্তি অত্থো।
101. Sañcarittaṃ ṭhapetvā sesā garukā ca pārājikā ca sacittakāti sambandho. Antimāti pārājikā. Acchinnasikkhāpadaṃ, pariṇatasikkhāpadañcāti imaṃ dvayaṃ ṭhapetvā sesaṃ nissaggiyaṃ acittakanti attho.
১০২-৩. গামপ্পৰেসনন্তেতেতি গামপ্পৰেসনং ইতি এতে। পাচিত্তীসু এতে পদসোধম্মাদযো গামপ্পৰেসনন্তা সত্তরস সিক্খাপদা অচিত্তকা।
102-3.Gāmappavesananteteti gāmappavesanaṃ iti ete. Pācittīsu ete padasodhammādayo gāmappavesanantā sattarasa sikkhāpadā acittakā.
১০৪-৫. পকিণ্ণকেসু উদ্দিস্সকতং ঠপেত্ৰা অঞ্ঞমংসকং সেসমংসং অচিত্তকন্তি অত্থো। এত্থ পকিণ্ণকেসু অঞ্ঞমংসাদিকং পত্তহত্থো কৰাটকন্তং তেরসৰিধং ইদং সিক্খাপদং অচিত্তকং, সেসং সব্বং সচিত্তকন্তি অত্থো।
104-5. Pakiṇṇakesu uddissakataṃ ṭhapetvā aññamaṃsakaṃ sesamaṃsaṃ acittakanti attho. Ettha pakiṇṇakesu aññamaṃsādikaṃ pattahattho kavāṭakantaṃ terasavidhaṃ idaṃ sikkhāpadaṃ acittakaṃ, sesaṃ sabbaṃ sacittakanti attho.
১০৬. আচরিযা ৰীতিক্কমনচিত্তেন সচিত্তকং অচিত্তকন্তি ৰদন্তি, পঞ্ঞত্তিজাননেন চিত্তেন তথা সচিত্তকং অচিত্তকন্তি আচরিযা ৰদন্তীতি অত্থো। তথা-সদ্দেন ‘‘সচিত্তকং অচিত্তক’’ন্তি ইদং গহিতং।
106. Ācariyā vītikkamanacittena sacittakaṃ acittakanti vadanti, paññattijānanena cittena tathā sacittakaṃ acittakanti ācariyā vadantīti attho. Tathā-saddena ‘‘sacittakaṃ acittaka’’nti idaṃ gahitaṃ.
১০৭-৯. পুব্বকরণাদিকন্তি এত্থ আদি-সদ্দো পুব্বকিচ্চং সঙ্গণ্হাতি। তত্থ –
107-9.Pubbakaraṇādikanti ettha ādi-saddo pubbakiccaṃ saṅgaṇhāti. Tattha –
‘‘সম্মজ্জনী পদীপো চ, উদকং আসনেন চ।
‘‘Sammajjanī padīpo ca, udakaṃ āsanena ca;
উপোসথস্স এতানি, পুব্বকরণন্তি ৰুচ্চতি॥
Uposathassa etāni, pubbakaraṇanti vuccati.
‘‘ছন্দপারিসুদ্ধিউতুক্খানং, ভিক্খুগণনা চ ওৰাদো।
‘‘Chandapārisuddhiutukkhānaṃ, bhikkhugaṇanā ca ovādo;
উপোসথস্স এতানি, পুব্বকিচ্চন্তি ৰুচ্চতী’’তি॥ –
Uposathassa etāni, pubbakiccanti vuccatī’’ti. –
এৰং পুব্বকরণাদিকং নৰধা দীপিতং সব্বং উপোসথপ্পৰারণং পিযসীলিনা কাতব্বন্তি অত্থো।
Evaṃ pubbakaraṇādikaṃ navadhā dīpitaṃ sabbaṃ uposathappavāraṇaṃ piyasīlinā kātabbanti attho.
১১২. যথাক্কমন্তি এত্থাযমধিপ্পাযো – গণো পারিসুদ্ধিউপোসথং করেয্য, পুগ্গলো অধিট্ঠানউপোসথং করেয্য, সঙ্ঘো সুত্তুদ্দেসউপোসথং করেয্যাতি।
112.Yathākkamanti etthāyamadhippāyo – gaṇo pārisuddhiuposathaṃ kareyya, puggalo adhiṭṭhānauposathaṃ kareyya, saṅgho suttuddesauposathaṃ kareyyāti.
১১৩. চাতুদ্দসো পন্নরসো, সামগ্গী দিনতো তিধাতি চাতুদ্দসো উপোসথো , পন্নরসো উপোসথো, সামগ্গীউপোসথোতি দিনতো তিধা হোন্তি। দিনতো পুগ্গলতো কত্তব্বাকারতো তে উপোসথা নৰ ইতি ঈরিতাতি অত্থো।
113.Cātuddaso pannaraso, sāmaggī dinato tidhāti cātuddaso uposatho , pannaraso uposatho, sāmaggīuposathoti dinato tidhā honti. Dinato puggalato kattabbākārato te uposathā nava iti īritāti attho.
১১৪. তেৰাচী দ্ৰেকৰাচীতি তেৰাচিকা পৰারণা, দ্ৰেৰাচিকা পৰারণা, একৰাচিকা পৰারণা ইতি নৰ পৰারণা ৰুত্তা।
114.Tevācī dvekavācīti tevācikā pavāraṇā, dvevācikā pavāraṇā, ekavācikā pavāraṇā iti nava pavāraṇā vuttā.
১১৫. তস্সাতি ফগ্গুনমাসস্স। ততো সেসন্তি আসাল়্হিঅন্তিমপক্খম্হা যাৰ কত্তিকপুণ্ণমা ৰস্সকালন্তি অত্থো। এত্থ হি একস্মিং সংৰচ্ছরে চতুৰীসতিউপোসথা হোন্তি।
115.Tassāti phaggunamāsassa. Tato sesanti āsāḷhiantimapakkhamhā yāva kattikapuṇṇamā vassakālanti attho. Ettha hi ekasmiṃ saṃvacchare catuvīsatiuposathā honti.
১১৬. এতেসূতি এতেসু তীসু চতূসু একেকস্মিং উতুম্হি ততিযপক্খা সত্তমপক্খা। চাতুদ্দসাতি ছ চাতুদ্দসাতি অত্থো। সেসানি উত্তানত্থানেৰাতি।
116.Etesūti etesu tīsu catūsu ekekasmiṃ utumhi tatiyapakkhā sattamapakkhā. Cātuddasāti cha cātuddasāti attho. Sesāni uttānatthānevāti.
ৰত্তাদিকণ্ডনিদ্দেসৰণ্ণনা নিট্ঠিতা।
Vattādikaṇḍaniddesavaṇṇanā niṭṭhitā.
