| Library / Tipiṭaka / तिपिटक • Tipiṭaka / थेरगाथापाळि • Theragāthāpāḷi |
१०. वसभत्थेरगाथा
10. Vasabhattheragāthā
१३९.
139.
‘‘पुब्बे हनति अत्तानं, पच्छा हनति सो परे।
‘‘Pubbe hanati attānaṃ, pacchā hanati so pare;
सुहतं हन्ति अत्तानं, वीतंसेनेव पक्खिमा॥
Suhataṃ hanti attānaṃ, vītaṃseneva pakkhimā.
१४०.
140.
‘‘न ब्राह्मणो बहिवण्णो, अन्तो वण्णो हि ब्राह्मणो।
‘‘Na brāhmaṇo bahivaṇṇo, anto vaṇṇo hi brāhmaṇo;
यस्मिं पापानि कम्मानि, स वे कण्हो सुजम्पती’’ति॥
Yasmiṃ pāpāni kammāni, sa ve kaṇho sujampatī’’ti.
… वसभो थेरो…।
… Vasabho thero….
वग्गो पठमो निट्ठितो।
Vaggo paṭhamo niṭṭhito.
तस्सुद्दानं –
Tassuddānaṃ –
उत्तरो चेव पिण्डोलो, वल्लियो तीरियो इसि।
Uttaro ceva piṇḍolo, valliyo tīriyo isi;
अजिनो च मेळजिनो, राधो सुराधो गोतमो।
Ajino ca meḷajino, rādho surādho gotamo;
वसभेन इमे होन्ति, दस थेरा महिद्धिकाति॥
Vasabhena ime honti, dasa therā mahiddhikāti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / थेरगाथा-अट्ठकथा • Theragāthā-aṭṭhakathā / १०. वसभत्थेरगाथावण्णना • 10. Vasabhattheragāthāvaṇṇanā
