| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৯. ৰণিজ্জসুত্তৰণ্ণনা
9. Vaṇijjasuttavaṇṇanā
৭৯. নৰমে তাদিসা ৰাতি তংসদিসাৰ তংসরিক্খকাৰ। ছেদগামিনী হোতীতি ছেদং গচ্ছতি। যং পত্থিতং, তং সব্বং নস্সতীতি অত্থো। ন যথাধিপ্পাযা হোতীতি যথাজ্ঝাসযা ন হোতি। পরাধিপ্পাযা হোতীতি পরজ্ঝাসযা অজ্ঝাসযতো অধিকতরফলা হোতি। সমণং ৰা ব্রাহ্মণং ৰাতি এত্থ সমিতপাপবাহিতপাপতাহি সমণব্রাহ্মণতা ৰেদিতব্বা। ৰদতু, ভন্তে, পচ্চযেনাতি, ভন্তে, চতুব্বিধেন চীৰরাদিনা পচ্চযেন ৰদেয্যাসীতি এৰং পৰারেতি নিমন্তেতি। যেন পৰারেতীতি পরিচ্ছিন্দিত্ৰা যত্তকেন পৰারেতি। তং ন দেতীতি তং সব্বসোৰ ন দেতি। ন যথাধিপ্পাযং দেতীতি যথা তস্স অজ্ঝাসযো, এৰং দাতুং ন সক্কোতি, হাপেত্ৰা অপ্পকং দেতি। যথাধিপ্পাযং দেতীতি যত্তকং সো ইচ্ছতি, তত্তকমেৰ দেতি। পরাধিপ্পাযং দেতীতি অপ্পকং পৰারেত্ৰা অৰত্থরিত্ৰা বহুং দেতি।
79. Navame tādisā vāti taṃsadisāva taṃsarikkhakāva. Chedagāminī hotīti chedaṃ gacchati. Yaṃ patthitaṃ, taṃ sabbaṃ nassatīti attho. Na yathādhippāyā hotīti yathājjhāsayā na hoti. Parādhippāyā hotīti parajjhāsayā ajjhāsayato adhikataraphalā hoti. Samaṇaṃ vā brāhmaṇaṃ vāti ettha samitapāpabāhitapāpatāhi samaṇabrāhmaṇatā veditabbā. Vadatu, bhante, paccayenāti, bhante, catubbidhena cīvarādinā paccayena vadeyyāsīti evaṃ pavāreti nimanteti. Yena pavāretīti paricchinditvā yattakena pavāreti. Taṃ na detīti taṃ sabbasova na deti. Na yathādhippāyaṃ detīti yathā tassa ajjhāsayo, evaṃ dātuṃ na sakkoti, hāpetvā appakaṃ deti. Yathādhippāyaṃ detīti yattakaṃ so icchati, tattakameva deti. Parādhippāyaṃ detīti appakaṃ pavāretvā avattharitvā bahuṃ deti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৯. ৰণিজ্জসুত্তং • 9. Vaṇijjasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৯-১০. ৰণিজ্জসুত্তাদিৰণ্ণনা • 9-10. Vaṇijjasuttādivaṇṇanā
