| Library / Tipiṭaka / តិបិដក • Tipiṭaka / វិមានវត្ថុ-អដ្ឋកថា • Vimānavatthu-aṭṭhakathā |
១១. វន្ទនវិមានវណ្ណនា
11. Vandanavimānavaṇṇanā
អភិក្កន្តេន វណ្ណេនាតិ វន្ទនវិមានំ។ តស្ស កា ឧប្បត្តិ? ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តេន សមយេន សម្ពហុលា ភិក្ខូ អញ្ញតរស្មិំ គាមកាវាសេ វស្សំ វសិត្វា វុត្ថវស្សា បវារេត្វា សេនាសនំ បដិសាមេត្វា បត្តចីវរមាទាយ សាវត្ថិំ ឧទ្ទិស្ស ភគវន្តំ ទស្សនត្ថាយ គច្ឆន្តា អញ្ញតរស្ស គាមស្ស មជ្ឈេន អតិក្កមន្តិ។ តត្ថ អញ្ញតរា ឥត្ថី តេ ភិក្ខូ ទិស្វា បសន្នចិត្តា សញ្ជាតគារវពហុមានា បញ្ចបតិដ្ឋិតេន វន្ទិត្វា សិរស្មិំ អញ្ជលិំ បគ្គយ្ហ យាវ ទស្សនូបចារា បសាទសោម្មានិ អក្ខីនិ ឧម្មីលេត្វា ឱលោកេន្តី អដ្ឋាសិ ។ សា អបរេន សមយេន កាលំ កត្វា តាវតិំសេសុ និព្ពត្តិ។ អថ នំ តត្ថ ទិព្ពសម្បត្តិំ អនុភវន្តិំ អាយស្មា មហាមោគ្គល្លានោ ឥមាហិ គាថាហិ បដិបុច្ឆិ –
Abhikkantenavaṇṇenāti vandanavimānaṃ. Tassa kā uppatti? Bhagavā sāvatthiyaṃ viharati jetavane anāthapiṇḍikassa ārāme. Tena samayena sambahulā bhikkhū aññatarasmiṃ gāmakāvāse vassaṃ vasitvā vutthavassā pavāretvā senāsanaṃ paṭisāmetvā pattacīvaramādāya sāvatthiṃ uddissa bhagavantaṃ dassanatthāya gacchantā aññatarassa gāmassa majjhena atikkamanti. Tattha aññatarā itthī te bhikkhū disvā pasannacittā sañjātagāravabahumānā pañcapatiṭṭhitena vanditvā sirasmiṃ añjaliṃ paggayha yāva dassanūpacārā pasādasommāni akkhīni ummīletvā olokentī aṭṭhāsi . Sā aparena samayena kālaṃ katvā tāvatiṃsesu nibbatti. Atha naṃ tattha dibbasampattiṃ anubhavantiṃ āyasmā mahāmoggallāno imāhi gāthāhi paṭipucchi –
៨១៩. ‘‘អភិក្កន្តេន វណ្ណេន…បេ.…វណ្ណោ ច តេ សព្ពទិសា បភាសតី’’តិ។
819. ‘‘Abhikkantena vaṇṇena…pe…vaṇṇo ca te sabbadisā pabhāsatī’’ti.
៨២២. ‘‘សា ទេវតា អត្តមនា…បេ.… យស្ស កម្មស្សិទំ ផលំ’’។
822. ‘‘Sā devatā attamanā…pe… yassa kammassidaṃ phalaṃ’’.
៨២៣.
823.
‘‘អហំ មនុស្សេសុ មនុស្សភូតា, ទិស្វាន សមណេ សីលវន្តេ;
‘‘Ahaṃ manussesu manussabhūtā, disvāna samaṇe sīlavante;
បាទានិ វន្ទិត្វា មនំ បសាទយិំ, វិត្តា ចហំ អញ្ជលិកំ អកាសិំ។
Pādāni vanditvā manaṃ pasādayiṃ, vittā cahaṃ añjalikaṃ akāsiṃ.
៨២៤.
824.
‘‘តេន មេតាទិសោ វណ្ណោ…បេ.…វណ្ណោ ច មេ សព្ពទិសា បភាសតី’’តិ។ –
‘‘Tena metādiso vaṇṇo…pe…vaṇṇo ca me sabbadisā pabhāsatī’’ti. –
ឥមាហិ គាថាហិ ព្យាកាសិ។
Imāhi gāthāhi byākāsi.
៨២៣. តត្ថ សមណេតិ សមិតបាបេ។ សីលវន្តេតិ សីលគុណយុត្តេ។ មនំ បសាទយិន្តិ ‘‘សាធុរូបា វតិមេ អយ្យា ធម្មចារិនោ សមចារិនោ ព្រហ្មចារិនោ’’តិ តេសំ គុណេ អារព្ភ ចិត្តំ បសាទេសិំ។ វិត្តា ចហំ អញ្ជលិកំ អកាសិន្តិ តុដ្ឋា សោមនស្សជាតា អហំ វន្ទិំ។ បេសលានំ ភិក្ខូនំ បសាទវិកសិតានិ អក្ខីនិ ឧម្មីលេត្វា ទស្សនមត្តម្បិ ឥមេសំ សត្តានំ ពហូបការំ, បគេវ វន្ទនាតិ។ តេនាហ ‘‘តេន មេតាទិសោ វណ្ណោ’’តិអាទិ។ សេសំ វុត្តនយមេវ។
823. Tattha samaṇeti samitapāpe. Sīlavanteti sīlaguṇayutte. Manaṃ pasādayinti ‘‘sādhurūpā vatime ayyā dhammacārino samacārino brahmacārino’’ti tesaṃ guṇe ārabbha cittaṃ pasādesiṃ. Vittā cahaṃ añjalikaṃ akāsinti tuṭṭhā somanassajātā ahaṃ vandiṃ. Pesalānaṃ bhikkhūnaṃ pasādavikasitāni akkhīni ummīletvā dassanamattampi imesaṃ sattānaṃ bahūpakāraṃ, pageva vandanāti. Tenāha ‘‘tena metādiso vaṇṇo’’tiādi. Sesaṃ vuttanayameva.
វន្ទនវិមានវណ្ណនា និដ្ឋិតា។
Vandanavimānavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / វិមានវត្ថុបាឡិ • Vimānavatthupāḷi / ១១. វន្ទនវិមានវត្ថុ • 11. Vandanavimānavatthu
