| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೭. ವಂಸಙ್ಗಪಞ್ಹೋ
7. Vaṃsaṅgapañho
೭. ‘‘ಭನ್ತೇ ನಾಗಸೇನ, ‘ವಂಸಸ್ಸ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ವಂಸೋ ಯತ್ಥ ವಾತೋ, ತತ್ಥ ಅನುಲೋಮೇತಿ, ನಾಞ್ಞತ್ಥಮನುಧಾವತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಯಂ ಬುದ್ಧೇನ ಭಗವತಾ ಭಾಸಿತಂ ನವಙ್ಗಂ ಸತ್ಥು ಸಾಸನಂ, ತಂ ಅನುಲೋಮಯಿತ್ವಾ ಕಪ್ಪಿಯೇ ಅನವಜ್ಜೇ ಠತ್ವಾ ಸಮಣಧಮ್ಮಂ ಯೇವ ಪರಿಯೇಸಿತಬ್ಬಂ। ಇದಂ, ಮಹಾರಾಜ, ವಂಸಸ್ಸ ಏಕಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ ಮಹಾರಾಜ ಥೇರೇನ ರಾಹುಲೇನ –
7. ‘‘Bhante nāgasena, ‘vaṃsassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, vaṃso yattha vāto, tattha anulometi, nāññatthamanudhāvati, evameva kho, mahārāja, yoginā yogāvacarena yaṃ buddhena bhagavatā bhāsitaṃ navaṅgaṃ satthu sāsanaṃ, taṃ anulomayitvā kappiye anavajje ṭhatvā samaṇadhammaṃ yeva pariyesitabbaṃ. Idaṃ, mahārāja, vaṃsassa ekaṃ aṅgaṃ gahetabbaṃ. Bhāsitampetaṃ mahārāja therena rāhulena –
‘‘‘ನವಙ್ಗಂ ಬುದ್ಧವಚನಂ, ಅನುಲೋಮೇತ್ವಾನ ಸಬ್ಬದಾ।
‘‘‘Navaṅgaṃ buddhavacanaṃ, anulometvāna sabbadā;
ಕಪ್ಪಿಯೇ ಅನವಜ್ಜಸ್ಮಿಂ, ಠತ್ವಾಪಾಯಂ ಸಮುತ್ತರಿ’’’ನ್ತಿ॥
Kappiye anavajjasmiṃ, ṭhatvāpāyaṃ samuttari’’’nti.
ವಂಸಙ್ಗಪಞ್ಹೋ ಸತ್ತಮೋ।
Vaṃsaṅgapañho sattamo.
