| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༡༡. ཝལཱཧཀསཾཡུཏྟཝཎྞནཱ
11. Valāhakasaṃyuttavaṇṇanā
༥༥༠-༦༠༦. ལོཀཾ ཝཱལེནྟཱ སཾཝརནྟཱ ཚཱདེནྟཱ ཨཧནྟི པརིཡེསནྟཱིཏི ཝལཱཧཱ, དེཝཔུཏྟཱ། ཏེསཾ སམཱུཧོ ཝལཱཧཀདེཝཀཱཡོཏི ཨཱཧ ‘‘ཝལཱཧཀཀཱཡིཀཱ’’ཏིཨཱདི། སཱིཏཀརཎཝལཱཧཀཱཏི སཱིཏཧརཎཝལཱཧཀཱ། སེསཔདེསཱུཏི ཨུཎྷཝལཱཧཀཱདིཔདེསུ། ཨེསེཝ ནཡོཏི ‘‘ཨུཎྷཀརཎཝལཱཧཀཱ’’ཏིཨཱདིནཱ ཨཏྠོ ཝེདིཏབྦོ། ཙིཏྟཊྛཔནནྟི ‘‘སཱིཏཾ ཧོཏཱུ’’ཏི ཨེཝཾ ཙིཏྟསྶ ཨུཔྤཱདནཾ། ཝསྶཱནེཏི ཝསྶཀཱལེ། ཨུཏུསམུཊྛཱནམེཝཱཏི པཱཀཏིཀསཱིཏམེཝཱཏི ཨཏྠོ། ཨུཎྷེཔཱིཏི ཨུཎྷཀཱལེ། ཨབྦྷམཎྜཔོཏི མཎྜཔསདིསཨབྦྷཔཊལཝིཏཱནམཱཧ། ཨབྦྷཾ ཨུཔྤཛྫཏཱིཏི ཏཧཾ ཏཧཾ པཊལཾ ཨུཊྛཧཏི། ཨབྦྷེཡེཝཱཏི ཨབྦྷཀཱལེ ཨེཝ, ཝསྶཱནེཏི ཨཏྠོ། ཨཏིཨབྦྷནྟི སཏཔཊལསཧསྶཔཊལཾ ཧུཏྭཱ ཨབྦྷུཊྛཱནཾ། ཙིཏྟཝེསཱཁམཱསེསཱུཏི ཝསནྟཀཱལཾ སནྡྷཱཡཱཧ། ཏདཱ ཧི ཝིདྡྷོ ཝིགཏཝལཱཧཀོ དེཝོ བྷཝིཏུཾ ཡུཏྟོ། ཨུཏྟརདཀྑིཎཱདཱིཏི ཨཱདི-སདྡེན པཙྪིམཝཱཏཱདིཾ སངྒཎྷཱཏི། པཀཏིཝཱཏོཏི པཀཏིཡཱ སབྷཱཝེན ཝཱཡནཀཝཱཏོ། ཏཾ ཨུཏུསམུཊྛཱནམེཝཱཏི ཨཱཧཱརཱུཔཛཱིཝཱིནཾ སཏྟཱནཾ སཱདྷཱརཎཀམྨཱུཔནིསྶཡཨུཏུསམུཊྛཱནམེཝ། ཨེས ནཡོ ཨུཏུསམུཊྛཱནསཱིཏུཎྷཝཱཏེསུཔི། ཏམྤི ཧི ཨཱཧཱརཱུཔཛཱིཝཱིནཾ སཏྟཱནཾ སཱདྷཱརཎཀམྨཱུཔནིསྶཡམེཝཱཏི།
550-606. Lokaṃ vālentā saṃvarantā chādentā ahanti pariyesantīti valāhā, devaputtā. Tesaṃ samūho valāhakadevakāyoti āha ‘‘valāhakakāyikā’’tiādi. Sītakaraṇavalāhakāti sītaharaṇavalāhakā. Sesapadesūti uṇhavalāhakādipadesu. Eseva nayoti ‘‘uṇhakaraṇavalāhakā’’tiādinā attho veditabbo. Cittaṭṭhapananti ‘‘sītaṃ hotū’’ti evaṃ cittassa uppādanaṃ. Vassāneti vassakāle. Utusamuṭṭhānamevāti pākatikasītamevāti attho. Uṇhepīti uṇhakāle. Abbhamaṇḍapoti maṇḍapasadisaabbhapaṭalavitānamāha. Abbhaṃ uppajjatīti tahaṃ tahaṃ paṭalaṃ uṭṭhahati. Abbheyevāti abbhakāle eva, vassāneti attho. Atiabbhanti satapaṭalasahassapaṭalaṃ hutvā abbhuṭṭhānaṃ. Cittavesākhamāsesūti vasantakālaṃ sandhāyāha. Tadā hi viddho vigatavalāhako devo bhavituṃ yutto. Uttaradakkhiṇādīti ādi-saddena pacchimavātādiṃ saṅgaṇhāti. Pakativātoti pakatiyā sabhāvena vāyanakavāto. Taṃ utusamuṭṭhānamevāti āhārūpajīvīnaṃ sattānaṃ sādhāraṇakammūpanissayautusamuṭṭhānameva. Esa nayo utusamuṭṭhānasītuṇhavātesupi. Tampi hi āhārūpajīvīnaṃ sattānaṃ sādhāraṇakammūpanissayamevāti.
གཱིཏནྟི མེགྷགཱིཏཾ། སཙྩཀིརིཡཱཡཱཏི ཏཱདིསཱནཾ པུརིསཝིསེསཱནཾ སཙྩཱདྷིཊྛཱནེན། ཨིདྡྷིབལེནཱཏི ཨིདྡྷིམནྟཱནཾ ཨིདྡྷིཨཱནུབྷཱཝེན། ཝིནཱསམེགྷེནཱཏི ཀཔྤཝིནཱསཀམེགྷེན། ཨཉྙེནཔི ཀཎྷཔཱཔིཀསཏྟཱནཾ པཱཔཀམྨཔཙྩཡཱ ཨུཔྤནྣཝིནཱསམེགྷེན ཝུཊྛེན སོ སོ དེསོ ཝིནསྶཏེཝ།
Gītanti meghagītaṃ. Saccakiriyāyāti tādisānaṃ purisavisesānaṃ saccādhiṭṭhānena. Iddhibalenāti iddhimantānaṃ iddhiānubhāvena. Vināsameghenāti kappavināsakameghena. Aññenapi kaṇhapāpikasattānaṃ pāpakammapaccayā uppannavināsameghena vuṭṭhena so so deso vinassateva.
ཝལཱཧཀསཾཡུཏྟཝཎྞནཱ ནིཊྛིཏཱ།
Valāhakasaṃyuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya
༡. སུདྡྷིཀསུཏྟཾ • 1. Suddhikasuttaṃ
༢. སུཙརིཏསུཏྟཾ • 2. Sucaritasuttaṃ
༣-༡༢. སཱིཏཝལཱཧཀདཱནཱུཔཀཱརསུཏྟདསཀཾ • 3-12. Sītavalāhakadānūpakārasuttadasakaṃ
༡༣-༥༢. ཨུཎྷཝལཱཧཀདཱནཱུཔཀཱརསུཏྟཙཱལཱིསཀཾ • 13-52. Uṇhavalāhakadānūpakārasuttacālīsakaṃ
༥༣. སཱིཏཝལཱཧཀསུཏྟཾ • 53. Sītavalāhakasuttaṃ
༥༤. ཨུཎྷཝལཱཧཀསུཏྟཾ • 54. Uṇhavalāhakasuttaṃ
༥༥. ཨབྦྷཝལཱཧཀསུཏྟཾ • 55. Abbhavalāhakasuttaṃ
༥༦. ཝཱཏཝལཱཧཀསུཏྟཾ • 56. Vātavalāhakasuttaṃ
༥༧. ཝསྶཝལཱཧཀསུཏྟཾ • 57. Vassavalāhakasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡༡. ཝལཱཧཀསཾཡུཏྟཝཎྞནཱ • 11. Valāhakasaṃyuttavaṇṇanā
