| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
។ នមោ តស្ស ភគវតោ អរហតោ សម្មាសម្ពុទ្ធស្ស។
Namo tassa bhagavato arahato sammāsambuddhassa
អង្គុត្តរនិកាយេ
Aṅguttaranikāye
ទុកនិបាត-ដីកា
Dukanipāta-ṭīkā
១. បឋមបណ្ណាសកំ
1. Paṭhamapaṇṇāsakaṃ
១. កម្មការណវគ្គោ
1. Kammakāraṇavaggo
១. វជ្ជសុត្តវណ្ណនា
1. Vajjasuttavaṇṇanā
១. ទុកនិបាតស្ស បឋមេ បហារសាធនត្ថន្តិ ទណ្ឌប្បហារស្ស សុខសិទ្ធិ-អត្ថំ។ កញ្ជិតោ និព្ពត្តំ កញ្ជិយំ, អារនាលំ, យំ ពិលង្គន្តិបិ វុច្ចតិ, តំ យត្ថ សិញ្ចតិ, សា កញ្ជិយឧក្ខលិកា ពិលង្គថាលិកា, តំសទិសំ ការណំ ពិលង្គថាលិកំ។ សីសកដាហំ ឧប្បាដេត្វាតិ អយោគុឡប្បវេសប្បមាណំ ឆិទ្ទំ កត្វា។ សង្ខមុណ្ឌកម្មការណន្តិ សង្ខំ វិយ មុណ្ឌករណំ កម្មការណំ។ រាហុមុខកម្មការណន្តិ រាហុមុខគតសូរិយសទិសកម្មការណំ។
1. Dukanipātassa paṭhame pahārasādhanatthanti daṇḍappahārassa sukhasiddhi-atthaṃ. Kañjito nibbattaṃ kañjiyaṃ, āranālaṃ, yaṃ bilaṅgantipi vuccati, taṃ yattha siñcati, sā kañjiyaukkhalikā bilaṅgathālikā, taṃsadisaṃ kāraṇaṃ bilaṅgathālikaṃ. Sīsakaṭāhaṃ uppāṭetvāti ayoguḷappavesappamāṇaṃ chiddaṃ katvā. Saṅkhamuṇḍakammakāraṇanti saṅkhaṃ viya muṇḍakaraṇaṃ kammakāraṇaṃ. Rāhumukhakammakāraṇanti rāhumukhagatasūriyasadisakammakāraṇaṃ.
ជោតិមាលិកន្តិ ជោតិមាលវន្តំ កម្មការណំ។ ហត្ថបជ្ជោតិកន្តិ ហត្ថស្ស បជ្ជោតនកម្មការណំ។ ឯរកវត្តកម្មការណន្តិ ឯរកវត្តសទិសេ សរីរតោ ចម្មវត្តេ ឧប្បាដនកម្មការណំ។ ចីរកវាសិកកម្មការណន្តិ សរីរតោ ឧប្បាដិតវត្តចីរកេហិ និវាសាបនកម្មការណំ។ តំ ករោន្តា យថា គីវតោ បដ្ឋាយ វទ្ធេ កន្តិត្វា កដិយំ ឋបេន្តិ, ឯវំ គោប្ផកតោ បដ្ឋាយ កន្តិត្វាបិ កដិយមេវ ឋបេន្តិ។ អដ្ឋកថាយំ បន ‘‘កដិតោ បដ្ឋាយ កន្តិត្វា គោប្ផកេសុ ឋបេន្តី’’តិ វុត្តំ។ ឯណេយ្យកកម្មការណន្តិ ឯណិមិគសទិសកម្មការណំ។ អយវលយានិ ទត្វាតិ អយវលយានិ បដិមុញ្ចិត្វា។ អយសូលានិ កោដ្ដេន្តីតិ កប្បរជណ្ណុកកោដីសុ អយសូលានិ បវេសេន្តិ។ តន្តិ តំ តថាកតកម្មការណំ សត្តំ។
Jotimālikanti jotimālavantaṃ kammakāraṇaṃ. Hatthapajjotikanti hatthassa pajjotanakammakāraṇaṃ. Erakavattakammakāraṇanti erakavattasadise sarīrato cammavatte uppāṭanakammakāraṇaṃ. Cīrakavāsikakammakāraṇanti sarīrato uppāṭitavattacīrakehi nivāsāpanakammakāraṇaṃ. Taṃ karontā yathā gīvato paṭṭhāya vaddhe kantitvā kaṭiyaṃ ṭhapenti, evaṃ gopphakato paṭṭhāya kantitvāpi kaṭiyameva ṭhapenti. Aṭṭhakathāyaṃ pana ‘‘kaṭito paṭṭhāya kantitvā gopphakesu ṭhapentī’’ti vuttaṃ. Eṇeyyakakammakāraṇanti eṇimigasadisakammakāraṇaṃ. Ayavalayāni datvāti ayavalayāni paṭimuñcitvā. Ayasūlāni koṭṭentīti kapparajaṇṇukakoṭīsu ayasūlāni pavesenti. Tanti taṃ tathākatakammakāraṇaṃ sattaṃ.
ពឡិសមំសិកន្តិ ពលិសេហិ មំសុប្បាដនកម្មការណំ។ កហាបណិកន្តិ កហាបណមត្តសោ ឆិន្ទនកម្មការណំ។ កោដ្ដេន្តីតិ ឆិន្ទន្តិ។ ខារាបតច្ឆិកន្តិ តច្ឆេត្វា ខារាបសិញ្ចនកម្មការណំ។ បលិឃបរិវត្តិកន្តិ បលិឃស្ស វិយ បរិវត្តនកម្មការណំ។ ឯកាពទ្ធំ ករោន្តិ អយសូលស្ស កោដ្ដនេន។ បលាលបីឋកន្តិ បលាលបីឋស្ស វិយ សរីរស្ស សំវេល្លនកម្មការណំ។ ការណិកាតិ ឃាតនការកា។ បលាលវដ្ដិំ វិយ កត្វាតិ យថា បលាលបីឋំ ករោន្តា បលាលំ វដ្ដិំ កត្វា សំវេល្លនវសេន បុន វេឋេន្តិ, ឯវំ ករោន្តីតិ អត្ថោ។ ឆាតកសុនខេហីតិ ខុទ្ទកេហិ កោលេយ្យកសុនខេហិ។ តេ ហិ ពលវន្តា ជវយោគា សូរា ច ហោន្តិ។ សហស្សភណ្ឌិកន្តិ សហស្សត្ថវិកំ។
Baḷisamaṃsikanti balisehi maṃsuppāṭanakammakāraṇaṃ. Kahāpaṇikanti kahāpaṇamattaso chindanakammakāraṇaṃ. Koṭṭentīti chindanti. Khārāpatacchikanti tacchetvā khārāpasiñcanakammakāraṇaṃ. Palighaparivattikanti palighassa viya parivattanakammakāraṇaṃ. Ekābaddhaṃ karonti ayasūlassa koṭṭanena. Palālapīṭhakanti palālapīṭhassa viya sarīrassa saṃvellanakammakāraṇaṃ. Kāraṇikāti ghātanakārakā. Palālavaṭṭiṃ viya katvāti yathā palālapīṭhaṃ karontā palālaṃ vaṭṭiṃ katvā saṃvellanavasena puna veṭhenti, evaṃ karontīti attho. Chātakasunakhehīti khuddakehi koleyyakasunakhehi. Te hi balavantā javayogā sūrā ca honti. Sahassabhaṇḍikanti sahassatthavikaṃ.
យាហន្តិ យំ អហំ។ យន្តិ ច ការណវចនំ។ តេនាហ ‘‘យេន អហ’’ន្តិ។ ឆិន្នមូលកេតិ តណ្ហាមូលស្ស ឧច្ឆិន្នត្តា សញ្ឆិន្នមូលកេ។
Yāhanti yaṃ ahaṃ. Yanti ca kāraṇavacanaṃ. Tenāha ‘‘yena aha’’nti. Chinnamūlaketi taṇhāmūlassa ucchinnattā sañchinnamūlake.
វជ្ជសុត្តវណ្ណនា និដ្ឋិតា។
Vajjasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១. វជ្ជសុត្តំ • 1. Vajjasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១. វជ្ជសុត្តវណ្ណនា • 1. Vajjasuttavaṇṇanā
