| Library / Tipiṭaka / ತಿಪಿಟಕ • Tipiṭaka / ಕಙ್ಖಾವಿತರಣೀ-ಅಭಿನವ-ಟೀಕಾ • Kaṅkhāvitaraṇī-abhinava-ṭīkā |
೬. ವಜ್ಜಪ್ಪಟಿಚ್ಛಾದಿಕಾಸಿಕ್ಖಾಪದವಣ್ಣನಾ
6. Vajjappaṭicchādikāsikkhāpadavaṇṇanā
ಪಾರಾಜಿಕಂ ಧಮ್ಮಂ ಅಜ್ಝಾಪನ್ನನ್ತಿ ಭಿಕ್ಖೂಹಿ ಸಾಧಾರಣಾನಂ ಚತುನ್ನಂ, ಅಸಾಧಾರಣಾನಂ ಚತುನ್ನಞ್ಚಾತಿ ಅಟ್ಠನ್ನಮಞ್ಞತರಂ ಅಜ್ಝಾಪನ್ನಂ। ಇದಞ್ಚ ಪಾರಾಜಿಕಂ (ಪಾಚಿ॰ ಅಟ್ಠ॰ ೬೬೬) ಪಚ್ಛಾ ಪಞ್ಞತ್ತಂ, ಸಙ್ಗೀತಿಕಾರಕಾಚರಿಯೇಹಿ ಪನ ಪುರಿಮೇನ ಸದ್ಧಿಂ ಯುಗಳಂ ಕತ್ವಾ ಇಮಸ್ಮಿಂ ಓಕಾಸೇ ಠಪಿತನ್ತಿ ವೇದಿತಬ್ಬಂ। ‘‘ಅಟ್ಠನ್ನಂ ಪಾರಾಜಿಕಾನಂ ಅಞ್ಞತರ’’ನ್ತಿ (ಪಾಚಿ॰ ೬೬೬) ವಚನತೋ ಪನ ವಜ್ಜಪ್ಪಟಿಚ್ಛಾದಿಕಂ ಯಾ ಪಟಿಚ್ಛಾದೇತಿ, ಸಾಪಿ ವಜ್ಜಪ್ಪಟಿಚ್ಛಾದಿಕಾ ಏವಾತಿ ದಟ್ಠಬ್ಬಂ। ಕಿಞ್ಚಾಪಿ ವಜ್ಜಪ್ಪಟಿಚ್ಛಾದನಂ ಪೇಮವಸೇನ ಹೋತಿ, ತಥಾಪಿ ಸಿಕ್ಖಾಪದವೀತಿಕ್ಕಮಚಿತ್ತಂ ದೋಮನಸ್ಸಮೇವ ಹೋತೀತಿ ಕತ್ವಾ ದುಕ್ಖವೇದನಂ ಹೋತೀತಿ ‘‘ತತ್ರ ಹಿ ಪಾಚಿತ್ತಿಯಂ…ಪೇ॰… ಸೇಸಂ ತಾದಿಸಮೇವಾ’’ತಿ ವುತ್ತಂ।
Pārājikaṃ dhammaṃ ajjhāpannanti bhikkhūhi sādhāraṇānaṃ catunnaṃ, asādhāraṇānaṃ catunnañcāti aṭṭhannamaññataraṃ ajjhāpannaṃ. Idañca pārājikaṃ (pāci. aṭṭha. 666) pacchā paññattaṃ, saṅgītikārakācariyehi pana purimena saddhiṃ yugaḷaṃ katvā imasmiṃ okāse ṭhapitanti veditabbaṃ. ‘‘Aṭṭhannaṃ pārājikānaṃ aññatara’’nti (pāci. 666) vacanato pana vajjappaṭicchādikaṃ yā paṭicchādeti, sāpi vajjappaṭicchādikā evāti daṭṭhabbaṃ. Kiñcāpi vajjappaṭicchādanaṃ pemavasena hoti, tathāpi sikkhāpadavītikkamacittaṃ domanassameva hotīti katvā dukkhavedanaṃ hotīti ‘‘tatra hi pācittiyaṃ…pe… sesaṃ tādisamevā’’ti vuttaṃ.
ವಜ್ಜಪ್ಪಟಿಚ್ಛಾದಿಕಾಸಿಕ್ಖಾಪದವಣ್ಣನಾ ನಿಟ್ಠಿತಾ।
Vajjappaṭicchādikāsikkhāpadavaṇṇanā niṭṭhitā.
