| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗಪಾಳಿ • Mahāvaggapāḷi |
೯೬. ವಗ್ಗಾವಗ್ಗಸಞ್ಞೀಪನ್ನರಸಕಂ
96. Vaggāvaggasaññīpannarasakaṃ
೧೭೩. ಇಧ ಪನ, ಭಿಕ್ಖವೇ, ಅಞ್ಞತರಸ್ಮಿಂ ಆವಾಸೇ ತದಹುಪೋಸಥೇ ಸಮ್ಬಹುಲಾ ಆವಾಸಿಕಾ ಭಿಕ್ಖೂ ಸನ್ನಿಪತನ್ತಿ ಚತ್ತಾರೋ ವಾ ಅತಿರೇಕಾ ವಾ। ತೇ ಜಾನನ್ತಿ ‘‘ಅತ್ಥಞ್ಞೇ ಆವಾಸಿಕಾ ಭಿಕ್ಖೂ ಅನಾಗತಾ’’ತಿ। ತೇ ಧಮ್ಮಸಞ್ಞಿನೋ ವಿನಯಸಞ್ಞಿನೋ ವಗ್ಗಾ ವಗ್ಗಸಞ್ಞಿನೋ ಉಪೋಸಥಂ ಕರೋನ್ತಿ , ಪಾತಿಮೋಕ್ಖಂ ಉದ್ದಿಸನ್ತಿ। ತೇಹಿ ಉದ್ದಿಸ್ಸಮಾನೇ ಪಾತಿಮೋಕ್ಖೇ, ಅಥಞ್ಞೇ ಆವಾಸಿಕಾ ಭಿಕ್ಖೂ ಆಗಚ್ಛನ್ತಿ ಬಹುತರಾ। ತೇಹಿ, ಭಿಕ್ಖವೇ, ಭಿಕ್ಖೂಹಿ ಪುನ ಪಾತಿಮೋಕ್ಖಂ ಉದ್ದಿಸಿತಬ್ಬಂ। ಉದ್ದೇಸಕಾನಂ ಆಪತ್ತಿ ದುಕ್ಕಟಸ್ಸ।
173. Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino uposathaṃ karonti , pātimokkhaṃ uddisanti. Tehi uddissamāne pātimokkhe, athaññe āvāsikā bhikkhū āgacchanti bahutarā. Tehi, bhikkhave, bhikkhūhi puna pātimokkhaṃ uddisitabbaṃ. Uddesakānaṃ āpatti dukkaṭassa.
ಇಧ ಪನ, ಭಿಕ್ಖವೇ, ಅಞ್ಞತರಸ್ಮಿಂ ಆವಾಸೇ ತದಹುಪೋಸಥೇ ಸಮ್ಬಹುಲಾ ಆವಾಸಿಕಾ ಭಿಕ್ಖೂ ಸನ್ನಿಪತನ್ತಿ ಚತ್ತಾರೋ ವಾ ಅತಿರೇಕಾ ವಾ। ತೇ ಜಾನನ್ತಿ ಅತ್ಥಞ್ಞೇ ಆವಾಸಿಕಾ ಭಿಕ್ಖೂ ಅನಾಗತಾತಿ, ತೇ ಧಮ್ಮಸಞ್ಞಿನೋ ವಿನಯಸಞ್ಞಿನೋ ವಗ್ಗಾ ಸಮಗ್ಗಸಞ್ಞಿನೋ ಉಪೋಸಥಂ ಕರೋನ್ತಿ ಪಾತಿಮೋಕ್ಖಂ ಉದ್ದಿಸನ್ತಿ। ತೇಹಿ ಉದ್ದಿಸ್ಸಮಾನೇ ಪಾತಿಮೋಕ್ಖೇ, ಅಥಞ್ಞೇ ಆವಾಸಿಕಾ ಭಿಕ್ಖೂ ಆಗಚ್ಛನ್ತಿ ಸಮಸಮಾ । ಉದ್ದಿಟ್ಠಂ ಸುಉದ್ದಿಟ್ಠಂ, ಅವಸೇಸಂ ಸೋತಬ್ಬಂ। ಉದ್ದೇಸಕಾನಂ ಆಪತ್ತಿ ದುಕ್ಕಟಸ್ಸ।
Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti atthaññe āvāsikā bhikkhū anāgatāti, te dhammasaññino vinayasaññino vaggā samaggasaññino uposathaṃ karonti pātimokkhaṃ uddisanti. Tehi uddissamāne pātimokkhe, athaññe āvāsikā bhikkhū āgacchanti samasamā . Uddiṭṭhaṃ suuddiṭṭhaṃ, avasesaṃ sotabbaṃ. Uddesakānaṃ āpatti dukkaṭassa.
ಇಧ ಪನ, ಭಿಕ್ಖವೇ, ಅಞ್ಞತರಸ್ಮಿಂ ಆವಾಸೇ ತದಹುಪೋಸಥೇ ಸಮ್ಬಹುಲಾ ಆವಾಸಿಕಾ ಭಿಕ್ಖೂ ಸನ್ನಿಪತನ್ತಿ ಚತ್ತಾರೋ ವಾ ಅತಿರೇಕಾ ವಾ। ತೇ ಜಾನನ್ತಿ ಅತ್ಥಞ್ಞೇ ಆವಾಸಿಕಾ ಭಿಕ್ಖೂ ಅನಾಗತಾತಿ ತೇ ಧಮ್ಮಸಞ್ಞಿನೋ ವಿನಯಸಞ್ಞಿನೋ ವಗ್ಗಾ ವಗ್ಗಸಞ್ಞಿನೋ ಉಪೋಸಥಂ ಕರೋನ್ತಿ ಪಾತಿಮೋಕ್ಖಂ ಉದ್ದಿಸನ್ತಿ। ತೇಹಿ ಉದ್ದಿಸ್ಸಮಾನೇ ಪಾತಿಮೋಕ್ಖೇ, ಅಥಞ್ಞೇ ಆವಾಸಿಕಾ ಭಿಕ್ಖೂ ಆಗಚ್ಛನ್ತಿ ಥೋಕತರಾ। ಉದ್ದಿಟ್ಠಂ ಸುಉದ್ದಿಟ್ಠಂ, ಅವಸೇಸಂ ಸೋತಬ್ಬಂ। ಉದ್ದೇಸಕಾನಂ ಆಪತ್ತಿ ದುಕ್ಕಟಸ್ಸ।
Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti atthaññe āvāsikā bhikkhū anāgatāti te dhammasaññino vinayasaññino vaggā vaggasaññino uposathaṃ karonti pātimokkhaṃ uddisanti. Tehi uddissamāne pātimokkhe, athaññe āvāsikā bhikkhū āgacchanti thokatarā. Uddiṭṭhaṃ suuddiṭṭhaṃ, avasesaṃ sotabbaṃ. Uddesakānaṃ āpatti dukkaṭassa.
ಇಧ ಪನ, ಭಿಕ್ಖವೇ, ಅಞ್ಞತರಸ್ಮಿಂ ಆವಾಸೇ ತದಹುಪೋಸಥೇ ಸಮ್ಬಹುಲಾ ಆವಾಸಿಕಾ ಭಿಕ್ಖೂ ಸನ್ನಿಪತನ್ತಿ ಚತ್ತಾರೋ ವಾ ಅತಿರೇಕಾ ವಾ। ತೇ ಜಾನನ್ತಿ ‘‘ಅತ್ಥಞ್ಞೇ ಆವಾಸಿಕಾ ಭಿಕ್ಖೂ ಅನಾಗತಾ’’ತಿ। ತೇ ಧಮ್ಮಸಞ್ಞಿನೋ ವಿನಯಸಞ್ಞಿನೋ ವಗ್ಗಾ ವಗ್ಗಸಞ್ಞಿನೋ ಉಪೋಸಥಂ ಕರೋನ್ತಿ, ಪಾತಿಮೋಕ್ಖಂ ಉದ್ದಿಸನ್ತಿ। ತೇಹಿ ಉದ್ದಿಟ್ಠಮತ್ತೇ ಪಾತಿಮೋಕ್ಖೇ…ಪೇ॰… ಅವುಟ್ಠಿತಾಯ ಪರಿಸಾಯ…ಪೇ॰… ಏಕಚ್ಚಾಯ ವುಟ್ಠಿತಾಯ ಪರಿಸಾಯ…ಪೇ॰… ಸಬ್ಬಾಯ ವುಟ್ಠಿತಾಯ ಪರಿಸಾಯ ಅಥಞ್ಞೇ ಆವಾಸಿಕಾ ಭಿಕ್ಖೂ ಆಗಚ್ಛನ್ತಿ ಬಹುತರಾ…ಪೇ॰… ಸಮಸಮಾ…ಪೇ॰… ಥೋಕತರಾ। ಉದ್ದಿಟ್ಠಂ ಸುಉದ್ದಿಟ್ಠಂ, ತೇಸಂ ಸನ್ತಿಕೇ ಪಾರಿಸುದ್ಧಿ ಆರೋಚೇತಬ್ಬಾ। ಉದ್ದೇಸಕಾನಂ ಆಪತ್ತಿ ದುಕ್ಕಟಸ್ಸ।
Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti ‘‘atthaññe āvāsikā bhikkhū anāgatā’’ti. Te dhammasaññino vinayasaññino vaggā vaggasaññino uposathaṃ karonti, pātimokkhaṃ uddisanti. Tehi uddiṭṭhamatte pātimokkhe…pe… avuṭṭhitāya parisāya…pe… ekaccāya vuṭṭhitāya parisāya…pe… sabbāya vuṭṭhitāya parisāya athaññe āvāsikā bhikkhū āgacchanti bahutarā…pe… samasamā…pe… thokatarā. Uddiṭṭhaṃ suuddiṭṭhaṃ, tesaṃ santike pārisuddhi ārocetabbā. Uddesakānaṃ āpatti dukkaṭassa.
ವಗ್ಗಾವಗ್ಗಸಞ್ಞಿಪನ್ನರಸಕಂ ನಿಟ್ಠಿತಂ।
Vaggāvaggasaññipannarasakaṃ niṭṭhitaṃ.
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಅನಾಪತ್ತಿಪನ್ನರಸಕಾದಿಕಥಾ • Anāpattipannarasakādikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅನಾಪತ್ತಿಪನ್ನರಸಕಾದಿಕಥಾವಣ್ಣನಾ • Anāpattipannarasakādikathāvaṇṇanā
