| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๑๐. วฑฺฒีสุตฺตํ
10. Vaḍḍhīsuttaṃ
๓๑๓. ‘‘ปญฺจหิ, ภิกฺขเว, วฑฺฒีหิ วฑฺฒมานา อริยสาวิกา อริยาย วฑฺฒิยา วฑฺฒติ สาราทายินี จ โหติ วราทายินี จ กายสฺสฯ กตเมหิ ปญฺจหิ? สทฺธาย วฑฺฒติ, สีเลน วฑฺฒติ, สุเตน วฑฺฒติ, จาเคน วฑฺฒติ, ปญฺญาย วฑฺฒติ – อิเมหิ โข, ภิกฺขเว, ปญฺจหิ วฑฺฒีหิ วฑฺฒมานา อริยสาวิกา อริยาย วฑฺฒิยา วฑฺฒติ, สาราทายินี จ โหติ, วราทายินี จ กายสฺสา’’ติฯ
313. ‘‘Pañcahi, bhikkhave, vaḍḍhīhi vaḍḍhamānā ariyasāvikā ariyāya vaḍḍhiyā vaḍḍhati sārādāyinī ca hoti varādāyinī ca kāyassa. Katamehi pañcahi? Saddhāya vaḍḍhati, sīlena vaḍḍhati, sutena vaḍḍhati, cāgena vaḍḍhati, paññāya vaḍḍhati – imehi kho, bhikkhave, pañcahi vaḍḍhīhi vaḍḍhamānā ariyasāvikā ariyāya vaḍḍhiyā vaḍḍhati, sārādāyinī ca hoti, varādāyinī ca kāyassā’’ti.
‘‘สทฺธาย สีเลน จ ยาธ วฑฺฒติ,
‘‘Saddhāya sīlena ca yādha vaḍḍhati,
ปญฺญาย จาเคน สุเตน จูภยํ;
Paññāya cāgena sutena cūbhayaṃ;
สา ตาทิสี สีลวตี อุปาสิกา,
Sā tādisī sīlavatī upāsikā,
อาทียติ สารมิเธว อตฺตโน’’ติฯ ทสมํ;
Ādīyati sāramidheva attano’’ti. dasamaṃ;
พลวโคฺค ตติโยฯ
Balavaggo tatiyo.
ตสฺสุทฺทานํ –
Tassuddānaṃ –
วิสารทา ปสยฺห อภิภุยฺย, เอกํ อเงฺคน ปญฺจมํ;
Visāradā pasayha abhibhuyya, ekaṃ aṅgena pañcamaṃ;
นาเสนฺติ เหตุ ฐานญฺจ, วิสารโท วฑฺฒินา ทสาติฯ
Nāsenti hetu ṭhānañca, visārado vaḍḍhinā dasāti.
มาตุคามสํยุตฺตํ สมตฺตํฯ
Mātugāmasaṃyuttaṃ samattaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๒-๑๐. ปสยฺหสุตฺตาทิวณฺณนา • 2-10. Pasayhasuttādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๒-๑๐. ปสยฺหสุตฺตาทิวณฺณนา • 2-10. Pasayhasuttādivaṇṇanā
