| Library / Tipiṭaka / तिपिटक • Tipiṭaka / थेरगाथापाळि • Theragāthāpāḷi |
५. वड्ढत्थेरगाथा
5. Vaḍḍhattheragāthā
३३५.
335.
‘‘साधू हि किर मे माता, पतोदं उपदंसयि।
‘‘Sādhū hi kira me mātā, patodaṃ upadaṃsayi;
यस्साहं वचनं सुत्वा, अनुसिट्ठो जनेत्तिया।
Yassāhaṃ vacanaṃ sutvā, anusiṭṭho janettiyā;
आरद्धवीरियो पहितत्तो, पत्तो सम्बोधिमुत्तमं॥
Āraddhavīriyo pahitatto, patto sambodhimuttamaṃ.
३३६.
336.
‘‘अरहा दक्खिणेय्योम्हि, तेविज्जो अमतद्दसो।
‘‘Arahā dakkhiṇeyyomhi, tevijjo amataddaso;
जेत्वा नमुचिनो सेनं, विहरामि अनासवो॥
Jetvā namucino senaṃ, viharāmi anāsavo.
३३७.
337.
‘‘अज्झत्तञ्च बहिद्धा च, ये मे विज्जिंसु आसवा।
‘‘Ajjhattañca bahiddhā ca, ye me vijjiṃsu āsavā;
सब्बे असेसा उच्छिन्ना, न च उप्पज्जरे पुन॥
Sabbe asesā ucchinnā, na ca uppajjare puna.
३३८.
338.
‘‘विसारदा खो भगिनी, एतमत्थं अभासयि।
‘‘Visāradā kho bhaginī, etamatthaṃ abhāsayi;
‘अपिहा नून मयिपि, वनथो ते न विज्जति’॥
‘Apihā nūna mayipi, vanatho te na vijjati’.
३३९.
339.
‘‘परियन्तकतं दुक्खं, अन्तिमोयं समुस्सयो।
‘‘Pariyantakataṃ dukkhaṃ, antimoyaṃ samussayo;
जातिमरणसंसारो, नत्थि दानि पुनब्भवो’’ति॥
Jātimaraṇasaṃsāro, natthi dāni punabbhavo’’ti.
… वड्ढो थेरो…।
… Vaḍḍho thero….
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / थेरगाथा-अट्ठकथा • Theragāthā-aṭṭhakathā / ५. वड्ढत्थेरगाथावण्णना • 5. Vaḍḍhattheragāthāvaṇṇanā
