| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૧૦. વાદત્થિકસુત્તં
10. Vādatthikasuttaṃ
૧૧૧૦. ‘‘યો હિ કોચિ, ભિક્ખવે, ભિક્ખુ ‘ઇદં દુક્ખ’ન્તિ યથાભૂતં પજાનાતિ…પે॰… ‘અયં દુક્ખનિરોધગામિની પટિપદા’તિ યથાભૂતં પજાનાતિ, પુરત્થિમાય ચેપિ દિસાય આગચ્છેય્ય સમણો વા બ્રાહ્મણો વા વાદત્થિકો વાદગવેસી – ‘વાદમસ્સ આરોપેસ્સામી’તિ, તં વત સહધમ્મેન સઙ્કમ્પેસ્સતિ વા સમ્પકમ્પેસ્સતિ વા સમ્પચાલેસ્સતિ વાતિ – નેતં ઠાનં વિજ્જતિ. પચ્છિમાય ચેપિ દિસાય…પે॰… ઉત્તરાય ચેપિ દિસાય…પે॰… દક્ખિણાય ચેપિ દિસાય આગચ્છેય્ય સમણો વા બ્રાહ્મણો વા વાદત્થિકો વાદગવેસી – ‘વાદમસ્સ આરોપેસ્સામી’તિ, તં વત સહધમ્મેન સઙ્કમ્પેસ્સતિ વા સમ્પકમ્પેસ્સતિ વા સમ્પચાલેસ્સતિ વાતિ – નેતં ઠાનં વિજ્જતિ.
1110. ‘‘Yo hi koci, bhikkhave, bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti, puratthimāya cepi disāya āgaccheyya samaṇo vā brāhmaṇo vā vādatthiko vādagavesī – ‘vādamassa āropessāmī’ti, taṃ vata sahadhammena saṅkampessati vā sampakampessati vā sampacālessati vāti – netaṃ ṭhānaṃ vijjati. Pacchimāya cepi disāya…pe… uttarāya cepi disāya…pe… dakkhiṇāya cepi disāya āgaccheyya samaṇo vā brāhmaṇo vā vādatthiko vādagavesī – ‘vādamassa āropessāmī’ti, taṃ vata sahadhammena saṅkampessati vā sampakampessati vā sampacālessati vāti – netaṃ ṭhānaṃ vijjati.
‘‘સેય્યથાપિ, ભિક્ખવે, સિલાયૂપો સોળસ કુક્કુકો. તસ્સસ્સુ અટ્ઠ કુક્કુ હેટ્ઠા નેમઙ્ગમા, અટ્ઠ કુક્કુ ઉપરિનેમસ્સ. પુરત્થિમાય ચેપિ દિસાય આગચ્છેય્ય ભુસા વાતવુટ્ઠિ, નેવ સઙ્કમ્પેય્ય ન સમ્પકમ્પેય્ય ન સમ્પચાલેય્ય; પચ્છિમાય ચેપિ દિસાય…પે॰… ઉત્તરાય ચેપિ દિસાય…પે॰… દક્ખિણાય ચેપિ દિસાય આગચ્છેય્ય ભુસા વાતવુટ્ઠિ, નેવ સઙ્કમ્પેય્ય ન સમ્પકમ્પેય્ય ન સમ્પચાલેય્ય. તં કિસ્સ હેતુ? ગમ્ભીરત્તા, ભિક્ખવે, નેમસ્સ સુનિખાતત્તા સિલાયૂપસ્સ. એવમેવ ખો, ભિક્ખવે, યો હિ કોચિ ભિક્ખુ ‘ઇદં દુક્ખ’ન્તિ યથાભૂતં પજાનાતિ…પે॰… ‘અયં દુક્ખનિરોધગામિની પટિપદા’તિ યથાભૂતં પજાનાતિ; પુરત્થિમાય ચેપિ દિસાય આગચ્છેય્ય સમણો વા બ્રાહ્મણો વા વાદત્થિકો વાદગવેસી ‘વાદમસ્સ આરોપેસ્સામી’તિ, તં વત સહધમ્મેન સઙ્કમ્પેસ્સતિ વા સમ્પકમ્પેસ્સતિ વા સમ્પચાલેસ્સતિ વાતિ – નેતં ઠાનં વિજ્જતિ. પચ્છિમાય ચેપિ દિસાય…પે॰… ઉત્તરાય ચેપિ દિસાય…પે॰… દક્ખિણાય ચેપિ દિસાય આગચ્છેય્ય સમણો વા બ્રાહ્મણો વા વાદત્થિકો વાદગવેસી – ‘વાદમસ્સ આરોપેસ્સામી’તિ, તં વત સહધમ્મેન સઙ્કમ્પેસ્સતિ વા સમ્પકમ્પેસ્સતિ વા સમ્પચાલેસ્સતિ વાતિ – નેતં ઠાનં વિજ્જતિ. તં કિસ્સ હેતુ? સુદિટ્ઠત્તા, ભિક્ખવે, ચતુન્નં અરિયસચ્ચાનં. કતમેસં ચતુન્નં? દુક્ખસ્સ અરિયસચ્ચસ્સ…પે॰… દુક્ખનિરોધગામિનિયા પટિપદાય અરિયસચ્ચસ્સ.
‘‘Seyyathāpi, bhikkhave, silāyūpo soḷasa kukkuko. Tassassu aṭṭha kukku heṭṭhā nemaṅgamā, aṭṭha kukku uparinemassa. Puratthimāya cepi disāya āgaccheyya bhusā vātavuṭṭhi, neva saṅkampeyya na sampakampeyya na sampacāleyya; pacchimāya cepi disāya…pe… uttarāya cepi disāya…pe… dakkhiṇāya cepi disāya āgaccheyya bhusā vātavuṭṭhi, neva saṅkampeyya na sampakampeyya na sampacāleyya. Taṃ kissa hetu? Gambhīrattā, bhikkhave, nemassa sunikhātattā silāyūpassa. Evameva kho, bhikkhave, yo hi koci bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti; puratthimāya cepi disāya āgaccheyya samaṇo vā brāhmaṇo vā vādatthiko vādagavesī ‘vādamassa āropessāmī’ti, taṃ vata sahadhammena saṅkampessati vā sampakampessati vā sampacālessati vāti – netaṃ ṭhānaṃ vijjati. Pacchimāya cepi disāya…pe… uttarāya cepi disāya…pe… dakkhiṇāya cepi disāya āgaccheyya samaṇo vā brāhmaṇo vā vādatthiko vādagavesī – ‘vādamassa āropessāmī’ti, taṃ vata sahadhammena saṅkampessati vā sampakampessati vā sampacālessati vāti – netaṃ ṭhānaṃ vijjati. Taṃ kissa hetu? Sudiṭṭhattā, bhikkhave, catunnaṃ ariyasaccānaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.
‘‘તસ્માતિહ , ભિક્ખવે, ‘ઇદં દુક્ખ’ન્તિ યોગો કરણીયો…પે॰… ‘અયં દુક્ખનિરોધગામિની પટિપદા’તિ યોગો કરણીયો’’તિ. દસમં.
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dasamaṃ.
સીસપાવનવગ્ગો ચતુત્થો.
Sīsapāvanavaggo catuttho.
તસ્સુદ્દાનં –
Tassuddānaṃ –
સીસપા ખદિરો દણ્ડો, ચેલા સત્તિસતેન ચ;
Sīsapā khadiro daṇḍo, celā sattisatena ca;
પાણા સુરિયૂપમા દ્વેધા, ઇન્દખીલો ચ વાદિનોતિ.
Pāṇā suriyūpamā dvedhā, indakhīlo ca vādinoti.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧૦. વાદત્થિકસુત્તવણ્ણના • 10. Vādatthikasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧૦. વાદત્થિકસુત્તવણ્ણના • 10. Vādatthikasuttavaṇṇanā
