| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৭. ৰচ্ছগোত্তসুত্তৰণ্ণনা
7. Vacchagottasuttavaṇṇanā
৫৮. সত্তমে মহপ্ফলন্তি মহাৰিপাকং। ধম্মস্স চানুধম্মং ব্যাকরোন্তীতি এত্থ ধম্মো নাম কথিতকথা, অনুধম্মো নাম কথিতস্স পটিকথনং। সহধম্মিকোতি সকারণো সহেতুকো। ৰাদানুপাতোতি ৰাদস্স অনুপাতো, অনুপতনং পৰত্তীতি অত্থো। গারয্হং ঠানন্তি গরহিতব্বযুত্তং কারণং। ইদং ৰুত্তং হোতি – ভোতা গোতমেন ৰুত্তা সকারণা ৰাদপ্পৰত্তি কিঞ্চিপি গারয্হং কারণং ন আগচ্ছতীতি। অথ ৰা তেহি পরেহি ৰুত্তা সকারণা ৰাদপ্পৰত্তি কিঞ্চি গারয্হং কারণং ন আগচ্ছতীতি পুচ্ছতি।
58. Sattame mahapphalanti mahāvipākaṃ. Dhammassa cānudhammaṃ byākarontīti ettha dhammo nāma kathitakathā, anudhammo nāma kathitassa paṭikathanaṃ. Sahadhammikoti sakāraṇo sahetuko. Vādānupātoti vādassa anupāto, anupatanaṃ pavattīti attho. Gārayhaṃṭhānanti garahitabbayuttaṃ kāraṇaṃ. Idaṃ vuttaṃ hoti – bhotā gotamena vuttā sakāraṇā vādappavatti kiñcipi gārayhaṃ kāraṇaṃ na āgacchatīti. Atha vā tehi parehi vuttā sakāraṇā vādappavatti kiñci gārayhaṃ kāraṇaṃ na āgacchatīti pucchati.
অন্তরাযকরো হোতীতি অন্তরাযং ৰিনাসং কিচ্ছলাভকং ৰিলোমকং করোতি। পারিপন্থিকোতি পন্থদূহনচোরো। খতো চ হোতীতি গুণখননেন খতো হোতি। উপহতোতি গুণুপঘাতেনেৰ উপহতো।
Antarāyakarohotīti antarāyaṃ vināsaṃ kicchalābhakaṃ vilomakaṃ karoti. Pāripanthikoti panthadūhanacoro. Khato ca hotīti guṇakhananena khato hoti. Upahatoti guṇupaghāteneva upahato.
চন্দনিকাযাতি অসুচিকললকূপে। ওলিগল্লেতি নিদ্ধমনকললে। সো চাতি সো সীলৰাতি ৰুত্তখীণাসৰো। সীলক্খন্ধেনাতি সীলরাসিনা। সেসপদেসুপি এসেৰ নযো। এত্থ চ ৰিমুত্তিঞাণদস্সনং ৰুচ্চতি পচ্চৰেক্খণঞাণং, তং অসেক্খস্স পৰত্তত্তা অসেক্খন্তি ৰুত্তং। ইতরানি সিক্খাপরিযোসানপ্পত্ততায সযম্পি অসেক্খানেৰ। তানি চ পন লোকুত্তরানি, পচ্চৰেক্খণঞাণং লোকিযং।
Candanikāyāti asucikalalakūpe. Oligalleti niddhamanakalale. So cāti so sīlavāti vuttakhīṇāsavo. Sīlakkhandhenāti sīlarāsinā. Sesapadesupi eseva nayo. Ettha ca vimuttiñāṇadassanaṃ vuccati paccavekkhaṇañāṇaṃ, taṃ asekkhassa pavattattā asekkhanti vuttaṃ. Itarāni sikkhāpariyosānappattatāya sayampi asekkhāneva. Tāni ca pana lokuttarāni, paccavekkhaṇañāṇaṃ lokiyaṃ.
রোহিণীসূতি রত্তৰণ্ণাসু। সরূপাসূতি অত্তনো ৰচ্ছকেহি সমানরূপাসু। পারেৰতাসূতি কপোতৰণ্ণাসু। দন্তোতি নিব্বিসেৰনো। পুঙ্গৰোতি উসভো। ধোরয্হোতি ধুরৰাহো। কল্যাণজৰনিক্কমোতি কল্যাণেন উজুনা জৰেন গন্তা। নাস্স ৰণ্ণং পরিক্খরেতি অস্স গোণস্স সরীরৰণ্ণং ন উপপরিক্খন্তি, ধুরৰহনকম্মমেৰ পন উপপরিক্খন্তি। যস্মিং কস্মিঞ্চি জাতিযেতি যত্থ কত্থচি কুলজাতে। যাসু কাসুচি এতাসূতি এতাসু খত্তিযাদিপ্পভেদাসু যাসু কাসুচি জাতীসু।
Rohiṇīsūti rattavaṇṇāsu. Sarūpāsūti attano vacchakehi samānarūpāsu. Pārevatāsūti kapotavaṇṇāsu. Dantoti nibbisevano. Puṅgavoti usabho. Dhorayhoti dhuravāho. Kalyāṇajavanikkamoti kalyāṇena ujunā javena gantā. Nāssa vaṇṇaṃ parikkhareti assa goṇassa sarīravaṇṇaṃ na upaparikkhanti, dhuravahanakammameva pana upaparikkhanti. Yasmiṃ kasmiñci jātiyeti yattha katthaci kulajāte. Yāsu kāsuci etāsūti etāsu khattiyādippabhedāsu yāsu kāsuci jātīsu.
ব্রহ্মচরিযস্স কেৰলীতি ব্রহ্মচরিযস্স কেৰলেন সমন্নাগতো, পরিপুণ্ণভাৰেন যুত্তোতি অত্থো। খীণাসৰো হি সকলব্রহ্মচারী নাম হোতি। তেনেতং ৰুত্তং। পন্নভারোতি ওরোপিতভারো, খন্ধভারং কিলেসভারং কামগুণভারঞ্চ ওরোপেত্ৰা ঠিতোতি অত্থো। কতকিচ্চোতি চতূহি মগ্গেহি কিচ্চং কত্ৰা ঠিতো। পারগূ সব্বধম্মানন্তি সব্বধম্মা ৰুচ্চন্তি পঞ্চক্খন্ধা দ্ৰাদসাযতনানি অট্ঠারস ধাতুযো, তেসং সব্বধম্মানং অভিঞ্ঞাপারং, পরিঞ্ঞাপারং, পহানপারং, ভাৰনাপারং, সচ্ছিকিরিযাপারং, সমাপত্তিপারঞ্চাতি ছব্বিধং পারং গতত্তা পারগূ। অনুপাদাযাতি অগ্গহেত্ৰা। নিব্বুতোতি কিলেসসন্তাপরহিতো। ৰিরজেতি রাগদোসমোহরজরহিতে।
Brahmacariyassa kevalīti brahmacariyassa kevalena samannāgato, paripuṇṇabhāvena yuttoti attho. Khīṇāsavo hi sakalabrahmacārī nāma hoti. Tenetaṃ vuttaṃ. Pannabhāroti oropitabhāro, khandhabhāraṃ kilesabhāraṃ kāmaguṇabhārañca oropetvā ṭhitoti attho. Katakiccoti catūhi maggehi kiccaṃ katvā ṭhito. Pāragū sabbadhammānanti sabbadhammā vuccanti pañcakkhandhā dvādasāyatanāni aṭṭhārasa dhātuyo, tesaṃ sabbadhammānaṃ abhiññāpāraṃ, pariññāpāraṃ, pahānapāraṃ, bhāvanāpāraṃ, sacchikiriyāpāraṃ, samāpattipārañcāti chabbidhaṃ pāraṃ gatattā pāragū. Anupādāyāti aggahetvā. Nibbutoti kilesasantāparahito. Virajeti rāgadosamoharajarahite.
অৰিজানন্তাতি খেত্তং অজানন্তা। দুম্মেধাতি নিপ্পঞ্ঞা। অস্সুতাৰিনোতি খেত্তৰিনিচ্ছযসৰনেন রহিতা। বহিদ্ধাতি ইমম্হা সাসনা বহিদ্ধা। ন হি সন্তে উপাসরেতি বুদ্ধপচ্চেকবুদ্ধখীণাসৰে উত্তমপুরিসে ন উপসঙ্কমন্তি। ধীরসম্মতেতি পণ্ডিতেহি সম্মতে সম্ভাৰিতে। মূলজাতা পতিট্ঠিতাতি ইমিনা সোতাপন্নস্স সদ্ধং দস্সেতি। কুলে ৰা ইধ জাযরেতি ইধ ৰা মনুস্সলোকে খত্তিযব্রাহ্মণৰেস্সকুলে জাযন্তি। অযমেৰ হি তিৰিধা কুলসম্পত্তি নাম। অনুপুব্বেন নিব্বানং, অধিগচ্ছন্তীতি সীলসমাধিপঞ্ঞাতি ইমে গুণে পূরেত্ৰা অনুক্কমেন নিব্বানং অধিগচ্ছন্তীতি।
Avijānantāti khettaṃ ajānantā. Dummedhāti nippaññā. Assutāvinoti khettavinicchayasavanena rahitā. Bahiddhāti imamhā sāsanā bahiddhā. Na hi sante upāsareti buddhapaccekabuddhakhīṇāsave uttamapurise na upasaṅkamanti. Dhīrasammateti paṇḍitehi sammate sambhāvite. Mūlajātā patiṭṭhitāti iminā sotāpannassa saddhaṃ dasseti. Kule vā idha jāyareti idha vā manussaloke khattiyabrāhmaṇavessakule jāyanti. Ayameva hi tividhā kulasampatti nāma. Anupubbena nibbānaṃ, adhigacchantīti sīlasamādhipaññāti ime guṇe pūretvā anukkamena nibbānaṃ adhigacchantīti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৭. ৰচ্ছগোত্তসুত্তং • 7. Vacchagottasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৭. ৰচ্ছগোত্তসুত্তৰণ্ণনা • 7. Vacchagottasuttavaṇṇanā
