| Library / Tipiṭaka / តិបិដក • Tipiṭaka / ខុទ្ទសិក្ខា-មូលសិក្ខា • Khuddasikkhā-mūlasikkhā |
១៦. វច្ចប្បស្សាវដ្ឋានិកនិទ្ទេសវណ្ណនា
16. Vaccappassāvaṭṭhānikaniddesavaṇṇanā
១៥៦. យថាវុឌ្ឍំ ន ករេយ្យ វច្ចន្តិ សម្ពន្ធោ។ យថានុបុព្ពិយា លព្ភតីតិ សម្ពន្ធោ។ ឥមេសុ បន តីសុ ឋានេសុ យោ យោ បឋមំ អាគច្ឆតិ វុឌ្ឍោ វា នវោ វា, សោ សោ អាគតបដិបាដិយា កាតុញ្ច នហាយិតុញ្ច លព្ភតីតិ អធិប្បាយោ។
156. Yathāvuḍḍhaṃ na kareyya vaccanti sambandho. Yathānupubbiyā labbhatīti sambandho. Imesu pana tīsu ṭhānesu yo yo paṭhamaṃ āgacchati vuḍḍho vā navo vā, so so āgatapaṭipāṭiyā kātuñca nahāyituñca labbhatīti adhippāyo.
១៥៧. ឧព្ភជិត្វាតិ (ចូឡវ. ៣៧៣, ៣៧៤) និវាសនំ ទូរតោវ ឧក្ខិបិត្វា នោ បវិសេយ្យ។ សហសា ច នោ បវិសេយ្យាតិ សម្ពន្ធោ។ ‘‘ពហិ ឋិតេន ឧក្កាសិតព្ព’’ន្តិ ច ‘‘សាធុកំ អតរមានេន វច្ចកុដិ បវិសិតព្ពា’’តិ ច វុត្តត្តា ឧក្កាសិត្វាវ អតរមានោ បវិសេយ្យាតិ អត្ថោ។ ‘‘ន ឧព្ភជិត្វា បវិសិតព្ពា, វច្ចបាទុកាយ ឋិតេន ឧព្ភជិតព្ព’’ន្តិ (ចូឡវ. ៣៧៤) វចនតោ ‘‘ឧព្ភជេយ្យ បាទុកាស្វេវ សណ្ឋិតោ’’តិ វុត្តំ។
157.Ubbhajitvāti (cūḷava. 373, 374) nivāsanaṃ dūratova ukkhipitvā no paviseyya. Sahasā ca no paviseyyāti sambandho. ‘‘Bahi ṭhitena ukkāsitabba’’nti ca ‘‘sādhukaṃ ataramānena vaccakuṭi pavisitabbā’’ti ca vuttattā ukkāsitvāva ataramāno paviseyyāti attho. ‘‘Na ubbhajitvā pavisitabbā, vaccapādukāya ṭhitena ubbhajitabba’’nti (cūḷava. 374) vacanato ‘‘ubbhajeyya pādukāsveva saṇṭhito’’ti vuttaṃ.
១៥៨. ន ករេយ្យ ឧភយំ ន ករេយ្យុភយំ។
158. Na kareyya ubhayaṃ na kareyyubhayaṃ.
១៥៩. កូបេតិ (ចូឡវ. ៣៧៤) វច្ចកូបេ។ កដ្ឋន្តិ អវលេខនកដ្ឋំ។ បស្សាវទោណិយា ខេឡំ ន កាតព្ពន្តិ អត្ថោ។ នាវលេខេយ្យ ផរុសេនាតិ ផាលិតកដ្ឋេន វា ខរេន វា គណ្ឋិកេន វា កណ្ដកេន វា សុសិរេន វា បូតិនា វា នាវលេខិតព្ពន្តិ អត្ថោ។ ឧហតញ្ចាបីតិ គូថមក្ខិតម្បិ ធោវយេ អត្តនា វា បរេន វា កតន្តិ អធិប្បាយោ។
159.Kūpeti (cūḷava. 374) vaccakūpe. Kaṭṭhanti avalekhanakaṭṭhaṃ. Passāvadoṇiyā kheḷaṃ na kātabbanti attho. Nāvalekheyya pharusenāti phālitakaṭṭhena vā kharena vā gaṇṭhikena vā kaṇṭakena vā susirena vā pūtinā vā nāvalekhitabbanti attho. Uhatañcāpīti gūthamakkhitampi dhovaye attanā vā parena vā katanti adhippāyo.
១៦០. ឧព្ភជិត្វា ន និក្ខមេតិ ឯត្ថ ‘‘វច្ចបាទុកាយ ឋិតេន បដិច្ឆាទេតព្ព’’ន្តិ (ចូឡវ. ៣៧៤) ហិ វុត្តំ, បុន ‘‘អាចមនបាទុកាយំ ឋិតេន ឧព្ភជិតព្ព’’ន្តិ (ចូឡវ. ៣៧៤) ច វុត្តំ។ ‘‘ចបុ ចបូ’’តិ សទ្ទំ កត្វា នាចមេយ្យាតិ អត្ថោ។ វច្ចប្បស្សាវដ្ឋានិកវិនិច្ឆយោ។
160.Ubbhajitvā na nikkhameti ettha ‘‘vaccapādukāya ṭhitena paṭicchādetabba’’nti (cūḷava. 374) hi vuttaṃ, puna ‘‘ācamanapādukāyaṃ ṭhitena ubbhajitabba’’nti (cūḷava. 374) ca vuttaṃ. ‘‘Capu capū’’ti saddaṃ katvā nācameyyāti attho. Vaccappassāvaṭṭhānikavinicchayo.
វច្ចប្បស្សាវដ្ឋានិកនិទ្ទេសវណ្ណនា និដ្ឋិតា។
Vaccappassāvaṭṭhānikaniddesavaṇṇanā niṭṭhitā.
