| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
১৬. ৰচ্চপ্পস্সাৰট্ঠানিকনিদ্দেসৰণ্ণনা
16. Vaccappassāvaṭṭhānikaniddesavaṇṇanā
১৫৬. যথাৰুড্ঢং ন করেয্য ৰচ্চন্তি সম্বন্ধো। যথানুপুব্বিযা লব্ভতীতি সম্বন্ধো। ইমেসু পন তীসু ঠানেসু যো যো পঠমং আগচ্ছতি ৰুড্ঢো ৰা নৰো ৰা, সো সো আগতপটিপাটিযা কাতুঞ্চ নহাযিতুঞ্চ লব্ভতীতি অধিপ্পাযো।
156. Yathāvuḍḍhaṃ na kareyya vaccanti sambandho. Yathānupubbiyā labbhatīti sambandho. Imesu pana tīsu ṭhānesu yo yo paṭhamaṃ āgacchati vuḍḍho vā navo vā, so so āgatapaṭipāṭiyā kātuñca nahāyituñca labbhatīti adhippāyo.
১৫৭. উব্ভজিত্ৰাতি (চূল়ৰ॰ ৩৭৩, ৩৭৪) নিৰাসনং দূরতোৰ উক্খিপিত্ৰা নো পৰিসেয্য। সহসা চ নো পৰিসেয্যাতি সম্বন্ধো। ‘‘বহি ঠিতেন উক্কাসিতব্ব’’ন্তি চ ‘‘সাধুকং অতরমানেন ৰচ্চকুটি পৰিসিতব্বা’’তি চ ৰুত্তত্তা উক্কাসিত্ৰাৰ অতরমানো পৰিসেয্যাতি অত্থো। ‘‘ন উব্ভজিত্ৰা পৰিসিতব্বা, ৰচ্চপাদুকায ঠিতেন উব্ভজিতব্ব’’ন্তি (চূল়ৰ॰ ৩৭৪) ৰচনতো ‘‘উব্ভজেয্য পাদুকাস্ৰেৰ সণ্ঠিতো’’তি ৰুত্তং।
157.Ubbhajitvāti (cūḷava. 373, 374) nivāsanaṃ dūratova ukkhipitvā no paviseyya. Sahasā ca no paviseyyāti sambandho. ‘‘Bahi ṭhitena ukkāsitabba’’nti ca ‘‘sādhukaṃ ataramānena vaccakuṭi pavisitabbā’’ti ca vuttattā ukkāsitvāva ataramāno paviseyyāti attho. ‘‘Na ubbhajitvā pavisitabbā, vaccapādukāya ṭhitena ubbhajitabba’’nti (cūḷava. 374) vacanato ‘‘ubbhajeyya pādukāsveva saṇṭhito’’ti vuttaṃ.
১৫৮. ন করেয্য উভযং ন করেয্যুভযং।
158. Na kareyya ubhayaṃ na kareyyubhayaṃ.
১৫৯. কূপেতি (চূল়ৰ॰ ৩৭৪) ৰচ্চকূপে। কট্ঠন্তি অৰলেখনকট্ঠং। পস্সাৰদোণিযা খেল়ং ন কাতব্বন্তি অত্থো। নাৰলেখেয্য ফরুসেনাতি ফালিতকট্ঠেন ৰা খরেন ৰা গণ্ঠিকেন ৰা কণ্টকেন ৰা সুসিরেন ৰা পূতিনা ৰা নাৰলেখিতব্বন্তি অত্থো। উহতঞ্চাপীতি গূথমক্খিতম্পি ধোৰযে অত্তনা ৰা পরেন ৰা কতন্তি অধিপ্পাযো।
159.Kūpeti (cūḷava. 374) vaccakūpe. Kaṭṭhanti avalekhanakaṭṭhaṃ. Passāvadoṇiyā kheḷaṃ na kātabbanti attho. Nāvalekheyya pharusenāti phālitakaṭṭhena vā kharena vā gaṇṭhikena vā kaṇṭakena vā susirena vā pūtinā vā nāvalekhitabbanti attho. Uhatañcāpīti gūthamakkhitampi dhovaye attanā vā parena vā katanti adhippāyo.
১৬০. উব্ভজিত্ৰা ন নিক্খমেতি এত্থ ‘‘ৰচ্চপাদুকায ঠিতেন পটিচ্ছাদেতব্ব’’ন্তি (চূল়ৰ॰ ৩৭৪) হি ৰুত্তং, পুন ‘‘আচমনপাদুকাযং ঠিতেন উব্ভজিতব্ব’’ন্তি (চূল়ৰ॰ ৩৭৪) চ ৰুত্তং। ‘‘চপু চপূ’’তি সদ্দং কত্ৰা নাচমেয্যাতি অত্থো। ৰচ্চপ্পস্সাৰট্ঠানিকৰিনিচ্ছযো।
160.Ubbhajitvā na nikkhameti ettha ‘‘vaccapādukāya ṭhitena paṭicchādetabba’’nti (cūḷava. 374) hi vuttaṃ, puna ‘‘ācamanapādukāyaṃ ṭhitena ubbhajitabba’’nti (cūḷava. 374) ca vuttaṃ. ‘‘Capu capū’’ti saddaṃ katvā nācameyyāti attho. Vaccappassāvaṭṭhānikavinicchayo.
ৰচ্চপ্পস্সাৰট্ঠানিকনিদ্দেসৰণ্ণনা নিট্ঠিতা।
Vaccappassāvaṭṭhānikaniddesavaṇṇanā niṭṭhitā.
