| Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၁၆. ဝစ္စပသ္သာဝဋ္ဌာနိကနိဒ္ဒေသဝဏ္ဏနာ
16. Vaccapassāvaṭṭhānikaniddesavaṇṇanā
၁၅၆. ဝစ္စပသ္သာဝဋ္ဌာနိကန္တိ ဌာနမ္ဟိ ဌာနေ ဝာ ဘဝံ ဝစ္စပသ္သာဝဋ္ဌာနိကံ။ ယထာဝုဍ္ဎံ ဝစ္စံ န ကရေယ္ယာတိ သမ္ဗန္ဓော။ ယေ ယေ ဝုဍ္ဎာ ယထာဝုဍ္ဎံ, အာဂတပ္ပဋိပာဋိံ ဟိတ္ဝာ ဝုဍ္ဎပ္ပဋိပာဋိယာတိ အတ္ထော။ ဝစ္စန္တိ ဥပလက္ခဏမတ္တံ, ပသ္သာဝဉ္စ နဟာနဉ္စ န ကရေယ္ယာတိ အဓိပ္ပာယော။ တဒေဝ သမတ္ထေတိ ‘‘ယာတာနုပုဗ္ဗိယာ’’တိအာဒိနာ။ ယာတာနုပုဗ္ဗိယာတိ ယာတာနံ ဂတာနံ အနုပုဗ္ဗိ အနုက္ကမော ယာတာနုပုဗ္ဗိ, တာယ။ ဝစ္စ။ပေ.။ တိတ္ထဉ္စာတိ ဧတံ တယံ လဗ္ဘတီတိ အတ္ထော, ဘိက္ခုနာတိ ဝိညာယတိ။
156.Vaccapassāvaṭṭhānikanti ṭhānamhi ṭhāne vā bhavaṃ vaccapassāvaṭṭhānikaṃ. Yathāvuḍḍhaṃ vaccaṃ na kareyyāti sambandho. Ye ye vuḍḍhā yathāvuḍḍhaṃ, āgatappaṭipāṭiṃ hitvā vuḍḍhappaṭipāṭiyāti attho. Vaccanti upalakkhaṇamattaṃ, passāvañca nahānañca na kareyyāti adhippāyo. Tadeva samattheti ‘‘yātānupubbiyā’’tiādinā. Yātānupubbiyāti yātānaṃ gatānaṃ anupubbi anukkamo yātānupubbi, tāya. Vacca…pe… titthañcāti etaṃ tayaṃ labbhatīti attho, bhikkhunāti viññāyati.
၁၅၇. ဥဗ္ဘဇိတ္ဝာ စ သဟသာ စ နော ပဝိသေယ္ယာတိ သမ္ဗန္ဓော။ ဥဗ္ဘဇိတ္ဝာတိ စီဝရံ ဒူရတောဝ ဥက္ခိပိတ္ဝာ။ သဟသာတိ သီဃံ။ ဥက္ကာသိတ္ဝာ ပဝိသေယ္ယာတိ ယောဇနာ။
157. Ubbhajitvā ca sahasā ca no paviseyyāti sambandho. Ubbhajitvāti cīvaraṃ dūratova ukkhipitvā. Sahasāti sīghaṃ. Ukkāsitvā paviseyyāti yojanā.
၁၅၈. ဝစ္စပသ္သာဝဒောဏီနံ ဗဟီတိ သမ္ဗန္ဓော။ ဥဘယန္တိ ဝစ္စမ္ပိ ပသ္သာဝမ္ပိ။
158. Vaccapassāvadoṇīnaṃ bahīti sambandho. Ubhayanti vaccampi passāvampi.
၁၅၉. ကူပေတိ ဝစ္စာဝာဋေ။ ကဋ္ဌန္တိ အဝလေခနကဋ္ဌံ။ ဖရုသေနာတိ ခရေန အဝလေခနကဋ္ဌေန။ ဥဟတဉ္စာပီတိ အတ္တနာ ဝာ ပရေန ဝာ ဥဟတဉ္စာပိ ဝစ္စမက္ခိတဉ္စာပီတိ အတ္ထော။ ဓောဝယေတိ သတိ ဥဒကေ, ဥဒကေ အသတိ ကဋ္ဌေနပိ သောဓေယ္ယ။
159.Kūpeti vaccāvāṭe. Kaṭṭhanti avalekhanakaṭṭhaṃ. Pharusenāti kharena avalekhanakaṭṭhena. Uhatañcāpīti attanā vā parena vā uhatañcāpi vaccamakkhitañcāpīti attho. Dhovayeti sati udake, udake asati kaṭṭhenapi sodheyya.
၁၆၀. န နိက္ခမေတိ န နိက္ခမေယ္ယ။ စပု စပူတိ အနုကရဏံ, ဝိစ္ဆာယံ ဒ္ဝိတ္တေ စပု စပု ကတ္ဝာတိ ကိရိယာဝိသေသနံ။ နာစမေယ္ယာတိ န ဓောဝေယ္ယ။ သတိ ပန ဥဒကေ အာစမိတဗ္ဗံ, အသတိ ယေန ကေနစိ ပုဉ္ဆိတ္ဝာ ဂန္တဗ္ဗံ, သဗ္ဗသာဓာရဏဋ္ဌာနေ စ အာစမနကုမ္ဘိယာ ဥဒကံ န သေသေတဗ္ဗံ။ ဥက္လာပန္တိ ကစဝရံ။ ဝိသောဓယေတိ ဝိဟာရသောဓနေ ဝိယ ဝစ္စပသ္သာဝကုဋိယော, ပရိဝေဏကောဋ္ဌကေ စ သမ္မဇ္ဇေယ္ယ။ သဗ္ဗတ္ထေဝ စ ပန ဝတ္တဘေဒေ ဒုက္ကဋံ။
160.Na nikkhameti na nikkhameyya. Capu capūti anukaraṇaṃ, vicchāyaṃ dvitte capu capu katvāti kiriyāvisesanaṃ. Nācameyyāti na dhoveyya. Sati pana udake ācamitabbaṃ, asati yena kenaci puñchitvā gantabbaṃ, sabbasādhāraṇaṭṭhāne ca ācamanakumbhiyā udakaṃ na sesetabbaṃ. Uklāpanti kacavaraṃ. Visodhayeti vihārasodhane viya vaccapassāvakuṭiyo, pariveṇakoṭṭhake ca sammajjeyya. Sabbattheva ca pana vattabhede dukkaṭaṃ.
ဝစ္စပသ္သာဝဋ္ဌာနိကနိဒ္ဒေသဝဏ္ဏနာ နိဋ္ဌိတာ။
Vaccapassāvaṭṭhānikaniddesavaṇṇanā niṭṭhitā.
