| Library / Tipiṭaka / තිපිටක • Tipiṭaka / කඞ්ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
8. උය්යුත්තසෙනාසික්ඛාපදවණ්ණනා
8. Uyyuttasenāsikkhāpadavaṇṇanā
චතුරඞ්ගිනින්ති හත්ථිඅස්සරථපත්තීති චත්තාරි අඞ්ගානි එතිස්සාති චතුරඞ්ගිනී, තං චතුරඞ්ගිනිං. ‘‘ද්වාදසපුරිසො හත්ථී, තිපුරිසො අස්සො, චතුපුරිසො රථො, චත්තාරො පුරිසා සරහත්ථා පත්තී’’ති (පාචි. 314) අයං පච්ඡිමකොටියා චතුරඞ්ගසමන්නාගතා සෙනා නාම, ඊදිසං සෙනන්ති අත්ථො. තං පන විජහිත්වාති කෙනචි අන්තරිතා වා නින්නං ඔරුළ්හා වා න දිස්සති, ඉධ ඨත්වාන සක්කා දට්ඨුන්ති තං දස්සනූපචාරං විජහිත්වා අඤ්ඤං ඨානං ගන්ත්වා.
Caturaṅgininti hatthiassarathapattīti cattāri aṅgāni etissāti caturaṅginī, taṃ caturaṅginiṃ. ‘‘Dvādasapuriso hatthī, tipuriso asso, catupuriso ratho, cattāro purisā sarahatthā pattī’’ti (pāci. 314) ayaṃ pacchimakoṭiyā caturaṅgasamannāgatā senā nāma, īdisaṃ senanti attho. Taṃ pana vijahitvāti kenaci antaritā vā ninnaṃ oruḷhā vā na dissati, idha ṭhatvāna sakkā daṭṭhunti taṃ dassanūpacāraṃ vijahitvā aññaṃ ṭhānaṃ gantvā.
සෙනාදස්සනවත්ථුස්මින්ති සෙනං දස්සනාය ගමනවත්ථුස්මිං. අයමෙව වා පාඨො. හත්ථිආදීසු එකමෙකන්ති හත්ථිආදීසු චතූසු අඞ්ගෙසු එකමෙකං, අන්තමසො එකපුරිසාරුළ්හහත්ථිම්පි එකම්පි සරහත්ථං පුරිසන්ති අත්ථො. අනුය්යුත්තා නාම රාජා උය්යානං වා නදිං වා ගච්ඡති, එවං අනුය්යුත්තා හොති. තථාරූපප්පච්චයෙති ‘‘මාතුලො සෙනාය ගිලානො හොතී’’තිආදිකෙ (පාචි. 312) අනුරූපකාරණෙ සති. ආපදාසූති ජීවිතබ්රහ්මචරියන්තරායෙසු ‘‘එත්ථ ගතො මුච්චිස්සාමී’’ති ගච්ඡතො අනාපත්ති.
Senādassanavatthusminti senaṃ dassanāya gamanavatthusmiṃ. Ayameva vā pāṭho. Hatthiādīsu ekamekanti hatthiādīsu catūsu aṅgesu ekamekaṃ, antamaso ekapurisāruḷhahatthimpi ekampi sarahatthaṃ purisanti attho. Anuyyuttā nāma rājā uyyānaṃ vā nadiṃ vā gacchati, evaṃ anuyyuttā hoti. Tathārūpappaccayeti ‘‘mātulo senāya gilāno hotī’’tiādike (pāci. 312) anurūpakāraṇe sati. Āpadāsūti jīvitabrahmacariyantarāyesu ‘‘ettha gato muccissāmī’’ti gacchato anāpatti.
උය්යුත්තසෙනාසික්ඛාපදවණ්ණනා නිට්ඨිතා.
Uyyuttasenāsikkhāpadavaṇṇanā niṭṭhitā.
