| Library / Tipiṭaka / तिपिटक • Tipiṭaka / महाविभङ्ग-अट्ठकथा • Mahāvibhaṅga-aṭṭhakathā |
८. उय्युत्तसेनासिक्खापदवण्णना
8. Uyyuttasenāsikkhāpadavaṇṇanā
३११. अट्ठमे – अब्भुय्यातोति अभिउय्यातो; परसेनं अभिमुखो गमिस्सामीति नगरतो निग्गतोति अत्थो। उय्युत्तन्ति कतउय्योगं; गामतो निक्खन्तन्ति अत्थो।
311. Aṭṭhame – abbhuyyātoti abhiuyyāto; parasenaṃ abhimukho gamissāmīti nagarato niggatoti attho. Uyyuttanti katauyyogaṃ; gāmato nikkhantanti attho.
३१४. द्वादसपुरिसो हत्थीति चत्तारो आरोहका एकेकपादरक्खका द्वे द्वेति एवं द्वादसपुरिसो होति। तिपुरिसो अस्सोति एको आरोहको द्वे पादरक्खकाति एवं तिपुरिसो होति। चतुपुरिसो रथोति एको सारथि एको योधो द्वे आणिरक्खकाति एवं चतुपुरिसो होति। चत्तारो पुरिसा सरहत्थाति आवुधहत्था चत्तारो पुरिसाति अयं पच्छिमकोटिया चतुरङ्गसमन्नागता सेना नाम। ईदिसं सेनं दस्सनाय गच्छतो पदे पदे दुक्कटं। दस्सनूपचारं विजहित्वाति केनचि अन्तरिता वा निन्नं ओरुळ्हा वा न दिस्सति; इध ठत्वा न सक्का दट्ठुन्ति अञ्ञं ठानं गन्त्वा पस्सतो पयोगे पयोगे पाचित्तियन्ति अत्थो।
314.Dvādasapuriso hatthīti cattāro ārohakā ekekapādarakkhakā dve dveti evaṃ dvādasapuriso hoti. Tipuriso assoti eko ārohako dve pādarakkhakāti evaṃ tipuriso hoti. Catupuriso rathoti eko sārathi eko yodho dve āṇirakkhakāti evaṃ catupuriso hoti. Cattāro purisā sarahatthāti āvudhahatthā cattāro purisāti ayaṃ pacchimakoṭiyā caturaṅgasamannāgatā senā nāma. Īdisaṃ senaṃ dassanāya gacchato pade pade dukkaṭaṃ. Dassanūpacāraṃ vijahitvāti kenaci antaritā vā ninnaṃ oruḷhā vā na dissati; idha ṭhatvā na sakkā daṭṭhunti aññaṃ ṭhānaṃ gantvā passato payoge payoge pācittiyanti attho.
३१५. एकमेकन्ति हत्थिआदीसु चतूसु अङ्गेसु एकमेकं; अन्तमसो एकपुरिसारुळ्हकहत्थिम्पि एकम्पि सरहत्थं पुरिसं। अनुय्युत्ता नाम राजा उय्यानं वा नदिं वा गच्छति; एवं अनुय्युत्ता होति।
315.Ekamekanti hatthiādīsu catūsu aṅgesu ekamekaṃ; antamaso ekapurisāruḷhakahatthimpi ekampi sarahatthaṃ purisaṃ. Anuyyuttā nāma rājā uyyānaṃ vā nadiṃ vā gacchati; evaṃ anuyyuttā hoti.
३१६. आपदासूति जीवितब्रह्मचरियन्तरायेसु सति एत्थ गतो मुञ्चिस्सामीति गच्छतो अनापत्ति। सेसमेत्थ उत्तानमेव। एळकलोमसमुट्ठानं – किरियं, नोसञ्ञाविमोक्खं, अचित्तकं, लोकवज्जं, कायकम्मं, अकुसलचित्तं, तिवेदनन्ति।
316.Āpadāsūti jīvitabrahmacariyantarāyesu sati ettha gato muñcissāmīti gacchato anāpatti. Sesamettha uttānameva. Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, lokavajjaṃ, kāyakammaṃ, akusalacittaṃ, tivedananti.
उय्युत्तसेनासिक्खापदं अट्ठमं।
Uyyuttasenāsikkhāpadaṃ aṭṭhamaṃ.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / ५. अचेलकवग्गो • 5. Acelakavaggo
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / ८. उय्युत्तसेनासिक्खापदवण्णना • 8. Uyyuttasenāsikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / ८. उय्युत्तसेनासिक्खापदवण्णना • 8. Uyyuttasenāsikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / ८. उय्युत्तसेनासिक्खापदवण्णना • 8. Uyyuttasenāsikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / ८. उय्युत्तसेनासिक्खापदं • 8. Uyyuttasenāsikkhāpadaṃ
