| Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
8. உய்யுத்தஸேனாஸிக்கா²பத³வண்ணனா
8. Uyyuttasenāsikkhāpadavaṇṇanā
சதுரங்கி³னிந்தி ஹத்தி²அஸ்ஸரத²பத்தீதி சத்தாரி அங்கா³னி ஏதிஸ்ஸாதி சதுரங்கி³னீ, தங் சதுரங்கி³னிங். ‘‘த்³வாத³ஸபுரிஸோ ஹத்தீ², திபுரிஸோ அஸ்ஸோ, சதுபுரிஸோ ரதோ², சத்தாரோ புரிஸா ஸரஹத்தா² பத்தீ’’தி (பாசி॰ 314) அயங் பச்சி²மகோடியா சதுரங்க³ஸமன்னாக³தா ஸேனா நாம, ஈதி³ஸங் ஸேனந்தி அத்தோ². தங் பன விஜஹித்வாதி கேனசி அந்தரிதா வா நின்னங் ஓருள்ஹா வா ந தி³ஸ்ஸதி, இத⁴ ட²த்வான ஸக்கா த³ட்டு²ந்தி தங் த³ஸ்ஸனூபசாரங் விஜஹித்வா அஞ்ஞங் டா²னங் க³ந்த்வா.
Caturaṅgininti hatthiassarathapattīti cattāri aṅgāni etissāti caturaṅginī, taṃ caturaṅginiṃ. ‘‘Dvādasapuriso hatthī, tipuriso asso, catupuriso ratho, cattāro purisā sarahatthā pattī’’ti (pāci. 314) ayaṃ pacchimakoṭiyā caturaṅgasamannāgatā senā nāma, īdisaṃ senanti attho. Taṃ pana vijahitvāti kenaci antaritā vā ninnaṃ oruḷhā vā na dissati, idha ṭhatvāna sakkā daṭṭhunti taṃ dassanūpacāraṃ vijahitvā aññaṃ ṭhānaṃ gantvā.
ஸேனாத³ஸ்ஸனவத்து²ஸ்மிந்தி ஸேனங் த³ஸ்ஸனாய க³மனவத்து²ஸ்மிங். அயமேவ வா பாடோ². ஹத்தி²ஆதீ³ஸு ஏகமேகந்தி ஹத்தி²ஆதீ³ஸு சதூஸு அங்கே³ஸு ஏகமேகங், அந்தமஸோ ஏகபுரிஸாருள்ஹஹத்தி²ம்பி ஏகம்பி ஸரஹத்த²ங் புரிஸந்தி அத்தோ². அனுய்யுத்தா நாம ராஜா உய்யானங் வா நதி³ங் வா க³ச்ச²தி, ஏவங் அனுய்யுத்தா ஹோதி. ததா²ரூபப்பச்சயேதி ‘‘மாதுலோ ஸேனாய கி³லானோ ஹோதீ’’திஆதி³கே (பாசி॰ 312) அனுரூபகாரணே ஸதி. ஆபதா³ஸூதி ஜீவிதப்³ரஹ்மசரியந்தராயேஸு ‘‘எத்த² க³தோ முச்சிஸ்ஸாமீ’’தி க³ச்ச²தோ அனாபத்தி.
Senādassanavatthusminti senaṃ dassanāya gamanavatthusmiṃ. Ayameva vā pāṭho. Hatthiādīsu ekamekanti hatthiādīsu catūsu aṅgesu ekamekaṃ, antamaso ekapurisāruḷhahatthimpi ekampi sarahatthaṃ purisanti attho. Anuyyuttā nāma rājā uyyānaṃ vā nadiṃ vā gacchati, evaṃ anuyyuttā hoti. Tathārūpappaccayeti ‘‘mātulo senāya gilāno hotī’’tiādike (pāci. 312) anurūpakāraṇe sati. Āpadāsūti jīvitabrahmacariyantarāyesu ‘‘ettha gato muccissāmī’’ti gacchato anāpatti.
உய்யுத்தஸேனாஸிக்கா²பத³வண்ணனா நிட்டி²தா.
Uyyuttasenāsikkhāpadavaṇṇanā niṭṭhitā.
