| Library / Tipiṭaka / ཏིཔིཊཀ • Tipiṭaka / ཐེརཱིགཱཐཱ-ཨཊྛཀཐཱ • Therīgāthā-aṭṭhakathā |
༡༥. ཨུཏྟརཱཐེརཱིགཱཐཱཝཎྞནཱ
15. Uttarātherīgāthāvaṇṇanā
ཀཱཡེན སཾཝུཏཱ ཨཱསིནྟི ཨུཏྟརཱཡ ཐེརིཡཱ གཱཐཱ། ཏསྶཱཔི ཝཏྠུ ཏིསྶཱཐེརིཡཱ ཝཏྠུསདིསཾ། སཱཔི ཧི སཀྱཀུལཔྤསུཏཱ བོདྷིསཏྟསྶ ཨོརོདྷབྷཱུཏཱ མཧཱཔཛཱཔཏིགོཏམིཡཱ སདྡྷིཾ ནིཀྑནྟཱ ཨོབྷཱསགཱཐཱཡ ཨརཧཏྟཾ པཏྭཱ པན –
Kāyena saṃvutā āsinti uttarāya theriyā gāthā. Tassāpi vatthu tissātheriyā vatthusadisaṃ. Sāpi hi sakyakulappasutā bodhisattassa orodhabhūtā mahāpajāpatigotamiyā saddhiṃ nikkhantā obhāsagāthāya arahattaṃ patvā pana –
༡༥.
15.
‘‘ཀཱཡེན སཾཝུཏཱ ཨཱསིཾ, ཝཱཙཱཡ ཨུད ཙེཏསཱ།
‘‘Kāyena saṃvutā āsiṃ, vācāya uda cetasā;
སམཱུལཾ ཏཎྷམབྦུཡ྄ཧ, སཱིཏིབྷཱུཏཱམྷི ནིབྦུཏཱ’’ཏི༎ –
Samūlaṃ taṇhamabbuyha, sītibhūtāmhi nibbutā’’ti. –
ཨུདཱནཝསེན ཏམེཝ གཱཐཾ ཨབྷཱསི།
Udānavasena tameva gāthaṃ abhāsi.
ཏཏྠ ཀཱཡེན སཾཝུཏཱ ཨཱསིནྟི ཀཱཡིཀེན སཾཝརེན སཾཝུཏཱ ཨཧོསིཾ། ཝཱཙཱཡཱཏི ཝཱཙསིཀེན སཾཝརེན སཾཝུཏཱ ཨཱསིནྟི ཡོཛནཱ, པདདྭཡེནཱཔི སཱིལསཾཝརམཱཧ། ཨུདཱཏི ཨཐ། ཙེཏསཱཏི སམཱདྷིཙིཏྟེན, ཨེཏེན ཝིཔསྶནཱབྷཱཝནམཱཧ། སམཱུལཾ ཏཎྷམབྦུཡ྄ཧཱཏི སཱནུསཡཾ, སཧ ཝཱ ཨཝིཛྫཱཡ ཏཎྷཾ ཨུདྡྷརིཏྭཱ། ཨཝིཛྫཱཡ ཧི པཊིཙྪཱདིཏཱདཱིནཝེ བྷཝཏྟཡེ ཏཎྷཱ ཨུཔྤཛྫཏི།
Tattha kāyena saṃvutā āsinti kāyikena saṃvarena saṃvutā ahosiṃ. Vācāyāti vācasikena saṃvarena saṃvutā āsinti yojanā, padadvayenāpi sīlasaṃvaramāha. Udāti atha. Cetasāti samādhicittena, etena vipassanābhāvanamāha. Samūlaṃ taṇhamabbuyhāti sānusayaṃ, saha vā avijjāya taṇhaṃ uddharitvā. Avijjāya hi paṭicchāditādīnave bhavattaye taṇhā uppajjati.
ཨཔརོ ནཡོ – ཀཱཡེན སཾཝུཏཱཏི སམྨཱཀམྨནྟེན སབྦསོ མིཙྪཱཀམྨནྟསྶ པཧཱནཱ མགྒསཾཝརེནེཝ ཀཱཡེན སཾཝུཏཱ ཨཱསིཾ། ཝཱཙཱཡཱཏི སམྨཱཝཱཙཱཡ སབྦསོ མིཙྪཱཝཱཙཱཡ པཧཱནཱ མགྒསཾཝརེནེཝ ཝཱཙཱཡ སཾཝུཏཱ ཨཱསིནྟི ཨཏྠོ། ཙེཏསཱཏི སམཱདྷིནཱ། ཙེཏོསཱིསེན ཧེཏྠ སམྨཱསམཱདྷི ཝུཏྟོ, སམྨཱསམཱདྷིགྒཧཎེནེཝ མགྒལཀྑཎེན ཨེཀལཀྑཎཱ སམྨཱདིཊྛིཨཱདཡོ མགྒདྷམྨཱ གཧིཏཱཝ ཧོནྟཱིཏི, མགྒསཾཝརེན ཨབྷིཛ྄ཛྷཱདིཀསྶ ཨསཾཝརསྶ ཨནཝསེསཏོ པཧཱནཾ དསྶིཏཾ ཧོཏི། ཏེནེཝཱཧ ‘‘སམཱུལཾ ཏཎྷམབྦུཡ྄ཧཱ’’ཏི། སཱིཏིབྷཱུཏཱམྷི ནིབྦུཏཱཏི སབྦསོ ཀིལེསཔརིལཱ༹ཧཱབྷཱཝེན སཱིཏིབྷཱཝཔྤཏྟཱ ཨནུཔཱདིསེསཱཡ ནིབྦཱནདྷཱཏུཡཱ ནིབྦུཏཱ ཨམྷཱིཏི།
Aparo nayo – kāyena saṃvutāti sammākammantena sabbaso micchākammantassa pahānā maggasaṃvareneva kāyena saṃvutā āsiṃ. Vācāyāti sammāvācāya sabbaso micchāvācāya pahānā maggasaṃvareneva vācāya saṃvutā āsinti attho. Cetasāti samādhinā. Cetosīsena hettha sammāsamādhi vutto, sammāsamādhiggahaṇeneva maggalakkhaṇena ekalakkhaṇā sammādiṭṭhiādayo maggadhammā gahitāva hontīti, maggasaṃvarena abhijjhādikassa asaṃvarassa anavasesato pahānaṃ dassitaṃ hoti. Tenevāha ‘‘samūlaṃ taṇhamabbuyhā’’ti. Sītibhūtāmhi nibbutāti sabbaso kilesapariḷāhābhāvena sītibhāvappattā anupādisesāya nibbānadhātuyā nibbutā amhīti.
ཨུཏྟརཱཐེརཱིགཱཐཱཝཎྞནཱ ནིཊྛིཏཱ།
Uttarātherīgāthāvaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཐེརཱིགཱཐཱཔཱལི༹ • Therīgāthāpāḷi / ༡༥. ཨུཏྟརཱཐེརཱིགཱཐཱ • 15. Uttarātherīgāthā
