| Library / Tipiṭaka / તિપિટક • Tipiṭaka / થેરીગાથાપાળિ • Therīgāthāpāḷi |
૭. સત્તકનિપાતો
7. Sattakanipāto
૧. ઉત્તરાથેરીગાથા
1. Uttarātherīgāthā
૧૭૫.
175.
‘‘‘મુસલાનિ ગહેત્વાન, ધઞ્ઞં કોટ્ટેન્તિ માણવા;
‘‘‘Musalāni gahetvāna, dhaññaṃ koṭṭenti māṇavā;
પુત્તદારાનિ પોસેન્તા, ધનં વિન્દન્તિ માણવા.
Puttadārāni posentā, dhanaṃ vindanti māṇavā.
૧૭૬.
176.
‘‘‘ઘટેથ બુદ્ધસાસને, યં કત્વા નાનુતપ્પતિ;
‘‘‘Ghaṭetha buddhasāsane, yaṃ katvā nānutappati;
ખિપ્પં પાદાનિ ધોવિત્વા, એકમન્તં નિસીદથ.
Khippaṃ pādāni dhovitvā, ekamantaṃ nisīdatha.
૧૭૭.
177.
‘‘‘ચિત્તં ઉપટ્ઠપેત્વાન, એકગ્ગં સુસમાહિતં;
‘‘‘Cittaṃ upaṭṭhapetvāna, ekaggaṃ susamāhitaṃ;
પચ્ચવેક્ખથ સઙ્ખારે, પરતો નો ચ અત્તતો’.
Paccavekkhatha saṅkhāre, parato no ca attato’.
૧૭૮.
178.
‘‘તસ્સાહં વચનં સુત્વા, પટાચારાનુસાસનિં;
‘‘Tassāhaṃ vacanaṃ sutvā, paṭācārānusāsaniṃ;
પાદે પક્ખાલયિત્વાન, એકમન્તે ઉપાવિસિં.
Pāde pakkhālayitvāna, ekamante upāvisiṃ.
૧૭૯.
179.
‘‘રત્તિયા પુરિમે યામે, પુબ્બજાતિમનુસ્સરિં;
‘‘Rattiyā purime yāme, pubbajātimanussariṃ;
રત્તિયા મજ્ઝિમે યામે, દિબ્બચક્ખું વિસોધયિં.
Rattiyā majjhime yāme, dibbacakkhuṃ visodhayiṃ.
૧૮૦.
180.
‘‘રત્તિયા પચ્છિમે યામે, તમોક્ખન્ધં પદાલયિં;
‘‘Rattiyā pacchime yāme, tamokkhandhaṃ padālayiṃ;
તેવિજ્જા અથ વુટ્ઠાસિં, કતા તે અનુસાસની.
Tevijjā atha vuṭṭhāsiṃ, katā te anusāsanī.
૧૮૧.
181.
‘‘સક્કંવ દેવા તિદસા, સઙ્ગામે અપરાજિતં;
‘‘Sakkaṃva devā tidasā, saṅgāme aparājitaṃ;
પુરક્ખત્વા વિહસ્સામિ, તેવિજ્જામ્હિ અનાસવા’’.
Purakkhatvā vihassāmi, tevijjāmhi anāsavā’’.
… ઉત્તરા થેરી….
… Uttarā therī….
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / ખુદ્દકનિકાય (અટ્ઠકથા) • Khuddakanikāya (aṭṭhakathā) / થેરીગાથા-અટ્ઠકથા • Therīgāthā-aṭṭhakathā / ૧. ઉત્તરાથેરીગાથાવણ્ણના • 1. Uttarātherīgāthāvaṇṇanā
