| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၈. ဥပ္ပထသုတ္တဝဏ္ဏနာ
8. Uppathasuttavaṇṇanā
၅၈. အဋ္ဌမေ ရာဂော ဥပ္ပထောတိ သုဂတိဉ္စ နိဗ္ဗာနဉ္စ ဂစ္ဆန္တသ္သ အမဂ္ဂော။ ရတ္တိန္ဒိဝက္ခယောတိ ရတ္တိဒိဝေဟိ, ရတ္တိဒိဝေသု ဝာ ခီယတိ။ ဣတ္ထီ မလန္တိ သေသံ ဗာဟိရမလံ ဘသ္မခာရာဒီဟိ ဓောဝိတ္ဝာ သက္ကာ သောဓေတုံ, မာတုဂာမမလေန ဒုဋ္ဌော ပန န သက္ကာ သုဒ္ဓော နာမ ကာတုန္တိ ဣတ္ထီ ‘‘မလ’’န္တိ ဝုတ္တာ။ ဧတ္ထာတိ ဧတ္ထ ဣတ္ထိယံ ပဇာ သဇ္ဇတိ။ တပောတိ ဣန္ဒ္ရိယသံဝရဓုတင္ဂဂုဏဝီရိယဒုက္ကရကာရိကာနံ နာမံ, ဣဓ ပန ဌပေတ္ဝာ ဒုက္ကရကာရိကံ သဗ္ဗာပိ ကိလေသသန္တာပိကာ ပဋိပဒာ ဝဋ္ဋတိ။ ဗ္ရဟ္မစရိယန္တိ မေထုနဝိရတိ။ အဋ္ဌမံ။
58. Aṭṭhame rāgo uppathoti sugatiñca nibbānañca gacchantassa amaggo. Rattindivakkhayoti rattidivehi, rattidivesu vā khīyati. Itthī malanti sesaṃ bāhiramalaṃ bhasmakhārādīhi dhovitvā sakkā sodhetuṃ, mātugāmamalena duṭṭho pana na sakkā suddho nāma kātunti itthī ‘‘mala’’nti vuttā. Etthāti ettha itthiyaṃ pajā sajjati. Tapoti indriyasaṃvaradhutaṅgaguṇavīriyadukkarakārikānaṃ nāmaṃ, idha pana ṭhapetvā dukkarakārikaṃ sabbāpi kilesasantāpikā paṭipadā vaṭṭati. Brahmacariyanti methunavirati. Aṭṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. ဥပ္ပထသုတ္တံ • 8. Uppathasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၈. ဥပ္ပထသုတ္တဝဏ္ဏနာ • 8. Uppathasuttavaṇṇanā
