| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
९. उप्पज्जतिजाननपञ्हो
9. Uppajjatijānanapañho
९. राजा आह ‘‘भन्ते नागसेन, यो उप्पज्जति, जानाति सो ‘उप्पज्जिस्सामी’’’ति? ‘‘आम, महाराज, यो उप्पज्जति जानाति सो ‘उप्पज्जिस्सामी’’’ति। ‘‘ओपम्मं करोही’’ति। ‘‘यथा, महाराज, कस्सको गहपतिको बीजानि पथवियं निक्खिपित्वा सम्मा देवे वस्सन्ते जानाति ‘धञ्ञं निब्बत्तिस्सती’’’ति? ‘‘आम, भन्ते, जानेय्या’’ति। ‘‘एवमेव खो, महाराज, यो उप्पज्जति, जानाति सो ‘उप्पज्जिस्सामी’’’ति।
9. Rājā āha ‘‘bhante nāgasena, yo uppajjati, jānāti so ‘uppajjissāmī’’’ti? ‘‘Āma, mahārāja, yo uppajjati jānāti so ‘uppajjissāmī’’’ti. ‘‘Opammaṃ karohī’’ti. ‘‘Yathā, mahārāja, kassako gahapatiko bījāni pathaviyaṃ nikkhipitvā sammā deve vassante jānāti ‘dhaññaṃ nibbattissatī’’’ti? ‘‘Āma, bhante, jāneyyā’’ti. ‘‘Evameva kho, mahārāja, yo uppajjati, jānāti so ‘uppajjissāmī’’’ti.
‘‘कल्लोसि, भन्ते नागसेना’’ति।
‘‘Kallosi, bhante nāgasenā’’ti.
उप्पज्जतिजाननपञ्हो नवमो।
Uppajjatijānanapañho navamo.
