| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. উপট্ঠানসুত্তৰণ্ণনা
2. Upaṭṭhānasuttavaṇṇanā
২২২. কাযদরথো হোতিযেৰ নিযমেন, ন চিত্তদরথো তস্স মগ্গেনেৰ সমুগ্ঘাটিতত্তা।
222.Kāyadaratho hotiyeva niyamena, na cittadaratho tassa maggeneva samugghāṭitattā.
জরাতুরোতি জরাভিভৰনেন আতুরোযেৰ। পদদ্ৰযেপি এসেৰ নযো। উপরিট্ঠতায পরিতো দীঘপুথুলতায অতিৰিয ৰিজ্ঝতীতি সত্তিসল্লগ্গহণং। এৰং হিস্স তণ্হাসল্লস্স সদিসতা। অৰিজ্জায পন সম্মোহাপাদনেন দুক্খাপাদনেন চ ৰিসসদিসতা। রুপ্পতোতি ৰিকারং আপাদিযমানস্স পীল়িযমানস্সাতি অত্থোতি আহ ‘‘ঘট্টিযমানস্সা’’তি।
Jarāturoti jarābhibhavanena āturoyeva. Padadvayepi eseva nayo. Upariṭṭhatāya parito dīghaputhulatāya ativiya vijjhatīti sattisallaggahaṇaṃ. Evaṃ hissa taṇhāsallassa sadisatā. Avijjāya pana sammohāpādanena dukkhāpādanena ca visasadisatā. Ruppatoti vikāraṃ āpādiyamānassa pīḷiyamānassāti atthoti āha ‘‘ghaṭṭiyamānassā’’ti.
পব্বজিতন্তি সসন্তানতো পব্বজিতং ৰা রাগাদিমলতো পব্বজিতং ৰা। তস্মাতি যস্মা থেরস্সেৰেতং ৰচনং, তস্মা অযং ইদানি ৰুচ্চমানো এত্থ গাথায অত্থো। দেৰতায হীতিআদি ৰুত্তস্সেৰ অত্থস্স পাকটকরণং। এত্থাতি সেসগাথাসু। অত্থস্স ৰুত্তনযত্তা ‘‘অনুত্তানপদৰণ্ণনা’’তি আহ। ৰিনযাতি হেতুম্হি নিস্সক্কৰচনন্তি তস্স হেতুম্হি করণৰচনেন অত্থমাহ ‘‘ৰিনযেনা’’তি। তথা ‘‘সমতিক্কমা’’তি এত্থাপি। পরমপরিসুদ্ধং সংকিলেসসমুচ্ছিন্দনতো। আরদ্ধৰীরিযন্তি সম্ভাৰিতৰীরিযং। সম্ভাৰনঞ্চস্স পগ্গণ্হনং পরিপূরণঞ্চাতি আহ ‘‘পগ্গহিতৰীরিযং পরিপুণ্ণৰীরিয’’ন্তি।
Pabbajitanti sasantānato pabbajitaṃ vā rāgādimalato pabbajitaṃ vā. Tasmāti yasmā therassevetaṃ vacanaṃ, tasmā ayaṃ idāni vuccamāno ettha gāthāya attho. Devatāya hītiādi vuttasseva atthassa pākaṭakaraṇaṃ. Etthāti sesagāthāsu. Atthassa vuttanayattā ‘‘anuttānapadavaṇṇanā’’ti āha. Vinayāti hetumhi nissakkavacananti tassa hetumhi karaṇavacanena atthamāha ‘‘vinayenā’’ti. Tathā ‘‘samatikkamā’’ti etthāpi. Paramaparisuddhaṃ saṃkilesasamucchindanato. Āraddhavīriyanti sambhāvitavīriyaṃ. Sambhāvanañcassa paggaṇhanaṃ paripūraṇañcāti āha ‘‘paggahitavīriyaṃ paripuṇṇavīriya’’nti.
উপট্ঠানসুত্তৰণ্ণনা নিট্ঠিতা।
Upaṭṭhānasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. উপট্ঠানসুত্তং • 2. Upaṭṭhānasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. উপট্ঠানসুত্তৰণ্ণনা • 2. Upaṭṭhānasuttavaṇṇanā
