| Library / Tipiṭaka / ཏིཔིཊཀ • Tipiṭaka / ཨིཏིཝུཏྟཀཔཱལི༹ • Itivuttakapāḷi |
༥. ཨུཔཔརིཀྑསུཏྟཾ
5. Upaparikkhasuttaṃ
༩༤. ཝུཏྟཉྷེཏཾ བྷགཝཏཱ, ཝུཏྟམརཧཏཱཏི མེ སུཏཾ –
94. Vuttañhetaṃ bhagavatā, vuttamarahatāti me sutaṃ –
‘‘ཏཐཱ ཏཐཱ, བྷིཀྑཝེ, བྷིཀྑུ ཨུཔཔརིཀྑེཡྻ ཡཐཱ ཡཐཱསྶ 1 ཨུཔཔརིཀྑཏོ བཧིདྡྷཱ ཙསྶ ཝིཉྙཱཎཾ ཨཝིཀྑིཏྟཾ ཨཝིསཊཾ ཨཛ྄ཛྷཏྟཾ ཨསཎྛིཏཾ ཨནུཔཱདཱཡ ན པརིཏསྶེཡྻ། བཧིདྡྷཱ, བྷིཀྑཝེ, ཝིཉྙཱཎེ ཨཝིཀྑིཏྟེ ཨཝིསཊེ སཏི ཨཛ྄ཛྷཏྟཾ ཨསཎྛིཏེ ཨནུཔཱདཱཡ ཨཔརིཏསྶཏོ ཨཱཡཏིཾ ཛཱཏིཛརཱམརཎདུཀྑསམུདཡསམྦྷཝོ ན ཧོཏཱི’’ཏི། ཨེཏམཏྠཾ བྷགཝཱ ཨཝོཙ། ཏཏྠེཏཾ ཨིཏི ཝུཙྩཏི –
‘‘Tathā tathā, bhikkhave, bhikkhu upaparikkheyya yathā yathāssa 2 upaparikkhato bahiddhā cassa viññāṇaṃ avikkhittaṃ avisaṭaṃ ajjhattaṃ asaṇṭhitaṃ anupādāya na paritasseyya. Bahiddhā, bhikkhave, viññāṇe avikkhitte avisaṭe sati ajjhattaṃ asaṇṭhite anupādāya aparitassato āyatiṃ jātijarāmaraṇadukkhasamudayasambhavo na hotī’’ti. Etamatthaṃ bhagavā avoca. Tatthetaṃ iti vuccati –
‘‘སཏྟསངྒཔྤཧཱིནསྶ, ནེཏྟིཙྪིནྣསྶ བྷིཀྑུནོ།
‘‘Sattasaṅgappahīnassa, netticchinnassa bhikkhuno;
ཝིཀྑཱིཎོ ཛཱཏིསཾསཱརོ, ནཏྠི ཏསྶ པུནབྦྷཝོ’’ཏི༎
Vikkhīṇo jātisaṃsāro, natthi tassa punabbhavo’’ti.
ཨཡམྤི ཨཏྠོ ཝུཏྟོ བྷགཝཏཱ, ཨིཏི མེ སུཏནྟི། པཉྩམཾ།
Ayampi attho vutto bhagavatā, iti me sutanti. Pañcamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ཨིཏིཝུཏྟཀ-ཨཊྛཀཐཱ • Itivuttaka-aṭṭhakathā / ༥. ཨུཔཔརིཀྑསུཏྟཝཎྞནཱ • 5. Upaparikkhasuttavaṇṇanā
