| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
22. උපාහනනිද්දෙසො
22. Upāhananiddeso
උපාහනා චෙවාති –
Upāhanā cevāti –
175.
175.
මජ්ඣදෙසෙ න කප්පන්ති, ගණඞ්ගණූපාහනා නවා;
Majjhadese na kappanti, gaṇaṅgaṇūpāhanā navā;
සබ්බස්ස කප්පන්තාරාමෙ, සබ්බත්ථාකල්ලකස්ස ච.
Sabbassa kappantārāme, sabbatthākallakassa ca.
176.
176.
සබ්බනීලකඔදාතපීතලොහිතකණ්හකා ;
Sabbanīlakaodātapītalohitakaṇhakā ;
මහාරඞ්ගමහානාම-රඞ්ගරත්තා චුපාහනා.
Mahāraṅgamahānāma-raṅgarattā cupāhanā.
177.
177.
සබ්බමඤ්ජෙට්ඨිකා චිත්රා, නීලපීතාදිවද්ධිකා;
Sabbamañjeṭṭhikā citrā, nīlapītādivaddhikā;
තිත්තිරපත්තිකා මෙණ්ඩ-අජවිසාණවද්ධිකා.
Tittirapattikā meṇḍa-ajavisāṇavaddhikā.
178.
178.
ඛල්ලබද්ධා පුටබද්ධා, තූලපුණ්ණා චුපාහනා;
Khallabaddhā puṭabaddhā, tūlapuṇṇā cupāhanā;
පාලිගුණ්ඨිමකා මොර-පිඤ්ඡෙන පරිසිබ්බිතා.
Pāliguṇṭhimakā mora-piñchena parisibbitā.
179.
179.
විච්ඡිකාළිකතා සීහබ්යග්ඝුද්දාජිනදීපිනං;
Vicchikāḷikatā sīhabyagghuddājinadīpinaṃ;
මජ්ජාරකාළකොලූකචම්මෙහි ච පරික්ඛටා;
Majjārakāḷakolūkacammehi ca parikkhaṭā;
පාදුකා සඞ්කමනීයා, කොචි ධාරෙය්ය දුක්කටං.
Pādukā saṅkamanīyā, koci dhāreyya dukkaṭaṃ.
180.
180.
නීලාදිවණ්ණං සකලං, පුඤ්ඡිත්වා වෙකදෙසකං;
Nīlādivaṇṇaṃ sakalaṃ, puñchitvā vekadesakaṃ;
උපාහනා වළඤ්ජෙය්ය, හාරෙත්වා ඛල්ලකාදිකන්ති.
Upāhanā vaḷañjeyya, hāretvā khallakādikanti.
