| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
22. உபாஹனநித்³தே³ஸவண்ணனா
22. Upāhananiddesavaṇṇanā
175. நவா கு³ணங்கு³ணூபாஹனா மஜ்ஜ²தே³ஸே ந கப்பந்தீதி ஸம்ப³ந்தோ⁴. நவாதி ஏகவாரம்பி அப்படிமுக்கா. தத்த² கு³ணங்கு³ணூபாஹனா சதுபடலதோ பட்டா²ய வுச்சந்தி. ஸம்ப⁴வே ப்³யபி⁴சாரே ச விஸேஸனங் ஸாத்த²கங் ப⁴வதீதி ‘‘மஜ்ஜ²தே³ஸே’’தி விஸேஸனங் அமஜ்ஜ²தே³ஸங் ப்³யபி⁴சரதீதி அமஜ்ஜ²தே³ஸே கு³ணங்கு³ணூபாஹனா கப்பந்தீதி வேதி³தப்³ப³ங். ததா² நவாதி இமினா அனவா மஜ்ஜ²தே³ஸேபி. இமினா பன வாக்யேன மஜ்ஜ²தே³ஸேபி ஏகவாரம்பி படிமுக்கா, அஞ்ஞத்த² து ஸப்³பா³பி கு³ணங்கு³ணூபாஹனா வட்டந்தி, ந ஸேஸாதி ஆபன்னங், ததா²பி ‘‘அனுஜானாமி, பி⁴க்க²வே, ஏகபலாஸிகங் உபாஹன’’ந்தி (மஹாவ॰ 245) வுத்தத்தா ஏகபடலிகாபி வட்டதீதி வேதி³தப்³ப³ங். ஸப்³ப³ஸ்ஸாதி மஜ்ஜ²தே³ஸே பச்சந்திமேபி கி³லானாகி³லானஸ்ஸ ஸப்³ப³ஸ்ஸ. ‘‘அனுஜானாமி, பி⁴க்க²வே, அஜ்ஜா²ராமே உபாஹனங் தா⁴ரேது’’ந்தி (மஹாவ॰ 249) ஹி ஸாமஞ்ஞேன அனுஞ்ஞாதங். ஸப்³ப³த்தா²தி கா³மே வா அரஞ்ஞே வா ஆராமதோ அஞ்ஞத்ர. அகல்லகஸ்ஸ சாதி கி³லானஸ்ஸேவ.
175. Navā guṇaṅguṇūpāhanā majjhadese na kappantīti sambandho. Navāti ekavārampi appaṭimukkā. Tattha guṇaṅguṇūpāhanā catupaṭalato paṭṭhāya vuccanti. Sambhave byabhicāre ca visesanaṃ sātthakaṃ bhavatīti ‘‘majjhadese’’ti visesanaṃ amajjhadesaṃ byabhicaratīti amajjhadese guṇaṅguṇūpāhanā kappantīti veditabbaṃ. Tathā navāti iminā anavā majjhadesepi. Iminā pana vākyena majjhadesepi ekavārampi paṭimukkā, aññattha tu sabbāpi guṇaṅguṇūpāhanā vaṭṭanti, na sesāti āpannaṃ, tathāpi ‘‘anujānāmi, bhikkhave, ekapalāsikaṃ upāhana’’nti (mahāva. 245) vuttattā ekapaṭalikāpi vaṭṭatīti veditabbaṃ. Sabbassāti majjhadese paccantimepi gilānāgilānassa sabbassa. ‘‘Anujānāmi, bhikkhave, ajjhārāme upāhanaṃ dhāretu’’nti (mahāva. 249) hi sāmaññena anuññātaṃ. Sabbatthāti gāme vā araññe vā ārāmato aññatra. Akallakassa cāti gilānasseva.
176-9. ஸப்³ப³…பே॰… ரத்தா ச உபாஹனா ஸப்³ப³…பே॰… விச்சி²காளிகா ச…பே॰… தீ³பீனங் சம்மேஹி ச மஜ்ஜார…பே॰… சம்மேஹி ச பரிக்க²டா ச உபாஹனா ஸங்கமனீயா பாது³கா ச கோசி தா⁴ரெய்ய, து³க்கடந்தி யோஜனா. ஓதா³தாய பாளியா அட்ட²கதா²ய ச அபா⁴வேபி அனுலோமவஸேனெத்த² வுத்தங் விய தி³ஸ்ஸதி. நீலகோ ச ஓதா³தோ சாதிஆதி³னா த்³வந்தோ³. ஸப்³பே³வ நீலக…பே॰… கண்ஹகா யாஸந்தி ஸமாஸோ. ‘‘மஹாரங்கா³’’திஆதீ³ஸு அப்பயுத்தேபி ஸப்³ப³-ஸத்³தே³ பகரணவஸேன யோஜெத்வா அத்தோ² வேதி³தப்³போ³.
176-9. Sabba…pe… rattā ca upāhanā sabba…pe… vicchikāḷikā ca…pe… dīpīnaṃ cammehi ca majjāra…pe… cammehi ca parikkhaṭā ca upāhanā saṅkamanīyā pādukā ca koci dhāreyya, dukkaṭanti yojanā. Odātāya pāḷiyā aṭṭhakathāya ca abhāvepi anulomavasenettha vuttaṃ viya dissati. Nīlako ca odāto cātiādinā dvando. Sabbeva nīlaka…pe… kaṇhakā yāsanti samāso. ‘‘Mahāraṅgā’’tiādīsu appayuttepi sabba-sadde pakaraṇavasena yojetvā attho veditabbo.
‘‘அத்தா² பகரணா லிங்கா³, ஓசித்யா காலதே³ஸதோ;
‘‘Atthā pakaraṇā liṅgā, ocityā kāladesato;
ஸத்³த³த்தா² விப⁴ஜீயந்தி, ந ஸத்³தா³யேவ கேவலா’’தி. –
Saddatthā vibhajīyanti, na saddāyeva kevalā’’ti. –
ஹி வுத்தங். சித்ராதி விசித்ரா. நீலபீதாதீ³ வத்³தா⁴யேவ யாஸந்தி ஸமாஸோ. ஆதி³-ஸத்³தே³ன ஓதா³தாதீ³னங் க³ஹணங். தித்திரபத்தஸதி³ஸோ விசித்தோ வண்ணோ தித்திரபத்த-ஸத்³தே³ன க³ஹிதோ. தமேதேஸமத்தீ²தி தித்திரபத்திகா. மெண்ட³ஸ்ஸ ச அஜஸ்ஸ ச விஸாணஸதி³ஸா வத்³தா⁴ யாஸந்தி பா³ஹிரத்தோ². தா பன கண்ணிகட்டா²னே மெண்ட³கஅஜவிஸாணஸண்டா²னே வத்³தே⁴ யோஜெத்வா கதா. ஏஸ நயோ விச்சி²காளிகாதீ³ஸு. பண்ஹிபிதா⁴னத்த²ங் தலே க²ல்லங் ப³த்³த⁴ங் யாஸந்தி விக்³க³ஹோ. ஜங்க⁴தோ ஸப்³ப³பாத³ப்படிச்சா²த³னகங் புடங் ப³த்³த⁴ங் யாஸந்தி ப³ஹுப்³பீ³ஹி. தூலங் பிசு புண்ணங் யாஸந்தி அஞ்ஞபத³த்தோ². பலிகு³ண்டே²தீதி பலிகு³ண்டோ², உபரிபாத³தலமத்தப்படிச்சா²த³கப³ந்தோ⁴, தேன யோஜெத்வா கதா பாலிகு³ண்டி²மா, விசித்ரா ஹி தத்³தி⁴தவுத்தி. விச்சி²கானங் அளஸதி³ஸங் நங்கு³ட்ட²ஸதி³ஸங் ப³த்³த⁴மேதாஸந்தி விச்சி²காளிகா. ஸீஹப்³யக்³கு⁴த்³தா³ஜினதீ³பீனங் சம்மேஹி சாதி பகரணதோ அஜினா நாம மிகா³. உலூகா பக்கி²பி³ளாரா. ஸங்கமந்தி க³ச்ச²ந்தி ஏதாஹீதி ஸங்கமனீயா. தா பன தாலபண்ணாதீ³ஹி கதா ஸங்ஹாரியா.
Hi vuttaṃ. Citrāti vicitrā. Nīlapītādī vaddhāyeva yāsanti samāso. Ādi-saddena odātādīnaṃ gahaṇaṃ. Tittirapattasadiso vicitto vaṇṇo tittirapatta-saddena gahito. Tametesamatthīti tittirapattikā. Meṇḍassa ca ajassa ca visāṇasadisā vaddhā yāsanti bāhirattho. Tā pana kaṇṇikaṭṭhāne meṇḍakaajavisāṇasaṇṭhāne vaddhe yojetvā katā. Esa nayo vicchikāḷikādīsu. Paṇhipidhānatthaṃ tale khallaṃ baddhaṃ yāsanti viggaho. Jaṅghato sabbapādappaṭicchādanakaṃ puṭaṃ baddhaṃ yāsanti bahubbīhi. Tūlaṃ picu puṇṇaṃ yāsanti aññapadattho. Paliguṇṭhetīti paliguṇṭho, uparipādatalamattappaṭicchādakabandho, tena yojetvā katā pāliguṇṭhimā, vicitrā hi taddhitavutti. Vicchikānaṃ aḷasadisaṃ naṅguṭṭhasadisaṃ baddhametāsanti vicchikāḷikā. Sīhabyagghuddājinadīpīnaṃ cammehi cāti pakaraṇato ajinā nāma migā. Ulūkā pakkhibiḷārā. Saṅkamanti gacchanti etāhīti saṅkamanīyā. Tā pana tālapaṇṇādīhi katā saṃhāriyā.
180. ஸகலங் ஏகதே³ஸங் வா புஞ்சி²த்வாவாதி யோஜனா. க²ல்லகாதி³கந்தி ஆதி³-ஸத்³தே³ன மெண்ட³விஸாணவத்³தி⁴காதி³கங் ஸப்³ப³ங் ஸங்க³ண்ஹாதீதி.
180. Sakalaṃ ekadesaṃ vā puñchitvāvāti yojanā. Khallakādikanti ādi-saddena meṇḍavisāṇavaddhikādikaṃ sabbaṃ saṅgaṇhātīti.
உபாஹனநித்³தே³ஸவண்ணனா நிட்டி²தா.
Upāhananiddesavaṇṇanā niṭṭhitā.
