| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೪. ಉಪಾದಿನ್ನತ್ತಿಕವಣ್ಣನಾ
4. Upādinnattikavaṇṇanā
೫೧. ಉಪಾದಿನ್ನುಪಾದಾನಿಯತ್ತಿಕಸ್ಸ ಪಞ್ಹಾವಾರೇ ವತ್ಥು ಉಪಾದಾನಿಯಾನಂ ಖನ್ಧಾನಂ ಪುರೇಜಾತಪಚ್ಚಯೇನ ಪಚ್ಚಯೋತಿ ಪವತ್ತಿಂ ಸನ್ಧಾಯ ವುತ್ತಂ। ಪಟಿಸನ್ಧಿಯಂ ಪನ ತಂ ಪುರೇಜಾತಂ ನ ಹೋತಿ।
51. Upādinnupādāniyattikassa pañhāvāre vatthu upādāniyānaṃ khandhānaṃ purejātapaccayena paccayoti pavattiṃ sandhāya vuttaṃ. Paṭisandhiyaṃ pana taṃ purejātaṃ na hoti.
೭೨. ಉಪಾದಿನ್ನುಪಾದಾನಿಯೋ ಕಬಳೀಕಾರೋ ಆಹಾರೋ ಉಪಾದಿನ್ನುಪಾದಾನಿಯಸ್ಸ ಕಾಯಸ್ಸ ಆಹಾರಪಚ್ಚಯೇನ ಪಚ್ಚಯೋತಿ ಏತ್ಥ ಉಪಾದಿನ್ನುಪಾದಾನಿಯೋ ಕಬಳೀಕಾರಾಹಾರೋ ನಾಮ ಕಮ್ಮಸಮುಟ್ಠಾನಾನಂ ರೂಪಾನಂ ಅಬ್ಭನ್ತರಗತಾ ಓಜಾ। ಉಪಾದಿನ್ನುಪಾದಾನಿಯಸ್ಸ ಕಾಯಸ್ಸಾತಿ ತಸ್ಸೇವ ಕಮ್ಮಸಮುಟ್ಠಾನರೂಪಕಾಯಸ್ಸ ಆಹಾರಪಚ್ಚಯೇನ ಪಚ್ಚಯೋ। ರೂಪಜೀವಿತಿನ್ದ್ರಿಯಂ ವಿಯ ಕಟತ್ತಾರೂಪಾನಂ ಅನುಪಾಲನಉಪತ್ಥಮ್ಭನವಸೇನ ಪಚ್ಚಯೋ, ನ ಜನಕವಸೇನ। ಯಂ ಪನ ಮಣ್ಡೂಕಾದಯೋ ಗಿಲಿತ್ವಾ ಠಿತಾನಂ ಅಹಿಆದೀನಂ ಕಾಯಸ್ಸ ಜೀವಮಾನಕಮಣ್ಡೂಕಾದಿಸರೀರೇ ಓಜಾ ಆಹಾರಪಚ್ಚಯೇನ ಪಚ್ಚಯೋತಿ ವದನ್ತಿ, ತಂ ನ ಗಹೇತಬ್ಬಂ। ನ ಹಿ ಜೀವಮಾನಕಸರೀರೇ ಓಜಾ ಅಞ್ಞಸ್ಸ ಸರೀರಸ್ಸ ಆಹಾರಪಚ್ಚಯತಂ ಸಾಧೇತಿ। ಅನುಪಾದಿನ್ನುಪಾದಾನಿಯಸ್ಸ ಕಾಯಸ್ಸಾತಿ ಏತ್ಥ ಪನ ಜನಕವಸೇನಾಪಿ ಲಬ್ಭತಿ। ಉಪಾದಿನ್ನುಪಾದಾನಿಯಸ್ಸ ಚ ಅನುಪಾದಿನ್ನುಪಾದಾನಿಯಸ್ಸ ಚಾತಿ ಏತ್ಥ ಏಕಸ್ಸ ಉಪತ್ಥಮ್ಭಕವಸೇನ, ಏಕಸ್ಸ ಜನಕವಸೇನ, ಉಭಿನ್ನಮ್ಪಿ ವಾ ಉಪತ್ಥಮ್ಭಕವಸೇನೇವ ವುತ್ತೋ। ದ್ವೇ ಪನ ಆಹಾರಾ ಏಕತೋ ಪಚ್ಚಯಾ ಹೋನ್ತಾ ಉಪತ್ಥಮ್ಭಕಾವ ಹೋನ್ತಿ, ನ ಜನಕಾ। ಸೇಸಮೇತ್ಥ ಪಾಳಿಮೇವ ಸಾಧುಕಂ ಓಲೋಕೇತ್ವಾ ವೇದಿತಬ್ಬಂ।
72. Upādinnupādāniyo kabaḷīkāro āhāro upādinnupādāniyassa kāyassa āhārapaccayena paccayoti ettha upādinnupādāniyo kabaḷīkārāhāro nāma kammasamuṭṭhānānaṃ rūpānaṃ abbhantaragatā ojā. Upādinnupādāniyassa kāyassāti tasseva kammasamuṭṭhānarūpakāyassa āhārapaccayena paccayo. Rūpajīvitindriyaṃ viya kaṭattārūpānaṃ anupālanaupatthambhanavasena paccayo, na janakavasena. Yaṃ pana maṇḍūkādayo gilitvā ṭhitānaṃ ahiādīnaṃ kāyassa jīvamānakamaṇḍūkādisarīre ojā āhārapaccayena paccayoti vadanti, taṃ na gahetabbaṃ. Na hi jīvamānakasarīre ojā aññassa sarīrassa āhārapaccayataṃ sādheti. Anupādinnupādāniyassa kāyassāti ettha pana janakavasenāpi labbhati. Upādinnupādāniyassa ca anupādinnupādāniyassa cāti ettha ekassa upatthambhakavasena, ekassa janakavasena, ubhinnampi vā upatthambhakavaseneva vutto. Dve pana āhārā ekato paccayā hontā upatthambhakāva honti, na janakā. Sesamettha pāḷimeva sādhukaṃ oloketvā veditabbaṃ.
ಉಪಾದಿನ್ನತ್ತಿಕವಣ್ಣನಾ।
Upādinnattikavaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಪಟ್ಠಾನಪಾಳಿ • Paṭṭhānapāḷi / ೪. ಉಪಾದಿನ್ನತ್ತಿಕಂ • 4. Upādinnattikaṃ
