| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৪. উপাদিন্নত্তিকৰণ্ণনা
4. Upādinnattikavaṇṇanā
৫১. উপাদিন্নুপাদানিযত্তিকস্স পঞ্হাৰারে ৰত্থু উপাদানিযানং খন্ধানং পুরেজাতপচ্চযেন পচ্চযোতি পৰত্তিং সন্ধায ৰুত্তং। পটিসন্ধিযং পন তং পুরেজাতং ন হোতি।
51. Upādinnupādāniyattikassa pañhāvāre vatthu upādāniyānaṃ khandhānaṃ purejātapaccayena paccayoti pavattiṃ sandhāya vuttaṃ. Paṭisandhiyaṃ pana taṃ purejātaṃ na hoti.
৭২. উপাদিন্নুপাদানিযো কবল়ীকারো আহারো উপাদিন্নুপাদানিযস্স কাযস্স আহারপচ্চযেন পচ্চযোতি এত্থ উপাদিন্নুপাদানিযো কবল়ীকারাহারো নাম কম্মসমুট্ঠানানং রূপানং অব্ভন্তরগতা ওজা। উপাদিন্নুপাদানিযস্স কাযস্সাতি তস্সেৰ কম্মসমুট্ঠানরূপকাযস্স আহারপচ্চযেন পচ্চযো। রূপজীৰিতিন্দ্রিযং ৰিয কটত্তারূপানং অনুপালনউপত্থম্ভনৰসেন পচ্চযো, ন জনকৰসেন। যং পন মণ্ডূকাদযো গিলিত্ৰা ঠিতানং অহিআদীনং কাযস্স জীৰমানকমণ্ডূকাদিসরীরে ওজা আহারপচ্চযেন পচ্চযোতি ৰদন্তি, তং ন গহেতব্বং। ন হি জীৰমানকসরীরে ওজা অঞ্ঞস্স সরীরস্স আহারপচ্চযতং সাধেতি। অনুপাদিন্নুপাদানিযস্স কাযস্সাতি এত্থ পন জনকৰসেনাপি লব্ভতি। উপাদিন্নুপাদানিযস্স চ অনুপাদিন্নুপাদানিযস্স চাতি এত্থ একস্স উপত্থম্ভকৰসেন, একস্স জনকৰসেন, উভিন্নম্পি ৰা উপত্থম্ভকৰসেনেৰ ৰুত্তো। দ্ৰে পন আহারা একতো পচ্চযা হোন্তা উপত্থম্ভকাৰ হোন্তি, ন জনকা। সেসমেত্থ পাল়িমেৰ সাধুকং ওলোকেত্ৰা ৰেদিতব্বং।
72. Upādinnupādāniyo kabaḷīkāro āhāro upādinnupādāniyassa kāyassa āhārapaccayena paccayoti ettha upādinnupādāniyo kabaḷīkārāhāro nāma kammasamuṭṭhānānaṃ rūpānaṃ abbhantaragatā ojā. Upādinnupādāniyassa kāyassāti tasseva kammasamuṭṭhānarūpakāyassa āhārapaccayena paccayo. Rūpajīvitindriyaṃ viya kaṭattārūpānaṃ anupālanaupatthambhanavasena paccayo, na janakavasena. Yaṃ pana maṇḍūkādayo gilitvā ṭhitānaṃ ahiādīnaṃ kāyassa jīvamānakamaṇḍūkādisarīre ojā āhārapaccayena paccayoti vadanti, taṃ na gahetabbaṃ. Na hi jīvamānakasarīre ojā aññassa sarīrassa āhārapaccayataṃ sādheti. Anupādinnupādāniyassa kāyassāti ettha pana janakavasenāpi labbhati. Upādinnupādāniyassa ca anupādinnupādāniyassa cāti ettha ekassa upatthambhakavasena, ekassa janakavasena, ubhinnampi vā upatthambhakavaseneva vutto. Dve pana āhārā ekato paccayā hontā upatthambhakāva honti, na janakā. Sesamettha pāḷimeva sādhukaṃ oloketvā veditabbaṃ.
উপাদিন্নত্তিকৰণ্ণনা।
Upādinnattikavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / ৪. উপাদিন্নত্তিকং • 4. Upādinnattikaṃ
