| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. উপাদানিযধম্মসুত্তং
10. Upādāniyadhammasuttaṃ
১২৩. ‘‘উপাদানিযে চ, ভিক্খৰে, ধম্মে দেসেস্সামি উপাদানঞ্চ। তং সুণাথ। কতমে চ, ভিক্খৰে, উপাদানিযা ধম্মা, কতমঞ্চ উপাদানং? সন্তি, ভিক্খৰে, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা। ইমে ৰুচ্চন্তি, ভিক্খৰে, উপাদানিযা ধম্মা। যো তত্থ ছন্দরাগো, তং তত্থ উপাদানং…পে॰… সন্তি, ভিক্খৰে, জিৰ্হাৰিঞ্ঞেয্যা রসা…পে॰… সন্তি, ভিক্খৰে, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা। ইমে ৰুচ্চন্তি, ভিক্খৰে, উপাদানিযা ধম্মা। যো তত্থ ছন্দরাগো তং তত্থ উপাদান’’ন্তি। দসমং।
123. ‘‘Upādāniye ca, bhikkhave, dhamme desessāmi upādānañca. Taṃ suṇātha. Katame ca, bhikkhave, upādāniyā dhammā, katamañca upādānaṃ? Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Ime vuccanti, bhikkhave, upādāniyā dhammā. Yo tattha chandarāgo, taṃ tattha upādānaṃ…pe… santi, bhikkhave, jivhāviññeyyā rasā…pe… santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Ime vuccanti, bhikkhave, upādāniyā dhammā. Yo tattha chandarāgo taṃ tattha upādāna’’nti. Dasamaṃ.
লোককামগুণৰগ্গো দ্ৰাদসমো।
Lokakāmaguṇavaggo dvādasamo.
তস্সুদ্দানং –
Tassuddānaṃ –
মারপাসেন দ্ৰে ৰুত্তা, লোককামগুণেন চ।
Mārapāsena dve vuttā, lokakāmaguṇena ca;
সক্কো পঞ্চসিখো চেৰ, সারিপুত্তো চ রাহুলো।
Sakko pañcasikho ceva, sāriputto ca rāhulo;
সংযোজনং উপাদানং, ৰগ্গো তেন পৰুচ্চতীতি॥
Saṃyojanaṃ upādānaṃ, vaggo tena pavuccatīti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯-১০. সংযোজনিযধম্মসুত্তাদিৰণ্ণনা • 9-10. Saṃyojaniyadhammasuttādivaṇṇanā
