| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৪. উপচিকাৰগ্গো
4. Upacikāvaggo
১. উপচিকঙ্গপঞ্হো
1. Upacikaṅgapañho
১. ‘‘ভন্তে নাগসেন, ‘উপচিকায একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, উপচিকা উপরি ছদনং কত্ৰা অত্তানং পিদহিত্ৰা গোচরায চরতি, এৰমেৰ খো, মহারাজ, যোগিনা যোগাৰচরেন সীলসংৰরছদনং কত্ৰা মানসং পিদহিত্ৰা পিণ্ডায চরিতব্বং, সীলসংৰরছদনেন খো, মহারাজ, যোগী যোগাৰচরো সব্বভযসমতিক্কন্তো হোতি। ইদং, মহারাজ, উপচিকায একং অঙ্গং গহেতব্বং, ভাসিতম্পেতং, মহারাজ, থেরেন উপসেনেন ৰঙ্গন্তপুত্তেন –
1. ‘‘Bhante nāgasena, ‘upacikāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, upacikā upari chadanaṃ katvā attānaṃ pidahitvā gocarāya carati, evameva kho, mahārāja, yoginā yogāvacarena sīlasaṃvarachadanaṃ katvā mānasaṃ pidahitvā piṇḍāya caritabbaṃ, sīlasaṃvarachadanena kho, mahārāja, yogī yogāvacaro sabbabhayasamatikkanto hoti. Idaṃ, mahārāja, upacikāya ekaṃ aṅgaṃ gahetabbaṃ, bhāsitampetaṃ, mahārāja, therena upasenena vaṅgantaputtena –
‘‘‘সীলসংৰরছদনং, যোগী কত্ৰান মানসং।
‘‘‘Sīlasaṃvarachadanaṃ, yogī katvāna mānasaṃ;
অনুপলিত্তো লোকেন, ভযা চ পরিমুচ্চতী’’’তি॥
Anupalitto lokena, bhayā ca parimuccatī’’’ti.
উপচিকঙ্গপঞ্হো পঠমো।
Upacikaṅgapañho paṭhamo.
