| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๗. อุปจาลาสุตฺตํ
7. Upacālāsuttaṃ
๑๖๘. สาวตฺถินิทานํ ฯ อถ โข อุปจาลา ภิกฺขุนี ปุพฺพณฺหสมยํ นิวาเสตฺวา…เป.… อญฺญตรสฺมิํ รุกฺขมูเล ทิวาวิหารํ นิสีทิฯ อถ โข มาโร ปาปิมา เยน อุปจาลา ภิกฺขุนี เตนุปสงฺกมิ; อุปสงฺกมิตฺวา อุปจาลํ ภิกฺขุนิํ เอตทโวจ – ‘‘กตฺถ นุ ตฺวํ, ภิกฺขุนิ, อุปฺปชฺชิตุกามา’’ติ? ‘‘น ขฺวาหํ, อาวุโส, กตฺถจิ อุปฺปชฺชิตุกามา’’ติฯ
168. Sāvatthinidānaṃ . Atha kho upacālā bhikkhunī pubbaṇhasamayaṃ nivāsetvā…pe… aññatarasmiṃ rukkhamūle divāvihāraṃ nisīdi. Atha kho māro pāpimā yena upacālā bhikkhunī tenupasaṅkami; upasaṅkamitvā upacālaṃ bhikkhuniṃ etadavoca – ‘‘kattha nu tvaṃ, bhikkhuni, uppajjitukāmā’’ti? ‘‘Na khvāhaṃ, āvuso, katthaci uppajjitukāmā’’ti.
‘‘ตาวติํสา จ ยามา จ, ตุสิตา จาปิ เทวตา;
‘‘Tāvatiṃsā ca yāmā ca, tusitā cāpi devatā;
นิมฺมานรติโน เทวา, เย เทวา วสวตฺติโน;
Nimmānaratino devā, ye devā vasavattino;
ตตฺถ จิตฺตํ ปณิเธหิ, รติํ ปจฺจนุโภสฺสสี’’ติฯ
Tattha cittaṃ paṇidhehi, ratiṃ paccanubhossasī’’ti.
‘‘ตาวติํสา จ ยามา จ, ตุสิตา จาปิ เทวตา;
‘‘Tāvatiṃsā ca yāmā ca, tusitā cāpi devatā;
นิมฺมานรติโน เทวา, เย เทวา วสวตฺติโน;
Nimmānaratino devā, ye devā vasavattino;
กามพนฺธนพทฺธา เต, เอนฺติ มารวสํ ปุนฯ
Kāmabandhanabaddhā te, enti māravasaṃ puna.
อคติ ยตฺถ มารสฺส, ตตฺถ เม นิรโต มโน’’ติฯ
Agati yattha mārassa, tattha me nirato mano’’ti.
อถ โข มาโร ปาปิมา ‘‘ชานาติ มํ อุปจาลา ภิกฺขุนี’’ติ ทุกฺขี ทุมฺมโน ตเตฺถวนฺตรธายีติฯ
Atha kho māro pāpimā ‘‘jānāti maṃ upacālā bhikkhunī’’ti dukkhī dummano tatthevantaradhāyīti.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๗. อุปจาลาสุตฺตวณฺณนา • 7. Upacālāsuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๗. อุปจาลาสุตฺตวณฺณนา • 7. Upacālāsuttavaṇṇanā
