| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๓๓. อุมาปุปฺผิยวโคฺค
33. Umāpupphiyavaggo
๑. อุมาปุปฺผิยเตฺถรอปทานํ
1. Umāpupphiyattheraapadānaṃ
๑.
1.
‘‘สมาหิตํ สมาปนฺนํ, สิทฺธตฺถมปราชิตํ;
‘‘Samāhitaṃ samāpannaṃ, siddhatthamaparājitaṃ;
สมาธินา อุปวิฎฺฐํ, อทฺทสาหํ นรุตฺตมํฯ
Samādhinā upaviṭṭhaṃ, addasāhaṃ naruttamaṃ.
๒.
2.
‘‘อุมาปุปฺผํ คเหตฺวาน, พุทฺธสฺส อภิโรปยิํ;
‘‘Umāpupphaṃ gahetvāna, buddhassa abhiropayiṃ;
สพฺพปุปฺผา เอกสีสา, อุทฺธํวณฺฎา อโธมุขาฯ
Sabbapupphā ekasīsā, uddhaṃvaṇṭā adhomukhā.
๓.
3.
‘‘สุจิตฺตา วิย ติฎฺฐเนฺต, อากาเส ปุปฺผสนฺถรา;
‘‘Sucittā viya tiṭṭhante, ākāse pupphasantharā;
เตน จิตฺตปฺปสาเทน, ตุสิตํ อุปปชฺชหํฯ
Tena cittappasādena, tusitaṃ upapajjahaṃ.
๔.
4.
‘‘จตุนฺนวุติโต กเปฺป, ยํ ปุปฺผมภิปูชยิํ;
‘‘Catunnavutito kappe, yaṃ pupphamabhipūjayiṃ;
ทุคฺคติํ นาภิชานามิ, พุทฺธปูชายิทํ ผลํฯ
Duggatiṃ nābhijānāmi, buddhapūjāyidaṃ phalaṃ.
๕.
5.
‘‘ปญฺจปญฺญาสิโต กเปฺป, เอโก อาสิํ มหีปติ;
‘‘Pañcapaññāsito kappe, eko āsiṃ mahīpati;
สมนฺตฉทโน นาม, จกฺกวตฺตี มหพฺพโลฯ
Samantachadano nāma, cakkavattī mahabbalo.
๖.
6.
‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;
‘‘Paṭisambhidā catasso, vimokkhāpi ca aṭṭhime;
ฉฬภิญฺญา สจฺฉิกตา, กตํ พุทฺธสฺส สาสนํฯ
Chaḷabhiññā sacchikatā, kataṃ buddhassa sāsanaṃ.
อิตฺถํ สุทํ อายสฺมา อุมาปุปฺผิโย เถโร อิมา คาถาโย อภาสิตฺถาติฯ
Itthaṃ sudaṃ āyasmā umāpupphiyo thero imā gāthāyo abhāsitthāti.
อุมาปุปฺผิยเตฺถรสฺสาปทานํ ปฐมํฯ
Umāpupphiyattherassāpadānaṃ paṭhamaṃ.
