| Library / Tipiṭaka / ತಿಪಿಟಕ • Tipiṭaka / ವಿಮಾನವತ್ಥುಪಾಳಿ • Vimānavatthupāḷi |
೩. ಪಾರಿಚ್ಛತ್ತಕವಗ್ಗೋ
3. Pāricchattakavaggo
೧. ಉಳಾರವಿಮಾನವತ್ಥು
1. Uḷāravimānavatthu
೨೮೬.
286.
‘‘ಉಳಾರೋ ತೇ ಯಸೋ ವಣ್ಣೋ, ಸಬ್ಬಾ ಓಭಾಸತೇ ದಿಸಾ।
‘‘Uḷāro te yaso vaṇṇo, sabbā obhāsate disā;
ನಾರಿಯೋ ನಚ್ಚನ್ತಿ ಗಾಯನ್ತಿ, ದೇವಪುತ್ತಾ ಅಲಙ್ಕತಾ॥
Nāriyo naccanti gāyanti, devaputtā alaṅkatā.
೨೮೭.
287.
‘‘ಮೋದೇನ್ತಿ ಪರಿವಾರೇನ್ತಿ, ತವ ಪೂಜಾಯ ದೇವತೇ।
‘‘Modenti parivārenti, tava pūjāya devate;
ಸೋವಣ್ಣಾನಿ ವಿಮಾನಾನಿ, ತವಿಮಾನಿ ಸುದಸ್ಸನೇ॥
Sovaṇṇāni vimānāni, tavimāni sudassane.
೨೮೮.
288.
‘‘ತುವಂಸಿ ಇಸ್ಸರಾ ತೇಸಂ, ಸಬ್ಬಕಾಮಸಮಿದ್ಧಿನೀ।
‘‘Tuvaṃsi issarā tesaṃ, sabbakāmasamiddhinī;
ಅಭಿಜಾತಾ ಮಹನ್ತಾಸಿ, ದೇವಕಾಯೇ ಪಮೋದಸಿ।
Abhijātā mahantāsi, devakāye pamodasi;
ದೇವತೇ ಪುಚ್ಛಿತಾಚಿಕ್ಖ, ಕಿಸ್ಸ ಕಮ್ಮಸ್ಸಿದಂ ಫಲ’’ನ್ತಿ॥
Devate pucchitācikkha, kissa kammassidaṃ phala’’nti.
೨೮೯.
289.
‘‘ಅಹಂ ಮನುಸ್ಸೇಸು ಮನುಸ್ಸಭೂತಾ, ಪುರಿಮಾಯ ಜಾತಿಯಾ ಮನುಸ್ಸಲೋಕೇ।
‘‘Ahaṃ manussesu manussabhūtā, purimāya jātiyā manussaloke;
ದುಸ್ಸೀಲಕುಲೇ ಸುಣಿಸಾ ಅಹೋಸಿಂ, ಅಸ್ಸದ್ಧೇಸು ಕದರಿಯೇಸು ಅಹಂ॥
Dussīlakule suṇisā ahosiṃ, assaddhesu kadariyesu ahaṃ.
೨೯೦.
290.
‘‘ಸದ್ಧಾ ಸೀಲೇನ ಸಮ್ಪನ್ನಾ, ಸಂವಿಭಾಗರತಾ ಸದಾ।
‘‘Saddhā sīlena sampannā, saṃvibhāgaratā sadā;
ಪಿಣ್ಡಾಯ ಚರಮಾನಸ್ಸ, ಅಪೂವಂ ತೇ ಅದಾಸಹಂ॥
Piṇḍāya caramānassa, apūvaṃ te adāsahaṃ.
೨೯೧.
291.
‘‘ತದಾಹಂ ಸಸ್ಸುಯಾಚಿಕ್ಖಿಂ, ಸಮಣೋ ಆಗತೋ ಇಧ।
‘‘Tadāhaṃ sassuyācikkhiṃ, samaṇo āgato idha;
ತಸ್ಸ ಅದಾಸಹಂ ಪೂವಂ, ಪಸನ್ನಾ ಸೇಹಿ ಪಾಣಿಭಿ॥
Tassa adāsahaṃ pūvaṃ, pasannā sehi pāṇibhi.
೨೯೨.
292.
ನ ಮಂ ಸಮ್ಪುಚ್ಛಿತುಂ ಇಚ್ಛಿ, ಸಮಣಸ್ಸ ದದಾಮಹಂ॥
Na maṃ sampucchituṃ icchi, samaṇassa dadāmahaṃ.
೨೯೩.
293.
‘‘ತತೋ ಮೇ ಸಸ್ಸು ಕುಪಿತಾ, ಪಹಾಸಿ ಮುಸಲೇನ ಮಂ।
‘‘Tato me sassu kupitā, pahāsi musalena maṃ;
ಕೂಟಙ್ಗಚ್ಛಿ ಅವಧಿ ಮಂ, ನಾಸಕ್ಖಿಂ ಜೀವಿತುಂ ಚಿರಂ॥
Kūṭaṅgacchi avadhi maṃ, nāsakkhiṃ jīvituṃ ciraṃ.
೨೯೪.
294.
‘‘ಸಾ ಅಹಂ ಕಾಯಸ್ಸ ಭೇದಾ, ವಿಪ್ಪಮುತ್ತಾ ತತೋ ಚುತಾ।
‘‘Sā ahaṃ kāyassa bhedā, vippamuttā tato cutā;
ದೇವಾನಂ ತಾವತಿಂಸಾನಂ, ಉಪಪನ್ನಾ ಸಹಬ್ಯತಂ॥
Devānaṃ tāvatiṃsānaṃ, upapannā sahabyataṃ.
೨೯೫.
295.
‘‘ತೇನ ಮೇತಾದಿಸೋ ವಣ್ಣೋ…ಪೇ॰…ವಣ್ಣೋ ಚ ಮೇ ಸಬ್ಬದಿಸಾ ಪಭಾಸತೀ’’ತಿ॥
‘‘Tena metādiso vaṇṇo…pe…vaṇṇo ca me sabbadisā pabhāsatī’’ti.
ಉಳಾರವಿಮಾನಂ ಪಠಮಂ।
Uḷāravimānaṃ paṭhamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ವಿಮಾನವತ್ಥು-ಅಟ್ಠಕಥಾ • Vimānavatthu-aṭṭhakathā / ೧. ಉಳಾರವಿಮಾನವಣ್ಣನಾ • 1. Uḷāravimānavaṇṇanā
