| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༩. ཨུཀྑིཏྟསམྦྷོགསིཀྑཱཔདཝཎྞནཱ
9. Ukkhittasambhogasikkhāpadavaṇṇanā
ཨཀཏཱནུདྷམྨེནཱཏི ཨུཀྑིཔིཏྭཱ ཨནོསཱརིཏེན། ཏེནཱཧ ‘‘ཨནུདྷམྨོ ཝུཙྩཏཱི’’ཏིཨཱདི། ཨེཏྠ ཨནུདྷམྨོཏི ཨོསཱརཎཱ ཝུཙྩཏཱིཏི སམྦནྡྷོ། ཨུཀྑེཔནཱིཡཀམྨསྶཱནུརཱུཔོ, པཙྪཱ ཀཏྟབྦོ ཝཱ དྷམྨོཏི ཨནུདྷམྨོ། ཨནུལོམཝཏྟཾ དིསྭཱཏི ‘‘ན ཨུཔསམྤཱདེཏབྦཾ, ན ནིསྶཡོ དཱཏབྦོ’’ཏིཨཱདིཀཾ (ཙཱུལ༹ཝ॰ ༧༠) ཨཊྛཱརསཝིདྷཾ ཝཏྟཾ དིསྭཱ, ཨེཏེསུ ཨཊྛཱརསསུ ཨནུལོམཝཏྟེསུ ཝཏྟནྟཾ དིསྭཱཏི ཨདྷིཔྤཱཡོ། ཨཱམིསསམྦྷོགཾ ཝཱ དྷམྨསམྦྷོགཾ ཝཱཏི ཨེཏྠ ཡཾ ཀིཉྩི ཨཱམིསསྶ དཱནཾ, པཊིགྒཧཎཉྩ ཨཱམིསསམྦྷོགོ། དྷམྨསྶ ཨུདྡིསནཾ, ཨུདྡིསཱཔནཉྩ དྷམྨསམྦྷོགོ། སཾཝསེཡྻཱཏི ‘‘ཨུཔོསཐཾ ཝཱ པཝཱརཎཾ ཝཱ སངྒྷཀམྨཾ ཝཱ’’ཏི (པཱཙི॰ ༤༢༥) ཨེཝཾ པདབྷཱཛནིཡཾ ཝུཏྟཾ ཏིཝིདྷཾ སཾཝཱསཾ ཀརེཡྻ། ཡསྨཱ པནེཏྠ ཨུཔོསཐཔཝཱརཎཱཔི སངྒྷེཧིཡེཝ ཀཱཏབྦཏྟཱ སངྒྷཀམྨཱནིཡེཝ ཧོནྟི, ཏསྨཱ ‘‘ཨུཔོསཐཱདིཀཾ སངྒྷཀམྨཾ ཀརེཡྻཱ’’ཏི ཝུཏྟཾ། པཡོགེ པཡོགེཏི དཱནེ དཱནེ, གཧཎེ གཧཎེ ཙཱཏི ཨཏྠོ།
Akatānudhammenāti ukkhipitvā anosāritena. Tenāha ‘‘anudhammo vuccatī’’tiādi. Ettha anudhammoti osāraṇā vuccatīti sambandho. Ukkhepanīyakammassānurūpo, pacchā kattabbo vā dhammoti anudhammo. Anulomavattaṃ disvāti ‘‘na upasampādetabbaṃ, na nissayo dātabbo’’tiādikaṃ (cūḷava. 70) aṭṭhārasavidhaṃ vattaṃ disvā, etesu aṭṭhārasasu anulomavattesu vattantaṃ disvāti adhippāyo. Āmisasambhogaṃ vā dhammasambhogaṃ vāti ettha yaṃ kiñci āmisassa dānaṃ, paṭiggahaṇañca āmisasambhogo. Dhammassa uddisanaṃ, uddisāpanañca dhammasambhogo. Saṃvaseyyāti ‘‘uposathaṃ vā pavāraṇaṃ vā saṅghakammaṃ vā’’ti (pāci. 425) evaṃ padabhājaniyaṃ vuttaṃ tividhaṃ saṃvāsaṃ kareyya. Yasmā panettha uposathapavāraṇāpi saṅghehiyeva kātabbattā saṅghakammāniyeva honti, tasmā ‘‘uposathādikaṃ saṅghakammaṃ kareyyā’’ti vuttaṃ. Payoge payogeti dāne dāne, gahaṇe gahaṇe cāti attho.
པཎྞཏྟིཾ ཨཛཱནནྟེན ཨརཧཏཱཔི ཀིརིཡཱབྱཱཀཏཙིཏྟེན ཨཱཔཛྫིཏབྦཏྟཱ ‘‘ཏིཙིཏྟ’’ནྟི ཝུཏྟཾ།
Paṇṇattiṃ ajānantena arahatāpi kiriyābyākatacittena āpajjitabbattā ‘‘ticitta’’nti vuttaṃ.
ཨུཀྑིཏྟསམྦྷོགསིཀྑཱཔདཝཎྞནཱ ནིཊྛིཏཱ།
Ukkhittasambhogasikkhāpadavaṇṇanā niṭṭhitā.
