| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৯. উক্খিত্তসম্ভোগসিক্খাপদৰণ্ণনা
9. Ukkhittasambhogasikkhāpadavaṇṇanā
অকতানুধম্মেনাতি উক্খিপিত্ৰা অনোসারিতেন। তেনাহ ‘‘অনুধম্মো ৰুচ্চতী’’তিআদি। এত্থ অনুধম্মোতি ওসারণা ৰুচ্চতীতি সম্বন্ধো। উক্খেপনীযকম্মস্সানুরূপো, পচ্ছা কত্তব্বো ৰা ধম্মোতি অনুধম্মো। অনুলোমৰত্তং দিস্ৰাতি ‘‘ন উপসম্পাদেতব্বং, ন নিস্সযো দাতব্বো’’তিআদিকং (চূল়ৰ॰ ৭০) অট্ঠারসৰিধং ৰত্তং দিস্ৰা, এতেসু অট্ঠারসসু অনুলোমৰত্তেসু ৰত্তন্তং দিস্ৰাতি অধিপ্পাযো। আমিসসম্ভোগং ৰা ধম্মসম্ভোগং ৰাতি এত্থ যং কিঞ্চি আমিসস্স দানং, পটিগ্গহণঞ্চ আমিসসম্ভোগো। ধম্মস্স উদ্দিসনং, উদ্দিসাপনঞ্চ ধম্মসম্ভোগো। সংৰসেয্যাতি ‘‘উপোসথং ৰা পৰারণং ৰা সঙ্ঘকম্মং ৰা’’তি (পাচি॰ ৪২৫) এৰং পদভাজনিযং ৰুত্তং তিৰিধং সংৰাসং করেয্য। যস্মা পনেত্থ উপোসথপৰারণাপি সঙ্ঘেহিযেৰ কাতব্বত্তা সঙ্ঘকম্মানিযেৰ হোন্তি, তস্মা ‘‘উপোসথাদিকং সঙ্ঘকম্মং করেয্যা’’তি ৰুত্তং। পযোগে পযোগেতি দানে দানে, গহণে গহণে চাতি অত্থো।
Akatānudhammenāti ukkhipitvā anosāritena. Tenāha ‘‘anudhammo vuccatī’’tiādi. Ettha anudhammoti osāraṇā vuccatīti sambandho. Ukkhepanīyakammassānurūpo, pacchā kattabbo vā dhammoti anudhammo. Anulomavattaṃ disvāti ‘‘na upasampādetabbaṃ, na nissayo dātabbo’’tiādikaṃ (cūḷava. 70) aṭṭhārasavidhaṃ vattaṃ disvā, etesu aṭṭhārasasu anulomavattesu vattantaṃ disvāti adhippāyo. Āmisasambhogaṃ vā dhammasambhogaṃ vāti ettha yaṃ kiñci āmisassa dānaṃ, paṭiggahaṇañca āmisasambhogo. Dhammassa uddisanaṃ, uddisāpanañca dhammasambhogo. Saṃvaseyyāti ‘‘uposathaṃ vā pavāraṇaṃ vā saṅghakammaṃ vā’’ti (pāci. 425) evaṃ padabhājaniyaṃ vuttaṃ tividhaṃ saṃvāsaṃ kareyya. Yasmā panettha uposathapavāraṇāpi saṅghehiyeva kātabbattā saṅghakammāniyeva honti, tasmā ‘‘uposathādikaṃ saṅghakammaṃ kareyyā’’ti vuttaṃ. Payoge payogeti dāne dāne, gahaṇe gahaṇe cāti attho.
পণ্ণত্তিং অজানন্তেন অরহতাপি কিরিযাব্যাকতচিত্তেন আপজ্জিতব্বত্তা ‘‘তিচিত্ত’’ন্তি ৰুত্তং।
Paṇṇattiṃ ajānantena arahatāpi kiriyābyākatacittena āpajjitabbattā ‘‘ticitta’’nti vuttaṃ.
উক্খিত্তসম্ভোগসিক্খাপদৰণ্ণনা নিট্ঠিতা।
Ukkhittasambhogasikkhāpadavaṇṇanā niṭṭhitā.
