| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
5. угкзбагад̇аважчад̇т̇зраг̇аат̇ааван̣н̣анаа
5. Ukkhepakatavacchattheragāthāvaṇṇanā
угкзбагад̇аважчассаад̇и ааяасмад̇о угкзбагад̇аважчад̇т̇зрасса г̇аат̇аа. гаа уббад̇д̇и? соби гира буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяам̣ бун̃н̃ам̣ убажинанд̇о ид̇о жад̇унавуд̇з габбз сид̣̇д̇хад̇т̇асса бхаг̇авад̇о гаалз гулаг̇зхз ниб̣б̣ад̇д̇ид̇ваа вин̃н̃уд̇ам̣ бад̇д̇о сад̇т̇аарам̣ уд̣̇д̣̇исса маал̣ам̣ гаронд̇асса бууг̇асса згад̇т̇амбхам̣ алабханд̇асса т̇амбхам̣ д̣̇ад̇ваа сахааяагижжам̣ агааси. со д̇зна бун̃н̃агаммзна д̣̇звалогз ниб̣б̣ад̇д̇ид̇ваа абараабарам̣ бун̃н̃аани гад̇ваа д̣̇звамануссзсу сам̣саранд̇о имасмим̣ б̣уд̣̇д̇хуббаад̣̇з саавад̇т̇ияам̣ ан̃н̃ад̇арасса б̣раахман̣асса буд̇д̇о худ̇ваа ниб̣б̣ад̇д̇и, важчод̇исса г̇од̇д̇ад̇о ааг̇ад̇анаамам̣. со сад̇т̇у санд̇игз д̇хаммам̣ суд̇ваа бадилад̣̇д̇хасад̣̇д̇хо баб̣б̣аж̇ид̇ваа госаларадтз г̇аамагааваасз васанд̇о ааг̇ад̇ааг̇ад̇аанам̣ бхигкуунам̣ санд̇игз д̇хаммам̣ барияаабун̣аад̇и. ‘‘аяам̣ винаяо ид̣̇ам̣ суд̇д̇анд̇ам̣ аяам̣ абхид̇хаммо’’д̇и бана барижчзд̣̇ам̣ на ж̇аанаад̇и. ат̇згад̣̇ивасам̣ ааяасманд̇ам̣ д̇хаммасзнаабад̇им̣ бужчид̇ваа яат̇аабарижчзд̣̇ам̣ саб̣б̣ам̣ саллагкзси. д̇хаммасан̇г̇ийд̇ияаа буб̣б̣зби бидагаад̣̇исаман̃н̃аа барияад̇д̇исад̣̇д̇хаммз вавад̇т̇ид̇аа зва, яад̇о бхигкуунам̣ винаяад̇хараад̣̇ивохааро. со д̇збидагам̣ б̣уд̣̇д̇хаважанам̣ уг̇г̇ан̣ханд̇о барибужчанд̇о д̇ад̇т̇а вуд̇д̇з руубааруубад̇хаммз саллагкзд̇ваа вибассанам̣ бадтабзд̇ваа саммасанд̇о нажирассзва арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 1.2.13-26) –
Ukkhepakatavacchassāti āyasmato ukkhepakatavacchattherassa gāthā. Kā uppatti? Sopi kira purimabuddhesu katādhikāro tattha tattha bhave vivaṭṭūpanissayaṃ puññaṃ upacinanto ito catunavute kappe siddhatthassa bhagavato kāle kulagehe nibbattitvā viññutaṃ patto satthāraṃ uddissa māḷaṃ karontassa pūgassa ekatthambhaṃ alabhantassa thambhaṃ datvā sahāyakiccaṃ akāsi. So tena puññakammena devaloke nibbattitvā aparāparaṃ puññāni katvā devamanussesu saṃsaranto imasmiṃ buddhuppāde sāvatthiyaṃ aññatarassa brāhmaṇassa putto hutvā nibbatti, vacchotissa gottato āgatanāmaṃ. So satthu santike dhammaṃ sutvā paṭiladdhasaddho pabbajitvā kosalaraṭṭhe gāmakāvāse vasanto āgatāgatānaṃ bhikkhūnaṃ santike dhammaṃ pariyāpuṇāti. ‘‘Ayaṃ vinayo idaṃ suttantaṃ ayaṃ abhidhammo’’ti pana paricchedaṃ na jānāti. Athekadivasaṃ āyasmantaṃ dhammasenāpatiṃ pucchitvā yathāparicchedaṃ sabbaṃ sallakkhesi. Dhammasaṅgītiyā pubbepi piṭakādisamaññā pariyattisaddhamme vavatthitā eva, yato bhikkhūnaṃ vinayadharādivohāro. So tepiṭakaṃ buddhavacanaṃ uggaṇhanto paripucchanto tattha vutte rūpārūpadhamme sallakkhetvā vipassanaṃ paṭṭhapetvā sammasanto nacirasseva arahattaṃ pāpuṇi. Tena vuttaṃ apadāne (apa. thera 1.2.13-26) –
‘‘сид̣̇д̇хад̇т̇асса бхаг̇авад̇о, махаабууг̇аг̇ан̣о аху;
‘‘Siddhatthassa bhagavato, mahāpūgagaṇo ahu;
саран̣ам̣ г̇ад̇аа жа д̇з б̣уд̣̇д̇хам̣, сад̣̇д̣̇аханд̇и д̇ат̇ааг̇ад̇ам̣.
Saraṇaṃ gatā ca te buddhaṃ, saddahanti tathāgataṃ.
‘‘саб̣б̣з сан̇г̇амма манд̇зд̇ваа, маал̣ам̣ губ̣б̣анд̇и сад̇т̇уно;
‘‘Sabbe saṅgamma mantetvā, māḷaṃ kubbanti satthuno;
згад̇т̇амбхам̣ алабханд̇аа, вижинанд̇и б̣рахааванз.
Ekatthambhaṃ alabhantā, vicinanti brahāvane.
‘‘д̇зхам̣ аран̃н̃з д̣̇исваана, убаг̇амма г̇ан̣ам̣ д̇ад̣̇аа;
‘‘Tehaṃ araññe disvāna, upagamma gaṇaṃ tadā;
ан̃ж̇алим̣ баг̇г̇ахзд̇ваана, бадибужчим̣ г̇ан̣ам̣ ахам̣.
Añjaliṃ paggahetvāna, paṭipucchiṃ gaṇaṃ ahaṃ.
‘‘д̇з мз будтаа вияаагам̣су, сийлаванд̇о убаасагаа;
‘‘Te me puṭṭhā viyākaṃsu, sīlavanto upāsakā;
маал̣ам̣ маяам̣ гад̇д̇угаамаа, згад̇т̇амбхо на лаб̣бхад̇и.
Māḷaṃ mayaṃ kattukāmā, ekatthambho na labbhati.
‘‘згад̇т̇амбхам̣ мамам̣ д̣̇зт̇а, ахам̣ д̣̇ассаами сад̇т̇уно;
‘‘Ekatthambhaṃ mamaṃ detha, ahaṃ dassāmi satthuno;
аахариссаамахам̣ т̇амбхам̣, аббоссуггаа бхаванд̇у д̇з.
Āharissāmahaṃ thambhaṃ, appossukkā bhavantu te.
‘‘д̇з мз т̇амбхам̣ бавзжчим̣су, басаннаа д̇удтамаанасаа;
‘‘Te me thambhaṃ pavecchiṃsu, pasannā tuṭṭhamānasā;
д̇ад̇о бадинивад̇д̇ид̇ваа, аг̇амам̣су сагам̣ гхарам̣.
Tato paṭinivattitvā, agamaṃsu sakaṃ gharaṃ.
‘‘ажирам̣ г̇ад̇з бууг̇аг̇ан̣з, т̇амбхам̣ ахаасахам̣ д̇ад̣̇аа;
‘‘Aciraṃ gate pūgagaṇe, thambhaṃ ahāsahaṃ tadā;
хадто хадтзна жид̇д̇зна, батамам̣ уссабзсахам̣.
Haṭṭho haṭṭhena cittena, paṭhamaṃ ussapesahaṃ.
‘‘д̇зна жид̇д̇аббасаад̣̇зна, вимаанам̣ убабаж̇ж̇ахам̣;
‘‘Tena cittappasādena, vimānaṃ upapajjahaṃ;
уб̣б̣ид̣̇д̇хам̣ бхаванам̣ маяхам̣, сад̇д̇абхуумам̣ самуг̇г̇ад̇ам̣.
Ubbiddhaṃ bhavanaṃ mayhaṃ, sattabhūmaṃ samuggataṃ.
‘‘важ̇ж̇амаанаасу бхзрийсу, барижаарзмахам̣ сад̣̇аа;
‘‘Vajjamānāsu bherīsu, paricāremahaṃ sadā;
бан̃жабан̃н̃аасагаббамхи, рааж̇аа аасим̣ яасод̇харо.
Pañcapaññāsakappamhi, rājā āsiṃ yasodharo.
‘‘д̇ад̇т̇ааби бхаванам̣ маяхам̣, сад̇д̇абхуумам̣ самуг̇г̇ад̇ам̣;
‘‘Tatthāpi bhavanaṃ mayhaṃ, sattabhūmaṃ samuggataṃ;
гуудааг̇аараваруубзд̇ам̣, згад̇т̇амбхам̣ манорамам̣.
Kūṭāgāravarūpetaṃ, ekatthambhaṃ manoramaṃ.
‘‘згавийсад̇игаббамхи , уд̣̇зно наама кад̇д̇ияо;
‘‘Ekavīsatikappamhi , udeno nāma khattiyo;
д̇ад̇рааби бхаванам̣ маяхам̣, сад̇д̇абхуумам̣ самуг̇г̇ад̇ам̣.
Tatrāpi bhavanaṃ mayhaṃ, sattabhūmaṃ samuggataṃ.
‘‘яам̣ яам̣ яонубабаж̇ж̇аами, д̣̇звад̇д̇ам̣ ат̇а маанусам̣;
‘‘Yaṃ yaṃ yonupapajjāmi, devattaṃ atha mānusaṃ;
анубхоми сукам̣ саб̣б̣ам̣, згад̇т̇амбхассид̣̇ам̣ палам̣.
Anubhomi sukhaṃ sabbaṃ, ekatthambhassidaṃ phalaṃ.
‘‘жад̇уннавуд̇ид̇о габбз, яам̣ т̇амбхамад̣̇ад̣̇ам̣ д̇ад̣̇аа;
‘‘Catunnavutito kappe, yaṃ thambhamadadaṃ tadā;
д̣̇уг̇г̇ад̇им̣ наабхиж̇аанаами, згад̇т̇амбхассид̣̇ам̣ палам̣.
Duggatiṃ nābhijānāmi, ekatthambhassidaṃ phalaṃ.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
арахад̇д̇ам̣ бана бад̇ваа гад̇агижжад̇д̇аа агилаасубхаавз тид̇о ад̇д̇ано санд̇игам̣ убаг̇ад̇аанам̣ г̇ахадтабаб̣б̣аж̇ид̇аанам̣ анугамбам̣ убаад̣̇ааяа д̇збидагам̣ б̣уд̣̇д̇хаважанам̣ виймам̣сид̇ваа д̇хаммам̣ д̣̇зсзси. д̣̇зсзнд̇о жа згад̣̇ивасам̣ ад̇д̇аанам̣ барам̣ вияа гад̇ваа д̣̇ассзнд̇о –
Arahattaṃ pana patvā katakiccattā akilāsubhāve ṭhito attano santikaṃ upagatānaṃ gahaṭṭhapabbajitānaṃ anukampaṃ upādāya tepiṭakaṃ buddhavacanaṃ vīmaṃsitvā dhammaṃ desesi. Desento ca ekadivasaṃ attānaṃ paraṃ viya katvā dassento –
65.
65.
‘‘угкзбагад̇аважчасса, сан̇галид̇ам̣ б̣ахуухи вассзхи;
‘‘Ukkhepakatavacchassa, saṅkalitaṃ bahūhi vassehi;
д̇ам̣ бхаасад̇и г̇ахадтаанам̣, сунисинно ул̣аарабаамож̇ж̇о’’д̇и. – г̇аат̇ам̣ абхааси;
Taṃ bhāsati gahaṭṭhānaṃ, sunisinno uḷārapāmojjo’’ti. – gāthaṃ abhāsi;
д̇ад̇т̇а угкзбагад̇аважчассаад̇и гад̇аугкзбаважчасса, бхигкуно санд̇игз висум̣ висум̣ уг̇г̇ахид̇ам̣ винаяабад̣̇зсам̣ суд̇д̇абад̣̇зсам̣ абхид̇хаммабад̣̇зсан̃жа яат̇аабарижчзд̣̇ам̣ винаяасуд̇д̇аабхид̇хаммаанам̣язва убари кибид̇ваа саж̇жхааяанавасзна д̇ад̇т̇а д̇ад̇т̇зва багкибид̇ваа тид̇аважчзнаад̇и ад̇т̇о гаран̣ад̇т̇з хи ид̣̇ам̣ саамиважанам̣. сан̇галид̇ам̣ б̣ахуухи вассзхийд̇и б̣ахугзхи сам̣важчарзхи самбин̣д̣анавасзна хад̣̇аяз табид̇ам̣. ‘‘сан̇калид̇а’’нд̇иби баато, сан̇калид̇ам̣ вияа гад̇ам̣ згааб̣ад̣̇д̇хавасзна ваажуг̇г̇ад̇ам̣ гад̇ам̣. яам̣ б̣уд̣̇д̇хаважананд̇и важанасзсо. д̇анд̇и д̇ам̣ барияад̇д̇ид̇хаммам̣ бхаасад̇и гат̇зд̇и. г̇ахадтаананд̇и д̇зсам̣ язбхуяяад̇ааяа вуд̇д̇ам̣. сунисиннод̇и д̇асмим̣ д̇хаммз саммаа нижжало нисинно, лаабхасаггаараад̣̇им̣ абажжаасийсанд̇о гзвалам̣ вимуд̇д̇ааяад̇анасийсзязва тад̇ваа гат̇зд̇ийд̇и ад̇т̇о. д̇знааха ‘‘ул̣аарабаамож̇ж̇о’’д̇и паласамаабад̇д̇исукавасзна д̇хаммад̣̇зсанаавасзнзва жа уббаннаул̣аарабаамож̇ж̇од̇и. вуд̇д̇ан̃хзд̇ам̣ –
Tattha ukkhepakatavacchassāti kataukkhepavacchassa, bhikkhuno santike visuṃ visuṃ uggahitaṃ vinayapadesaṃ suttapadesaṃ abhidhammapadesañca yathāparicchedaṃ vinayasuttābhidhammānaṃyeva upari khipitvā sajjhāyanavasena tattha tattheva pakkhipitvā ṭhitavacchenāti attho karaṇatthe hi idaṃ sāmivacanaṃ. Saṅkalitaṃ bahūhi vassehīti bahukehi saṃvaccharehi sampiṇḍanavasena hadaye ṭhapitaṃ. ‘‘Saṅkhalita’’ntipi pāṭho, saṅkhalitaṃ viya kataṃ ekābaddhavasena vācuggataṃ kataṃ. Yaṃ buddhavacananti vacanaseso. Tanti taṃ pariyattidhammaṃ bhāsati katheti. Gahaṭṭhānanti tesaṃ yebhuyyatāya vuttaṃ. Sunisinnoti tasmiṃ dhamme sammā niccalo nisinno, lābhasakkārādiṃ apaccāsīsanto kevalaṃ vimuttāyatanasīseyeva ṭhatvā kathetīti attho. Tenāha ‘‘uḷārapāmojjo’’ti phalasamāpattisukhavasena dhammadesanāvaseneva ca uppannauḷārapāmojjoti. Vuttañhetaṃ –
‘‘яат̇аа яат̇аавусо бхигку, яат̇аасуд̇ам̣ яат̇аабарияад̇д̇ам̣ д̇хаммам̣ вид̇т̇аарзна барзсам̣ д̣̇зсзд̇и д̇ат̇аа д̇ат̇аа со д̇асмим̣ д̇хаммз лабхад̇и ад̇т̇авзд̣̇ам̣, лабхад̇и д̇хаммавзд̣̇ам̣, лабхад̇и д̇хаммуубасам̣хид̇ам̣ баамож̇ж̇а’’нд̇иаад̣̇и (д̣̇ий. ни. 3.355).
‘‘Yathā yathāvuso bhikkhu, yathāsutaṃ yathāpariyattaṃ dhammaṃ vitthārena paresaṃ deseti tathā tathā so tasmiṃ dhamme labhati atthavedaṃ, labhati dhammavedaṃ, labhati dhammūpasaṃhitaṃ pāmojja’’ntiādi (dī. ni. 3.355).
угкзбагад̇аважчад̇т̇зраг̇аат̇ааван̣н̣анаа нидтид̇аа.
Ukkhepakatavacchattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 5. угкзбагад̇аважчад̇т̇зраг̇аат̇аа • 5. Ukkhepakatavacchattheragāthā
