| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
37. உக்³க³ஹனித்³தே³ஸவண்ணனா
37. Uggahaniddesavaṇṇanā
281. த³ஸபே⁴த³ம்பீதி ஸசே கேனசி ஹெட்டா² த³ஸ்ஸிதங் த³ஸவித⁴ங் ரதனங் ஆனெத்வா ‘‘இத³ங் ஸங்க⁴ஸ்ஸ வா சேதியஸ்ஸ வா நவகம்மஸ்ஸ வா அஞ்ஞபுக்³க³லஸ்ஸ வா ஸுத்தந்திகக³ணஸ்ஸ வா த³ம்மீ’’தி வுத்தே ‘‘ஸாதூ⁴’’தி ஸம்படிச்ச²ந்தஸ்ஸ து³க்கடங் ஹோதீதி அத்தோ².
281.Dasabhedampīti sace kenaci heṭṭhā dassitaṃ dasavidhaṃ ratanaṃ ānetvā ‘‘idaṃ saṅghassa vā cetiyassa vā navakammassa vā aññapuggalassa vā suttantikagaṇassa vā dammī’’ti vutte ‘‘sādhū’’ti sampaṭicchantassa dukkaṭaṃ hotīti attho.
282-3. தேஸு த³ஸவிதே⁴ஸு ரதனேஸூதி அத்தோ². த்³வீஸூதி ரஜதஜாதரூபேஸு. க³ணஸங்க⁴புக்³க³லே (பாரா॰ அட்ட²॰ 2.538-539) அனாமஸித்வா ‘‘இத³ங் ஹிரஞ்ஞஸுவண்ணங் சேதியஸ்ஸ த³ம்மி, நவகம்மஸ்ஸ த³ம்மீ’’தி வுத்தே ந படிக்கி²பேதி அத்தோ². கிங் காதப்³ப³ந்தி சே? தங் த³ஸ்ஸேதுங் ‘‘வதே³’’திஆதி³ வுத்தங். ‘‘இமே ஏவங் வத³ந்தீ’’தி கப்பியகாரானங் ஆசிக்கி²தப்³ப³ந்தி அத்தோ².
282-3. Tesu dasavidhesu ratanesūti attho. Dvīsūti rajatajātarūpesu. Gaṇasaṅghapuggale (pārā. aṭṭha. 2.538-539) anāmasitvā ‘‘idaṃ hiraññasuvaṇṇaṃ cetiyassa dammi, navakammassa dammī’’ti vutte na paṭikkhipeti attho. Kiṃ kātabbanti ce? Taṃ dassetuṃ ‘‘vade’’tiādi vuttaṃ. ‘‘Ime evaṃ vadantī’’ti kappiyakārānaṃ ācikkhitabbanti attho.
284. ந கேவலங் ஹிரஞ்ஞஸுவண்ணாதி³கமேவ, அஞ்ஞம்பி கெ²த்தவத்தா²தி³கங் அகப்பியங் ந ஸம்படிச்சி²தப்³ப³ந்தி தங் த³ஸ்ஸேதுங் ‘‘கெ²த்தங் வத்து²’’ந்திஆதி³மாஹ. தா³ஸபஸுஆதி³கங் தா³ஸபஸ்வாதி³கங். ஸசே ஹி கோசி ‘‘மய்ஹங் ஸஸ்ஸஸம்பாத³கங் மஹாதளாகங் அத்தி², தங் ஸங்க⁴ஸ்ஸ த³ம்மீ’’தி வத³தி, தஞ்சே ஸங்கோ⁴ ஸம்படிச்ச²தி. படிக்³க³ஹணேபி பரிபோ⁴கே³பி ஆபத்தியேவ. ஏவங் ஸேஸேஸுபி.
284. Na kevalaṃ hiraññasuvaṇṇādikameva, aññampi khettavatthādikaṃ akappiyaṃ na sampaṭicchitabbanti taṃ dassetuṃ ‘‘khettaṃ vatthu’’ntiādimāha. Dāsapasuādikaṃ dāsapasvādikaṃ. Sace hi koci ‘‘mayhaṃ sassasampādakaṃ mahātaḷākaṃ atthi, taṃ saṅghassa dammī’’ti vadati, tañce saṅgho sampaṭicchati. Paṭiggahaṇepi paribhogepi āpattiyeva. Evaṃ sesesupi.
கப்பியேன கமேன க³ண்ஹெய்யாதி ஸம்ப³ந்தோ⁴. ‘‘கெ²த்தங் த³ம்மீ’’தி வுத்தே ‘‘ந வட்டதீ’’தி படிக்கி²பித்வா ‘‘இதோ சத்தாரோ பச்சயே பரிபு⁴ஞ்ஜதா²’’தி வா ‘‘சதுபச்சயபரிபோ⁴க³த்தா²ய த³ம்மீ’’தி வா வத³தி சே, க³ஹேதப்³ப³ங். வத்து²ம்ஹிபி ஏஸேவ நயோ. ‘‘தளாகங் த³ம்மீ’’தி வுத்தே படிக்கி²பித்வா ‘‘சத்தாரோ பச்சயே பரிபு⁴ஞ்ஜதா²’’தி வா ‘‘ஸங்கோ⁴ உத³கங் பரிபு⁴ஞ்ஜிஸ்ஸதி, ப⁴ண்ட³கங் தோ⁴விஸ்ஸதீ’’தி வா ஆதி³னா நயேன வுத்தே ஸம்படிச்சி²தப்³ப³ங். ‘‘தா³ஸங் த³ம்மீ’’தி வுத்தே படிக்கி²பித்வா ‘‘ஆராமிகங், வெய்யாவச்சகரங், கப்பியகாரகங் த³ம்மீ’’தி வுத்தே ஸம்படிச்சி²தப்³ப³ங். ‘‘கோ³மஹிங்ஸஅஜேளகாத³யோ த³ம்மீ’’தி வுத்தே படிக்கி²பித்வா ‘‘பஞ்சகோ³ரஸபரிபோ⁴க³த்தா²யா’’தி வுத்தே ஸம்படிச்சி²தப்³ப³ங். ஏதி³ஸங் க³ஹணங் ஸந்தா⁴ய ‘‘படிக்கி²பித்வா க³ண்ஹெய்யா’’தி வுத்தங்.
Kappiyena kamena gaṇheyyāti sambandho. ‘‘Khettaṃ dammī’’ti vutte ‘‘na vaṭṭatī’’ti paṭikkhipitvā ‘‘ito cattāro paccaye paribhuñjathā’’ti vā ‘‘catupaccayaparibhogatthāya dammī’’ti vā vadati ce, gahetabbaṃ. Vatthumhipi eseva nayo. ‘‘Taḷākaṃ dammī’’ti vutte paṭikkhipitvā ‘‘cattāro paccaye paribhuñjathā’’ti vā ‘‘saṅgho udakaṃ paribhuñjissati, bhaṇḍakaṃ dhovissatī’’ti vā ādinā nayena vutte sampaṭicchitabbaṃ. ‘‘Dāsaṃ dammī’’ti vutte paṭikkhipitvā ‘‘ārāmikaṃ, veyyāvaccakaraṃ, kappiyakārakaṃ dammī’’ti vutte sampaṭicchitabbaṃ. ‘‘Gomahiṃsaajeḷakādayo dammī’’ti vutte paṭikkhipitvā ‘‘pañcagorasaparibhogatthāyā’’ti vutte sampaṭicchitabbaṃ. Edisaṃ gahaṇaṃ sandhāya ‘‘paṭikkhipitvā gaṇheyyā’’ti vuttaṃ.
285-6. நவமாதிககேதா³ரதளாககிரியா (பாரா॰ அட்ட²॰ 2.238-239) ச அனவே புப்³பே³ கப்பியவோஹாரேன படிக்கி²பித்வா க³ஹிததளாகே மத்திகுத்³த⁴ரணஞ்ச பி⁴ன்னட்டா²னே பாளிப³ந்தோ⁴ ச து³ப்³ப³லட்டா²னே ஆளியா தி²ரகாரோ ச அனவே கேதா³ரே புராணபா⁴க³தோ அதிரேகபா⁴க³க்³க³ஹணஞ்ச நவே கேதா³ரே அபரிச்சி²ன்னபா⁴கே³ ‘‘ஸஸ்ஸே தே³த² எத்தகே’’தி கஹாபணுட்டா²பனஞ்சாபீதி இத³ங் ஸப்³ப³ங் பி⁴க்கு²ஸ்ஸ காதுங் ந வட்டதி. ஸசே கரோதி, ஏவமாதி³கங் ஸப்³பே³ஸம்பி அகப்பியந்தி அத்தோ².
285-6.Navamātikakedārataḷākakiriyā (pārā. aṭṭha. 2.238-239) ca anave pubbe kappiyavohārena paṭikkhipitvā gahitataḷāke mattikuddharaṇañca bhinnaṭṭhāne pāḷibandho ca dubbalaṭṭhāne āḷiyā thirakāro ca anave kedāre purāṇabhāgato atirekabhāgaggahaṇañca nave kedāre aparicchinnabhāge ‘‘sasse detha ettake’’ti kahāpaṇuṭṭhāpanañcāpīti idaṃ sabbaṃ bhikkhussa kātuṃ na vaṭṭati. Sace karoti, evamādikaṃ sabbesampi akappiyanti attho.
287-9. இதா³னி தங்யேவ அகப்பியங் த³ஸ்ஸேதுங் ‘‘அவத்வா’’திஆதி³ வுத்தங். தஸ்ஸத்தோ² (பாரா॰ அட்ட²॰ 2.238-239) – யோ பன ‘‘கஸ, வப்ப’’ இச்சாதி³கங் அவத்வா ‘‘எத்திகாய பூ⁴மியா எத்தகோ பா⁴கோ³ தெ³ய்யோ’’தி பூ⁴மிங் வா பதிட்டா²பேதி, ‘‘எத்தகே பூ⁴மிபா⁴கே³ ஸஸ்ஸங் கதங், எத்தகங் க³ண்ஹதா²’’தி கஸ்ஸகே வத³ந்தே பமாணக³ண்ஹனத்த²ங் த³ண்ட³ரஜ்ஜுபி⁴ மினதி, க²லே ட²த்வா ரக்க²ணாதீ³னி கரோதி, தஸ்ஸேவ அகப்பியந்தி.
287-9. Idāni taṃyeva akappiyaṃ dassetuṃ ‘‘avatvā’’tiādi vuttaṃ. Tassattho (pārā. aṭṭha. 2.238-239) – yo pana ‘‘kasa, vappa’’ iccādikaṃ avatvā ‘‘ettikāya bhūmiyā ettako bhāgo deyyo’’ti bhūmiṃ vā patiṭṭhāpeti, ‘‘ettake bhūmibhāge sassaṃ kataṃ, ettakaṃ gaṇhathā’’ti kassake vadante pamāṇagaṇhanatthaṃ daṇḍarajjubhi minati, khale ṭhatvā rakkhaṇādīni karoti, tasseva akappiyanti.
290. ப⁴ண்டா³கா³ரிகஸீஸேன பிதுஸந்தகம்பி ஸசே படிஸாமெய்ய, பாசித்தியந்தி அத்தோ².
290. Bhaṇḍāgārikasīsena pitusantakampi sace paṭisāmeyya, pācittiyanti attho.
291-2. பிதூனந்தி மாதாபிதூனங். ஸாடகாதி³கப்பியங் வத்து²ங். ‘‘படிஸாமெத்வா தே³ஹீ’’தி வுத்தேதி ஸம்ப³ந்தோ⁴. பாதெத்வான க³தே யஸ்மா அஜ்ஜா²ராமஸிக்கா²பத³வஸேன (பாசி॰ 505-506) பலிபோ³தோ⁴, தஸ்மா கோ³பிதுங் லப்³ப⁴ந்தி அத்தோ².
291-2.Pitūnanti mātāpitūnaṃ. Sāṭakādikappiyaṃ vatthuṃ. ‘‘Paṭisāmetvā dehī’’ti vutteti sambandho. Pātetvāna gate yasmā ajjhārāmasikkhāpadavasena (pāci. 505-506) palibodho, tasmā gopituṃ labbhanti attho.
293-4. ஸகங் வாஸிஆதி³பரிக்கா²ரந்தி அத்தோ². இத³ங் டா²னங் கு³த்தந்தி த³ஸ்ஸேதப்³ப³ங். ‘‘எத்த² ட²பேதா²’’தி பன ந வத்தப்³ப³ங்.
293-4.Sakaṃ vāsiādiparikkhāranti attho. Idaṃ ṭhānaṃ guttanti dassetabbaṃ. ‘‘Ettha ṭhapethā’’ti pana na vattabbaṃ.
295. எத்த² ‘‘அஞ்ஞோ கோசி ந பவிஸதி, பி⁴க்கூ²ஹி வா ஸாமணேரேஹி வா க³ஹிதங் ப⁴விஸ்ஸதீ’’தி ஸங்கந்தீதி அத்தோ². வத்து²ம்ஹீதி அலங்காராதி³வத்து²ம்ஹீதி அத்தோ². தாதி³ஸேதி யாதி³ஸே வத்து²ம்ஹி நட்டே² ஆஸங்கா ஹோதி, தாதி³ஸே வத்து²ம்ஹி நட்டே²தி ஸம்ப³ந்தோ⁴.
295. Ettha ‘‘añño koci na pavisati, bhikkhūhi vā sāmaṇerehi vā gahitaṃ bhavissatī’’ti saṅkantīti attho. Vatthumhīti alaṅkārādivatthumhīti attho. Tādiseti yādise vatthumhi naṭṭhe āsaṅkā hoti, tādise vatthumhi naṭṭheti sambandho.
296. இதா³னி அஸங்கிதப்³ப³ட்டா²னங் த³ஸ்ஸேதுங் ‘‘விஹாராவஸத²ஸ்ஸந்தோ’’திஆதி³மாஹ. விஹாரஸ்ஸ ச க⁴ரஸ்ஸ சாதி அத்தோ². ரதனந்தி த³ஸவித⁴ங் ரதனங். ரத்னஸம்மதந்தி ஸாடகவேட²னாதி³கங். க³ஹெத்வானாதி கப்பியகாரகே அஸதி அத்தனாபி க³ஹெத்வான நிக்கி²பெய்யாதி அத்தோ². மக்³கே³ரஞ்ஞேபீதி மக்³கே³பி அரஞ்ஞேபி. தாதி³ஸேதி ‘‘பி⁴க்கூ²ஹி க³ஹிதங் ப⁴விஸ்ஸதீ’’தி ஆஸங்கிதப்³ப³ட்டா²னே. பதிரூபங் கரீயதீதி மக்³கே³ வா அரஞ்ஞே வா தாதி³ஸங் ப⁴ண்ட³ங் பஸ்ஸித்வா மக்³கா³ ஓக்கம்ம நிஸீதி³தப்³ப³ங், ஸாமிகேஸு ஆக³தேஸு தங் டா²னங் ஆசிக்கி²தப்³ப³ங். ஸசே ஸாமிகே ந பஸ்ஸதி, ரதனஸம்மதங் பங்ஸுகூலங் க³ஹேதப்³ப³ங். ரதனஞ்சே ஹோதி, துண்ஹீபூ⁴தேன க³ந்தப்³ப³ந்தி அத்தோ². அயங் மக்³கா³ரஞ்ஞகேஸு படிபத்தி. விஹாராவஸதா²னங் பன அந்தோ தாதி³ஸங் தி³ஸ்வா ப⁴ண்ட³கங் முஞ்சித்வா ‘‘எத்த² எத்தகா கஹாபணா’’திஆதி³னா நயேன ரூபேன வா லஞ்ச²னாய வா பிலோதிகாய வா ஸஞ்ஞாணங் கத்வா நிக்கி²பிதப்³ப³ங், ததோ பக்கமந்தேன பதிரூபானங் பி⁴க்கூ²னங் ஆசிக்கி²தப்³ப³ங். உக்³க³ஹவினிச்ச²யோ.
296. Idāni asaṅkitabbaṭṭhānaṃ dassetuṃ ‘‘vihārāvasathassanto’’tiādimāha. Vihārassa ca gharassa cāti attho. Ratananti dasavidhaṃ ratanaṃ. Ratnasammatanti sāṭakaveṭhanādikaṃ. Gahetvānāti kappiyakārake asati attanāpi gahetvāna nikkhipeyyāti attho. Maggeraññepīti maggepi araññepi. Tādiseti ‘‘bhikkhūhi gahitaṃ bhavissatī’’ti āsaṅkitabbaṭṭhāne. Patirūpaṃ karīyatīti magge vā araññe vā tādisaṃ bhaṇḍaṃ passitvā maggā okkamma nisīditabbaṃ, sāmikesu āgatesu taṃ ṭhānaṃ ācikkhitabbaṃ. Sace sāmike na passati, ratanasammataṃ paṃsukūlaṃ gahetabbaṃ. Ratanañce hoti, tuṇhībhūtena gantabbanti attho. Ayaṃ maggāraññakesu paṭipatti. Vihārāvasathānaṃ pana anto tādisaṃ disvā bhaṇḍakaṃ muñcitvā ‘‘ettha ettakā kahāpaṇā’’tiādinā nayena rūpena vā lañchanāya vā pilotikāya vā saññāṇaṃ katvā nikkhipitabbaṃ, tato pakkamantena patirūpānaṃ bhikkhūnaṃ ācikkhitabbaṃ. Uggahavinicchayo.
உக்³க³ஹனித்³தே³ஸவண்ணனா நிட்டி²தா.
Uggahaniddesavaṇṇanā niṭṭhitā.
