| Library / Tipiṭaka / တိပိဋက • Tipiṭaka / မဟာဝိဘင္ဂ • Mahāvibhaṅga |
၂. ဥဒောသိတသိက္ခာပဒံ
2. Udositasikkhāpadaṃ
၄၇၁. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန ဘိက္ခူ ဘိက္ခူနံ ဟတ္ထေ စီဝရံ နိက္ခိပိတ္ဝာ သန္တရုတ္တရေန ဇနပဒစာရိကံ ပက္ကမန္တိ။ တာနိ စီဝရာနိ စိရံ နိက္ခိတ္တာနိ ကဏ္ဏကိတာနိ ဟောန္တိ။ တာနိ ဘိက္ခူ ဩတာပေန္တိ။ အဒ္ဒသာ ခော အာယသ္မာ အာနန္ဒော သေနာသနစာရိကံ အာဟိဏ္ဍန္တော တေ ဘိက္ခူ တာနိ စီဝရာနိ ဩတာပေန္တေ။ ဒိသ္ဝာန ယေန တေ ဘိက္ခူ တေနုပသင္ကမိ; ဥပသင္ကမိတ္ဝာ တေ ဘိက္ခူ ဧတဒဝောစ – ‘‘ကသ္သိမာနိ, အာဝုသော, စီဝရာနိ ကဏ္ဏကိတာနီ’’တိ? အထ ခော တေ ဘိက္ခူ အာယသ္မတော အာနန္ဒသ္သ ဧတမတ္ထံ အာရောစေသုံ။ အာယသ္မာ အာနန္ဒော ဥဇ္ဈာယတိ ခိယ္ယတိ ဝိပာစေတိ – ‘‘ကထဉ္ဟိ နာမ ဘိက္ခူ ဘိက္ခူနံ ဟတ္ထေ စီဝရံ နိက္ခိပိတ္ဝာ သန္တရုတ္တရေန ဇနပဒစာရိကံ ပက္ကမိသ္သန္တီ’’တိ! အထ ခော အာယသ္မာ အာနန္ဒော တေ ဘိက္ခူ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသိ။ပေ.။ ‘‘သစ္စံ ကိရ, ဘိက္ခဝေ, ဘိက္ခူ ဘိက္ခူနံ ဟတ္ထေ စီဝရံ နိက္ခိပိတ္ဝာ သန္တရုတ္တရေန ဇနပဒစာရိကံ ပက္ကမန္တီ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တေ, ဘိက္ခဝေ, မောဃပုရိသာ ဘိက္ခူနံ ဟတ္ထေ စီဝရံ နိက္ခိပိတ္ဝာ သန္တရုတ္တရေန ဇနပဒစာရိကံ ပက္ကမိသ္သန္တိ ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –
471. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhū bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamanti. Tāni cīvarāni ciraṃ nikkhittāni kaṇṇakitāni honti. Tāni bhikkhū otāpenti. Addasā kho āyasmā ānando senāsanacārikaṃ āhiṇḍanto te bhikkhū tāni cīvarāni otāpente. Disvāna yena te bhikkhū tenupasaṅkami; upasaṅkamitvā te bhikkhū etadavoca – ‘‘kassimāni, āvuso, cīvarāni kaṇṇakitānī’’ti? Atha kho te bhikkhū āyasmato ānandassa etamatthaṃ ārocesuṃ. Āyasmā ānando ujjhāyati khiyyati vipāceti – ‘‘kathañhi nāma bhikkhū bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamissantī’’ti! Atha kho āyasmā ānando te bhikkhū anekapariyāyena vigarahitvā bhagavato etamatthaṃ ārocesi…pe… ‘‘saccaṃ kira, bhikkhave, bhikkhū bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamantī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā bhikkhūnaṃ hatthe cīvaraṃ nikkhipitvā santaruttarena janapadacārikaṃ pakkamissanti ! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
၄၇၂. ‘‘နိဋ္ဌိတစီဝရသ္မိံ ဘိက္ခုနာ ဥဗ္ဘတသ္မိံ ကထိနေ ဧကရတ္တမ္ပိ စေ ဘိက္ခု တိစီဝရေန ဝိပ္ပဝသေယ္ယ, နိသ္သဂ္ဂိယံ ပာစိတ္တိယ’’န္တိ။
472.‘‘Niṭṭhitacīvarasmiṃ bhikkhunā ubbhatasmiṃ kathine ekarattampi ce bhikkhu ticīvarena vippavaseyya, nissaggiyaṃ pācittiya’’nti.
ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ။
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
၄၇၃. တေန ခော ပန သမယေန အညတရော ဘိက္ခု ကောသမ္ဗိယံ ဂိလာနော ဟောတိ။ ဉာတကာ တသ္သ ဘိက္ခုနော သန္တိကေ ဒူတံ ပာဟေသုံ – ‘‘အာဂစ္ဆတု ဘဒန္တော, မယံ, ဥပဋ္ဌဟိသ္သာမာ’’တိ။ ဘိက္ခူပိ ဧဝမာဟံသု – ‘‘ဂစ္ဆာဝုသော , ဉာတကာ တံ ဥပဋ္ဌဟိသ္သန္တီ’’တိ။ သော ဧဝမာဟ – ‘‘ဘဂဝတာဝုသော, သိက္ခာပဒံ ပညတ္တံ – ‘န တိစီဝရေန ဝိပ္ပဝသိတဗ္ဗ’န္တိ။ အဟဉ္စမ္ဟိ ဂိလာနော။ န သက္ကောမိ တိစီဝရံ အာဒာယ ပက္ကမိတုံ။ နာဟံ ဂမိသ္သာမီ’’တိ ။ ဘဂဝတော ဧတမတ္ထံ အာရောစေသုံ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ဂိလာနသ္သ ဘိက္ခုနော တိစီဝရေန အဝိပ္ပဝာသသမ္မုတိံ ဒာတုံ။ ဧဝဉ္စ ပန, ဘိက္ခဝေ, ဒာတဗ္ဗာ။ တေန ဂိလာနေန ဘိက္ခုနာ သင္ဃံ ဥပသင္ကမိတ္ဝာ ဧကံသံ ဥတ္တရာသင္ဂံ ကရိတ္ဝာ ဝုဍ္ဎာနံ ဘိက္ခူနံ ပာဒေ ဝန္ဒိတ္ဝာ ဥက္ကုဋိကံ နိသီဒိတ္ဝာ အဉ္ဇလိံ ပဂ္ဂဟေတ္ဝာ ဧဝမသ္သ ဝစနီယော – ‘အဟံ, ဘန္တေ, ဂိလာနော။ န သက္ကောမိ တိစီဝရံ အာဒာယ ပက္ကမိတုံ။ သောဟံ, ဘန္တေ, သင္ဃံ တိစီဝရေန အဝိပ္ပဝာသသမ္မုတိံ ယာစာမီ’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗ္ယတ္တေန ဘိက္ခုနာ ပဋိဗလေန သင္ဃော ဉာပေတဗ္ဗော –
473. Tena kho pana samayena aññataro bhikkhu kosambiyaṃ gilāno hoti. Ñātakā tassa bhikkhuno santike dūtaṃ pāhesuṃ – ‘‘āgacchatu bhadanto, mayaṃ, upaṭṭhahissāmā’’ti. Bhikkhūpi evamāhaṃsu – ‘‘gacchāvuso , ñātakā taṃ upaṭṭhahissantī’’ti. So evamāha – ‘‘bhagavatāvuso, sikkhāpadaṃ paññattaṃ – ‘na ticīvarena vippavasitabba’nti. Ahañcamhi gilāno. Na sakkomi ticīvaraṃ ādāya pakkamituṃ. Nāhaṃ gamissāmī’’ti . Bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, gilānassa bhikkhuno ticīvarena avippavāsasammutiṃ dātuṃ. Evañca pana, bhikkhave, dātabbā. Tena gilānena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘ahaṃ, bhante, gilāno. Na sakkomi ticīvaraṃ ādāya pakkamituṃ. Sohaṃ, bhante, saṅghaṃ ticīvarena avippavāsasammutiṃ yācāmī’ti. Dutiyampi yācitabbā. Tatiyampi yācitabbā. Byattena bhikkhunā paṭibalena saṅgho ñāpetabbo –
၄၇၄. ‘‘သုဏာတု မေ, ဘန္တေ, သင္ဃော။ အယံ ဣတ္ထန္နာမော ဘိက္ခု ဂိလာနော။ န သက္ကောတိ တိစီဝရံ အာဒာယ ပက္ကမိတုံ။ သော သင္ဃံ တိစီဝရေန အဝိပ္ပဝာသသမ္မုတိံ ယာစတိ။ ယဒိ သင္ဃသ္သ ပတ္တကလ္လံ, သင္ဃော ဣတ္ထန္နာမသ္သ ဘိက္ခုနော တိစီဝရေန အဝိပ္ပဝာသသမ္မုတိံ ဒဒေယ္ယ။ ဧသာ ဉတ္တိ။
474. ‘‘Suṇātu me, bhante, saṅgho. Ayaṃ itthannāmo bhikkhu gilāno. Na sakkoti ticīvaraṃ ādāya pakkamituṃ. So saṅghaṃ ticīvarena avippavāsasammutiṃ yācati. Yadi saṅghassa pattakallaṃ, saṅgho itthannāmassa bhikkhuno ticīvarena avippavāsasammutiṃ dadeyya. Esā ñatti.
‘‘သုဏာတု မေ, ဘန္တေ, သင္ဃော။ အယံ ဣတ္ထန္နာမော ဘိက္ခု ဂိလာနော။ န သက္ကောတိ တိစီဝရံ အာဒာယ ပက္ကမိတုံ။ သော သင္ဃံ တိစီဝရေန အဝိပ္ပဝာသသမ္မုတိံ ယာစတိ။ သင္ဃော ဣတ္ထန္နာမသ္သ ဘိက္ခုနော တိစီဝရေန အဝိပ္ပဝာသသမ္မုတိံ ဒေတိ။ ယသ္သာယသ္မတော ခမတိ ဣတ္ထန္နာမသ္သ ဘိက္ခုနော တိစီဝရေန အဝိပ္ပဝာသသမ္မုတိယာ ဒာနံ, သော တုဏ္ဟသ္သ; ယသ္သ နက္ခမတိ, သော ဘာသေယ္ယ။
‘‘Suṇātu me, bhante, saṅgho. Ayaṃ itthannāmo bhikkhu gilāno. Na sakkoti ticīvaraṃ ādāya pakkamituṃ. So saṅghaṃ ticīvarena avippavāsasammutiṃ yācati. Saṅgho itthannāmassa bhikkhuno ticīvarena avippavāsasammutiṃ deti. Yassāyasmato khamati itthannāmassa bhikkhuno ticīvarena avippavāsasammutiyā dānaṃ, so tuṇhassa; yassa nakkhamati, so bhāseyya.
‘‘ဒိန္နာ သင္ဃေန ဣတ္ထန္နာမသ္သ ဘိက္ခုနော တိစီဝရေန အဝိပ္ပဝာသသမ္မုတိ။ ခမတိ သင္ဃသ္သ, တသ္မာ တုဏ္ဟီ, ဧဝမေတံ ဓာရယာမီ’’တိ။
‘‘Dinnā saṅghena itthannāmassa bhikkhuno ticīvarena avippavāsasammuti. Khamati saṅghassa, tasmā tuṇhī, evametaṃ dhārayāmī’’ti.
ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –
Evañca pana, bhikkhave, imaṃ sikkhāpadaṃ uddiseyyātha –
၄၇၅. ‘‘နိဋ္ဌိတစီဝရသ္မိံ ဘိက္ခုနာ ဥဗ္ဘတသ္မိံ ကထိနေ ဧကရတ္တမ္ပိ စေ ဘိက္ခု တိစီဝရေန ဝိပ္ပဝသေယ္ယ, အညတ္ရ ဘိက္ခုသမ္မုတိယာ, နိသ္သဂ္ဂိယံ ပာစိတ္တိယ’’န္တိ။
475.‘‘Niṭṭhitacīvarasmiṃ bhikkhunā ubbhatasmiṃ kathine ekarattampi ce bhikkhu ticīvarena vippavaseyya, aññatra bhikkhusammutiyā, nissaggiyaṃ pācittiya’’nti.
၄၇၆. ‘‘နိဋ္ဌိတစီဝရသ္မိန္တိ ဘိက္ခုနော စီဝရံ ကတံ ဝာ ဟောတိ နဋ္ဌံ ဝာ ဝိနဋ္ဌံ ဝာ ဒဍ္ဎံ ဝာ စီဝရာသာ ဝာ ဥပစ္ဆိန္နာ။
476.‘‘Niṭṭhitacīvarasminti bhikkhuno cīvaraṃ kataṃ vā hoti naṭṭhaṃ vā vinaṭṭhaṃ vā daḍḍhaṃ vā cīvarāsā vā upacchinnā.
ဥဗ္ဘတသ္မိံ ကထိနေတိ အဋ္ဌန္နံ မာတိကာနံ အညတရာယ မာတိကာယ ဥဗ္ဘတံ ဟောတိ, သင္ဃေန ဝာ အန္တရာ ဥဗ္ဘတံ ဟောတိ။
Ubbhatasmiṃkathineti aṭṭhannaṃ mātikānaṃ aññatarāya mātikāya ubbhataṃ hoti, saṅghena vā antarā ubbhataṃ hoti.
ဧကရတ္တမ္ပိ စေ ဘိက္ခု တိစီဝရေန ဝိပ္ပဝသေယ္ယာတိ သင္ဃာဋိယာ ဝာ ဥတ္တရာသင္ဂေန ဝာ အန္တရဝာသကေန ဝာ။
Ekarattampi ce bhikkhu ticīvarena vippavaseyyāti saṅghāṭiyā vā uttarāsaṅgena vā antaravāsakena vā.
အညတ္ရ ဘိက္ခုသမ္မုတိယာတိ ဌပေတ္ဝာ ဘိက္ခုသမ္မုတိံ။
Aññatra bhikkhusammutiyāti ṭhapetvā bhikkhusammutiṃ.
နိသ္သဂ္ဂိယံ ဟောတီတိ သဟ အရုဏုဂ္ဂမနာ 1 နိသ္သဂ္ဂိယံ ဟောတိ။ နိသ္သဇ္ဇိတဗ္ဗံ သင္ဃသ္သ ဝာ ဂဏသ္သ ဝာ ပုဂ္ဂလသ္သ ဝာ။ ဧဝဉ္စ ပန, ဘိက္ခဝေ, နိသ္သဇ္ဇိတဗ္ဗံ။ပေ.။ ဣဒံ မေ, ဘန္တေ , စီဝရံ ရတ္တိဝိပ္ပဝုတ္ထံ 2 အညတ္ရ ဘိက္ခုသမ္မုတိယာ နိသ္သဂ္ဂိယံ, ဣမာဟံ သင္ဃသ္သ နိသ္သဇ္ဇာမီတိ။ပေ.။ ဒဒေယ္ယာတိ။ပေ.။ ဒဒေယ္ယုန္တိ။ပေ.။ အာယသ္မတော ဒမ္မီတိ။
Nissaggiyaṃ hotīti saha aruṇuggamanā 3 nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante , cīvaraṃ rattivippavutthaṃ 4 aññatra bhikkhusammutiyā nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
၄၇၇. ဂာမော ဧကူပစာရော နာနူပစာရော။ နိဝေသနံ ဧကူပစာရံ နာနူပစာရံ။ ဥဒောသိတော ဧကူပစာရော နာနူပစာရော။ အဋ္ဋော ဧကူပစာရော နာနူပစာရော။ မာဠော ဧကူပစာရော နာနူပစာရော။ ပာသာဒော ဧကူပစာရော နာနူပစာရော။ ဟမ္မိယံ ဧကူပစာရံ နာနူပစာရံ။ နာဝာ ဧကူပစာရာ နာနူပစာရာ။ သတ္ထော ဧကူပစာရော နာနူပစာရော။ ခေတ္တံ ဧကူပစာရံ နာနူပစာရံ။ ဓညကရဏံ ဧကူပစာရံ နာနူပစာရံ။ အာရာမော ဧကူပစာရော နာနူပစာရော။ ဝိဟာရော ဧကူပစာရော နာနူပစာရော။ ရုက္ခမူလံ ဧကူပစာရံ နာနူပစာရံ။ အဇ္ဈောကာသော ဧကူပစာရော နာနူပစာရော။
477. Gāmo ekūpacāro nānūpacāro. Nivesanaṃ ekūpacāraṃ nānūpacāraṃ. Udosito ekūpacāro nānūpacāro. Aṭṭo ekūpacāro nānūpacāro. Māḷo ekūpacāro nānūpacāro. Pāsādo ekūpacāro nānūpacāro. Hammiyaṃ ekūpacāraṃ nānūpacāraṃ. Nāvā ekūpacārā nānūpacārā. Sattho ekūpacāro nānūpacāro. Khettaṃ ekūpacāraṃ nānūpacāraṃ. Dhaññakaraṇaṃ ekūpacāraṃ nānūpacāraṃ. Ārāmo ekūpacāro nānūpacāro. Vihāro ekūpacāro nānūpacāro. Rukkhamūlaṃ ekūpacāraṃ nānūpacāraṃ. Ajjhokāso ekūpacāro nānūpacāro.
၄၇၈. ဂာမော ဧကူပစာရော နာမ ဧကကုလသ္သ ဂာမော ဟောတိ ပရိက္ခိတ္တော စ ။ အန္တောဂာမေ စီဝရံ နိက္ခိပိတ္ဝာ အန္တောဂာမေ ဝတ္ထဗ္ဗံ။ အပရိက္ခိတ္တော ဟောတိ, ယသ္မိံ ဃရေ စီဝရံ နိက္ခိတ္တံ ဟောတိ တသ္မိံ ဃရေ ဝတ္ထဗ္ဗံ, ဟတ္ထပာသာ ဝာ န ဝိဇဟိတဗ္ဗံ။
478.Gāmo ekūpacāro nāma ekakulassa gāmo hoti parikkhitto ca . Antogāme cīvaraṃ nikkhipitvā antogāme vatthabbaṃ. Aparikkhitto hoti, yasmiṃ ghare cīvaraṃ nikkhittaṃ hoti tasmiṃ ghare vatthabbaṃ, hatthapāsā vā na vijahitabbaṃ.
၄၇၉. နာနာကုလသ္သ ဂာမော ဟောတိ ပရိက္ခိတ္တော စ။ ယသ္မိံ ဃရေ စီဝရံ နိက္ခိတ္တံ ဟောတိ တသ္မိံ ဃရေ ဝတ္ထဗ္ဗံ သဘာယေ ဝာ ဒ္ဝာရမူလေ ဝာ, ဟတ္ထပာသာ ဝာ န ဝိဇဟိတဗ္ဗံ။ သဘာယံ ဂစ္ဆန္တေန ဟတ္ထပာသေ စီဝရံ နိက္ခိပိတ္ဝာ သဘာယေ ဝာ ဝတ္ထဗ္ဗံ ဒ္ဝာရမူလေ ဝာ, ဟတ္ထပာသာ ဝာ န ဝိဇဟိတဗ္ဗံ။ သဘာယေ စီဝရံ နိက္ခိပိတ္ဝာ သဘာယေ ဝာ ဝတ္ထဗ္ဗံ ဒ္ဝာရမူလေ ဝာ, ဟတ္ထပာသာ ဝာ န ဝိဇဟိတဗ္ဗံ။ အပရိက္ခိတ္တော ဟောတိ, ယသ္မိံ ဃရေ စီဝရံ နိက္ခိတ္တံ ဟောတိ တသ္မိံ ဃရေ ဝတ္ထဗ္ဗံ, ဟတ္ထပာသာ ဝာ န ဝိဇဟိတဗ္ဗံ။
479. Nānākulassa gāmo hoti parikkhitto ca. Yasmiṃ ghare cīvaraṃ nikkhittaṃ hoti tasmiṃ ghare vatthabbaṃ sabhāye vā dvāramūle vā, hatthapāsā vā na vijahitabbaṃ. Sabhāyaṃ gacchantena hatthapāse cīvaraṃ nikkhipitvā sabhāye vā vatthabbaṃ dvāramūle vā, hatthapāsā vā na vijahitabbaṃ. Sabhāye cīvaraṃ nikkhipitvā sabhāye vā vatthabbaṃ dvāramūle vā, hatthapāsā vā na vijahitabbaṃ. Aparikkhitto hoti, yasmiṃ ghare cīvaraṃ nikkhittaṃ hoti tasmiṃ ghare vatthabbaṃ, hatthapāsā vā na vijahitabbaṃ.
၄၈၀. ဧကကုလသ္သ နိဝေသနံ ဟောတိ ပရိက္ခိတ္တဉ္စ, နာနာဂဗ္ဘာ နာနာဩဝရကာ။ အန္တောနိဝေသနေ စီဝရံ နိက္ခိပိတ္ဝာ အန္တောနိဝေသနေ ဝတ္ထဗ္ဗံ။ အပရိက္ခိတ္တံ ဟောတိ, ယသ္မိံ ဂဗ္ဘေ စီဝရံ နိက္ခိတ္တံ ဟောတိ တသ္မိံ ဂဗ္ဘေ ဝတ္ထဗ္ဗံ, ဟတ္ထပာသာ ဝာ န ဝိဇဟိတဗ္ဗံ။
480. Ekakulassa nivesanaṃ hoti parikkhittañca, nānāgabbhā nānāovarakā. Antonivesane cīvaraṃ nikkhipitvā antonivesane vatthabbaṃ. Aparikkhittaṃ hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
၄၈၁. နာနာကုလသ္သ နိဝေသနံ ဟောတိ ပရိက္ခိတ္တဉ္စ, နာနာဂဗ္ဘာ နာနာဩဝရကာ။ ယသ္မိံ ဂဗ္ဘေ စီဝရံ နိက္ခိတ္တံ ဟောတိ တသ္မိံ ဂဗ္ဘေ ဝတ္ထဗ္ဗံ ဒ္ဝာရမူလေ ဝာ, ဟတ္ထပာသာ ဝာ န ဝိဇဟိတဗ္ဗံ ။ အပရိက္ခိတ္တံ ဟောတိ, ယသ္မိံ ဂဗ္ဘေ စီဝရံ နိက္ခိတ္တံ ဟောတိ တသ္မိံ ဂဗ္ဘေ ဝတ္ထဗ္ဗံ, ဟတ္ထပာသာ ဝာ န ဝိဇဟိတဗ္ဗံ။
481. Nānākulassa nivesanaṃ hoti parikkhittañca, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ . Aparikkhittaṃ hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
၄၈၂. ဧကကုလသ္သ ဥဒောသိတော ဟောတိ ပရိက္ခိတ္တော စ, နာနာဂဗ္ဘာ နာနာဩဝရကာ ။ အန္တောဥဒောသိတေ စီဝရံ နိက္ခိပိတ္ဝာ အန္တောဥဒောသိတေ ဝတ္ထဗ္ဗံ။ အပရိက္ခိတ္တော ဟောတိ, ယသ္မိံ ဂဗ္ဘေ စီဝရံ နိက္ခိတ္တံ ဟောတိ တသ္မိံ ဂဗ္ဘေ ဝတ္ထဗ္ဗံ, ဟတ္ထပာသာ ဝာ န ဝိဇဟိတဗ္ဗံ။
482. Ekakulassa udosito hoti parikkhitto ca, nānāgabbhā nānāovarakā . Antoudosite cīvaraṃ nikkhipitvā antoudosite vatthabbaṃ. Aparikkhitto hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
၄၈၃. နာနာကုလသ္သ ဥဒောသိတော ဟောတိ ပရိက္ခိတ္တော စ, နာနာဂဗ္ဘာ နာနာဩဝရကာ။ ယသ္မိံ ဂဗ္ဘေ စီဝရံ နိက္ခိတ္တံ ဟောတိ တသ္မိံ ဂဗ္ဘေ ဝတ္ထဗ္ဗံ ဒ္ဝာရမူလေ ဝာ, ဟတ္ထပာသာ ဝာ န ဝိဇဟိတဗ္ဗံ။ အပရိက္ခိတ္တော ဟောတိ, ယသ္မိံ ဂဗ္ဘေ စီဝရံ နိက္ခိတ္တံ ဟောတိ တသ္မိံ ဂဗ္ဘေ ဝတ္ထဗ္ဗံ, ဟတ္ထပာသာ ဝာ န ဝိဇဟိတဗ္ဗံ။
483. Nānākulassa udosito hoti parikkhitto ca, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ. Aparikkhitto hoti, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ, hatthapāsā vā na vijahitabbaṃ.
၄၈၄. ဧကကုလသ္သ အဋ္ဋော ဟောတိ, အန္တောအဋ္ဋေ စီဝရံ နိက္ခိပိတ္ဝာ အန္တောအဋ္ဋေ ဝတ္ထဗ္ဗံ။ နာနာကုလသ္သ အဋ္ဋော ဟောတိ, နာနာဂဗ္ဘာ နာနာဩဝရကာ။ ယသ္မိံ ဂဗ္ဘေ စီဝရံ နိက္ခိတ္တံ ဟောတိ တသ္မိံ ဂဗ္ဘေ ဝတ္ထဗ္ဗံ ဒ္ဝာရမူလေ ဝာ, ဟတ္ထပာသာ ဝာ န ဝိဇဟိတဗ္ဗံ။
484. Ekakulassa aṭṭo hoti, antoaṭṭe cīvaraṃ nikkhipitvā antoaṭṭe vatthabbaṃ. Nānākulassa aṭṭo hoti, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
၄၈၅. ဧကကုလသ္သ မာဠော ဟောတိ, အန္တောမာဠေ စီဝရံ နိက္ခိပိတ္ဝာ အန္တောမာဠေ ဝတ္ထဗ္ဗံ။ နာနာကုလသ္သ မာဠော ဟောတိ နာနာဂဗ္ဘာ နာနာဩဝရကာ, ယသ္မိံ ဂဗ္ဘေ စီဝရံ နိက္ခိတ္တံ ဟောတိ တသ္မိံ ဂဗ္ဘေ ဝတ္ထဗ္ဗံ ဒ္ဝာရမူလေ ဝာ, ဟတ္ထပာသာ ဝာ န ဝိဇဟိတဗ္ဗံ။
485. Ekakulassa māḷo hoti, antomāḷe cīvaraṃ nikkhipitvā antomāḷe vatthabbaṃ. Nānākulassa māḷo hoti nānāgabbhā nānāovarakā, yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
၄၈၆. ဧကကုလသ္သ ပာသာဒော ဟောတိ, အန္တောပာသာဒေ စီဝရံ နိက္ခိပိတ္ဝာ အန္တောပာသာဒေ ဝတ္ထဗ္ဗံ။ နာနာကုလသ္သ ပာသာဒော ဟောတိ, နာနာဂဗ္ဘာ နာနာဩဝရကာ။ ယသ္မိံ ဂဗ္ဘေ စီဝရံ နိက္ခိတ္တံ ဟောတိ တသ္မိံ ဂဗ္ဘေ ဝတ္ထဗ္ဗံ ဒ္ဝာရမူလေ ဝာ, ဟတ္ထပာသာ ဝာ န ဝိဇဟိတဗ္ဗံ။
486. Ekakulassa pāsādo hoti, antopāsāde cīvaraṃ nikkhipitvā antopāsāde vatthabbaṃ. Nānākulassa pāsādo hoti, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
၄၈၇. ဧကကုလသ္သ ဟမ္မိယံ ဟောတိ။ အန္တောဟမ္မိယေ စီဝရံ နိက္ခိပိတ္ဝာ အန္တောဟမ္မိယေ ဝတ္ထဗ္ဗံ။ နာနာကုလသ္သ ဟမ္မိယံ ဟောတိ, နာနာဂဗ္ဘာ နာနာဩဝရကာ။ ယသ္မိံ ဂဗ္ဘေ စီဝရံ နိက္ခိတ္တံ ဟောတိ တသ္မိံ ဂဗ္ဘေ ဝတ္ထဗ္ဗံ ဒ္ဝာရမူလေ ဝာ, ဟတ္ထပာသာ ဝာ န ဝိဇဟိတဗ္ဗံ။
487. Ekakulassa hammiyaṃ hoti. Antohammiye cīvaraṃ nikkhipitvā antohammiye vatthabbaṃ. Nānākulassa hammiyaṃ hoti, nānāgabbhā nānāovarakā. Yasmiṃ gabbhe cīvaraṃ nikkhittaṃ hoti tasmiṃ gabbhe vatthabbaṃ dvāramūle vā, hatthapāsā vā na vijahitabbaṃ.
၄၈၈. ဧကကုလသ္သ နာဝာ ဟောတိ။ အန္တောနာဝာယ စီဝရံ နိက္ခိပိတ္ဝာ အန္တောနာဝာယ ဝတ္ထဗ္ဗံ ။ နာနာကုလသ္သ နာဝာ ဟောတိ နာနာဂဗ္ဘာ နာနာဩဝရကာ။ ယသ္မိံ ဩဝရကေ စီဝရံ နိက္ခိတ္တံ ဟောတိ တသ္မိံ ဩဝရကေ ဝတ္ထဗ္ဗံ, ဟတ္ထပာသာ ဝာ န ဝိဇဟိတဗ္ဗံ။
488. Ekakulassa nāvā hoti. Antonāvāya cīvaraṃ nikkhipitvā antonāvāya vatthabbaṃ . Nānākulassa nāvā hoti nānāgabbhā nānāovarakā. Yasmiṃ ovarake cīvaraṃ nikkhittaṃ hoti tasmiṃ ovarake vatthabbaṃ, hatthapāsā vā na vijahitabbaṃ.
၄၈၉. ဧကကုလသ္သ သတ္ထော ဟောတိ။ သတ္ထေ စီဝရံ နိက္ခိပိတ္ဝာ ပုရတော ဝာ ပစ္ဆတော ဝာ သတ္တဗ္ဘန္တရာ န ဝိဇဟိတဗ္ဗာ, ပသ္သတော အဗ္ဘန္တရံ န ဝိဇဟိတဗ္ဗံ။ နာနာကုလသ္သ သတ္ထော ဟောတိ, သတ္ထေ စီဝရံ နိက္ခိပိတ္ဝာ ဟတ္ထပာသာ န ဝိဇဟိတဗ္ဗံ။
489. Ekakulassa sattho hoti. Satthe cīvaraṃ nikkhipitvā purato vā pacchato vā sattabbhantarā na vijahitabbā, passato abbhantaraṃ na vijahitabbaṃ. Nānākulassa sattho hoti, satthe cīvaraṃ nikkhipitvā hatthapāsā na vijahitabbaṃ.
၄၉၀. ဧကကုလသ္သ ခေတ္တံ ဟောတိ ပရိက္ခိတ္တဉ္စ။ အန္တောခေတ္တေ စီဝရံ နိက္ခိပိတ္ဝာ အန္တောခေတ္တေ ဝတ္ထဗ္ဗံ။ အပရိက္ခိတ္တံ ဟောတိ, ဟတ္ထပာသာ န ဝိဇဟိတဗ္ဗံ။ နာနာကုလသ္သ ခေတ္တံ ဟောတိ ပရိက္ခိတ္တဉ္စ။ အန္တောခေတ္တေ စီဝရံ နိက္ခိပိတ္ဝာ ဒ္ဝာရမူလေ ဝာ ဝတ္ထဗ္ဗံ, ဟတ္ထပာသာ ဝာ န ဝိဇဟိတဗ္ဗံ။ အပရိက္ခိတ္တံ ဟောတိ, ဟတ္ထပာသာ န ဝိဇဟိတဗ္ဗံ။
490. Ekakulassa khettaṃ hoti parikkhittañca. Antokhette cīvaraṃ nikkhipitvā antokhette vatthabbaṃ. Aparikkhittaṃ hoti, hatthapāsā na vijahitabbaṃ. Nānākulassa khettaṃ hoti parikkhittañca. Antokhette cīvaraṃ nikkhipitvā dvāramūle vā vatthabbaṃ, hatthapāsā vā na vijahitabbaṃ. Aparikkhittaṃ hoti, hatthapāsā na vijahitabbaṃ.
၄၉၁. ဧကကုလသ္သ ဓညကရဏံ ဟောတိ ပရိက္ခိတ္တဉ္စ။ အန္တောဓညကရဏေ စီဝရံ နိက္ခိပိတ္ဝာ အန္တောဓညကရဏေ ဝတ္ထဗ္ဗံ။ အပရိက္ခိတ္တံ ဟောတိ, ဟတ္ထပာသာ န ဝိဇဟိတဗ္ဗံ။ နာနာကုလသ္သ ဓညကရဏံ ဟောတိ ပရိက္ခိတ္တဉ္စ။ အန္တောဓညကရဏေ စီဝရံ နိက္ခိပိတ္ဝာ ဒ္ဝာရမူလေ ဝာ ဝတ္ထဗ္ဗံ, ဟတ္ထပာသာ ဝာ န ဝိဇဟိတဗ္ဗံ။ အပရိက္ခိတ္တံ ဟောတိ, ဟတ္ထပာသာ န ဝိဇဟိတဗ္ဗံ။
491. Ekakulassa dhaññakaraṇaṃ hoti parikkhittañca. Antodhaññakaraṇe cīvaraṃ nikkhipitvā antodhaññakaraṇe vatthabbaṃ. Aparikkhittaṃ hoti, hatthapāsā na vijahitabbaṃ. Nānākulassa dhaññakaraṇaṃ hoti parikkhittañca. Antodhaññakaraṇe cīvaraṃ nikkhipitvā dvāramūle vā vatthabbaṃ, hatthapāsā vā na vijahitabbaṃ. Aparikkhittaṃ hoti, hatthapāsā na vijahitabbaṃ.
၄၉၂. ဧကကုလသ္သ အာရာမော ဟောတိ ပရိက္ခိတ္တော စ။ အန္တောအာရာမေ စီဝရံ နိက္ခိပိတ္ဝာ အန္တောအာရာမေ ဝတ္ထဗ္ဗံ။ အပရိက္ခိတ္တော ဟောတိ, ဟတ္ထပာသာ န ဝိဇဟိတဗ္ဗံ။ နာနာကုလသ္သ အာရာမော ဟောတိ ပရိက္ခိတ္တော စ။ အန္တောအာရာမေ စီဝရံ နိက္ခိပိတ္ဝာ ဒ္ဝာရမူလေ ဝာ ဝတ္ထဗ္ဗံ, ဟတ္ထပာသာ ဝာ န ဝိဇဟိတဗ္ဗံ။ အပရိက္ခိတ္တော ဟောတိ, ဟတ္ထပာသာ န ဝိဇဟိတဗ္ဗံ။
492. Ekakulassa ārāmo hoti parikkhitto ca. Antoārāme cīvaraṃ nikkhipitvā antoārāme vatthabbaṃ. Aparikkhitto hoti, hatthapāsā na vijahitabbaṃ. Nānākulassa ārāmo hoti parikkhitto ca. Antoārāme cīvaraṃ nikkhipitvā dvāramūle vā vatthabbaṃ, hatthapāsā vā na vijahitabbaṃ. Aparikkhitto hoti, hatthapāsā na vijahitabbaṃ.
၄၉၃. ဧကကုလသ္သ ဝိဟာရော ဟောတိ ပရိက္ခိတ္တော စ။ အန္တောဝိဟာရေ စီဝရံ နိက္ခိပိတ္ဝာ အန္တောဝိဟာရေ ဝတ္ထဗ္ဗံ။ အပရိက္ခိတ္တော ဟောတိ, ယသ္မိံ ဝိဟာရေ စီဝရံ နိက္ခိတ္တံ ဟောတိ တသ္မိံ ဝိဟာရေ ဝတ္ထဗ္ဗံ, ဟတ္ထပာသာ ဝာ န ဝိဇဟိတဗ္ဗံ။ နာနာကုလသ္သ ဝိဟာရော ဟောတိ ပရိက္ခိတ္တော စ။ ယသ္မိံ ဝိဟာရေ စီဝရံ နိက္ခိတ္တံ ဟောတိ တသ္မိံ ဝိဟာရေ ဝတ္ထဗ္ဗံ ဒ္ဝာရမူလေ ဝာ, ဟတ္ထပာသာ ဝာ န ဝိဇဟိတဗ္ဗံ။ အပရိက္ခိတ္တော ဟောတိ , ယသ္မိံ ဝိဟာရေ စီဝရံ နိက္ခိတ္တံ ဟောတိ တသ္မိံ ဝိဟာရေ ဝတ္ထဗ္ဗံ, ဟတ္ထပာသာ ဝာ န ဝိဇဟိတဗ္ဗံ။
493. Ekakulassa vihāro hoti parikkhitto ca. Antovihāre cīvaraṃ nikkhipitvā antovihāre vatthabbaṃ. Aparikkhitto hoti, yasmiṃ vihāre cīvaraṃ nikkhittaṃ hoti tasmiṃ vihāre vatthabbaṃ, hatthapāsā vā na vijahitabbaṃ. Nānākulassa vihāro hoti parikkhitto ca. Yasmiṃ vihāre cīvaraṃ nikkhittaṃ hoti tasmiṃ vihāre vatthabbaṃ dvāramūle vā, hatthapāsā vā na vijahitabbaṃ. Aparikkhitto hoti , yasmiṃ vihāre cīvaraṃ nikkhittaṃ hoti tasmiṃ vihāre vatthabbaṃ, hatthapāsā vā na vijahitabbaṃ.
၄၉၄. ဧကကုလသ္သ ရုက္ခမူလံ ဟောတိ, ယံ မဇ္ဈန္ဟိကေ ကာလေ သမန္တာ ဆာယာ ဖရတိ, အန္တောဆာယာယ စီဝရံ နိက္ခိပိတ္ဝာ အန္တောဆာယာယ ဝတ္ထဗ္ဗံ။ နာနာကုလသ္သ ရုက္ခမူလံ ဟောတိ, ဟတ္ထပာသာ န ဝိဇဟိတဗ္ဗံ။
494. Ekakulassa rukkhamūlaṃ hoti, yaṃ majjhanhike kāle samantā chāyā pharati, antochāyāya cīvaraṃ nikkhipitvā antochāyāya vatthabbaṃ. Nānākulassa rukkhamūlaṃ hoti, hatthapāsā na vijahitabbaṃ.
အဇ္ဈောကာသော ဧကူပစာရော နာမ အဂာမကေ အရညေ သမန္တာ သတ္တဗ္ဘန္တရာ ဧကူပစာရော, တတော ပရံ နာနူပစာရော။
Ajjhokāso ekūpacāro nāma agāmake araññe samantā sattabbhantarā ekūpacāro, tato paraṃ nānūpacāro.
၄၉၅. ဝိပ္ပဝုတ္ထေ ဝိပ္ပဝုတ္ထသညီ အညတ္ရ ဘိက္ခုသမ္မုတိယာ, နိသ္သဂ္ဂိယံ ပာစိတ္တိယံ။ ဝိပ္ပဝုတ္ထေ ဝေမတိကော, အညတ္ရ ဘိက္ခုသမ္မုတိယာ, နိသ္သဂ္ဂိယံ ပာစိတ္တိယံ။ ဝိပ္ပဝုတ္ထေ အဝိပ္ပဝုတ္ထသညီ, အညတ္ရ ဘိက္ခုသမ္မုတိယာ, နိသ္သဂ္ဂိယံ ပာစိတ္တိယံ။ အပ္ပစ္စုဒ္ဓဋေ ပစ္စုဒ္ဓဋသညီ။ပေ.။ အဝိသ္သဇ္ဇိတေ ဝိသ္သဇ္ဇိတသညီ။ အနဋ္ဌေ နဋ္ဌသညီ။ အဝိနဋ္ဌေ ဝိနဋ္ဌသညီ။ အဒဍ္ဎေ ဒဍ္ဎသညီ။ပေ.။ အဝိလုတ္တေ ဝိလုတ္တသညီ, အညတ္ရ ဘိက္ခုသမ္မုတိယာ, နိသ္သဂ္ဂိယံ ပာစိတ္တိယံ။
495. Vippavutthe vippavutthasaññī aññatra bhikkhusammutiyā, nissaggiyaṃ pācittiyaṃ. Vippavutthe vematiko, aññatra bhikkhusammutiyā, nissaggiyaṃ pācittiyaṃ. Vippavutthe avippavutthasaññī, aññatra bhikkhusammutiyā, nissaggiyaṃ pācittiyaṃ. Appaccuddhaṭe paccuddhaṭasaññī…pe… avissajjite vissajjitasaññī… anaṭṭhe naṭṭhasaññī… avinaṭṭhe vinaṭṭhasaññī… adaḍḍhe daḍḍhasaññī…pe… avilutte viluttasaññī, aññatra bhikkhusammutiyā, nissaggiyaṃ pācittiyaṃ.
နိသ္သဂ္ဂိယံ စီဝရံ အနိသ္သဇ္ဇိတ္ဝာ ပရိဘုဉ္ဇတိ, အာပတ္တိ ဒုက္ကဋသ္သ ။ အဝိပ္ပဝုတ္ထေ ဝိပ္ပဝုတ္ထသညီ, အာပတ္တိ ဒုက္ကဋသ္သ။ အဝိပ္ပဝုတ္ထေ ဝေမတိကော, အာပတ္တိ ဒုက္ကဋသ္သ။ အဝိပ္ပဝုတ္ထေ အဝိပ္ပဝုတ္ထသညီ, အနာပတ္တိ။
Nissaggiyaṃ cīvaraṃ anissajjitvā paribhuñjati, āpatti dukkaṭassa . Avippavutthe vippavutthasaññī, āpatti dukkaṭassa. Avippavutthe vematiko, āpatti dukkaṭassa. Avippavutthe avippavutthasaññī, anāpatti.
၄၉၆. အနာပတ္တိ အန္တောအရုဏေ ပစ္စုဒ္ဓရတိ, ဝိသ္သဇ္ဇေတိ, နသ္သတိ, ဝိနသ္သတိ, ဍယ္ဟတိ, အစ္ဆိန္ဒိတ္ဝာ ဂဏ္ဟန္တိ, ဝိသ္သာသံ ဂဏ္ဟန္တိ, ဘိက္ခုသမ္မုတိယာ, ဥမ္မတ္တကသ္သ, အာဒိကမ္မိကသ္သာတိ။
496. Anāpatti antoaruṇe paccuddharati, vissajjeti, nassati, vinassati, ḍayhati, acchinditvā gaṇhanti, vissāsaṃ gaṇhanti, bhikkhusammutiyā, ummattakassa, ādikammikassāti.
ဥဒောသိတသိက္ခာပဒံ နိဋ္ဌိတံ ဒုတိယံ။
Udositasikkhāpadaṃ niṭṭhitaṃ dutiyaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၂. ဥဒောသိတသိက္ခာပဒဝဏ္ဏနာ • 2. Udositasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၂. ဥဒောသိတသိက္ခာပဒဝဏ္ဏနာ • 2. Udositasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၂. ဥဒောသိတသိက္ခာပဒဝဏ္ဏနာ • 2. Udositasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၂. ဥဒောသိတသိက္ခာပဒဝဏ္ဏနာ • 2. Udositasikkhāpadavaṇṇanā
