| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
உத்³தே³ஸப⁴த்தகதா²வண்ணனா
Uddesabhattakathāvaṇṇanā
போ⁴ஜனஸாலாயாதி ப⁴த்துத்³தே³ஸட்டா²னங் ஸந்தா⁴ய வுத்தங். ஏகவளஞ்ஜந்தி ஏகத்³வாரேன வளஞ்ஜிதப்³ப³ங். நானானிவேஸனேஸூதி நானாகுலஸ்ஸ நானூபசாரேஸு நிவேஸனேஸு.
Bhojanasālāyāti bhattuddesaṭṭhānaṃ sandhāya vuttaṃ. Ekavaḷañjanti ekadvārena vaḷañjitabbaṃ. Nānānivesanesūti nānākulassa nānūpacāresu nivesanesu.
நிஸின்னஸ்ஸபி நித்³தா³யந்தஸ்ஸபீதி அனாத³ரே ஸாமிவசனங், வுட்³ட⁴தரே நித்³தா³யந்தே நவகஸ்ஸ கா³ஹிதங் ஸுக்³க³ஹிதந்தி அத்தோ².
Nisinnassapi niddāyantassapīti anādare sāmivacanaṃ, vuḍḍhatare niddāyante navakassa gāhitaṃ suggahitanti attho.
விஸ்ஸட்ட²தூ³தோதி யதா²ருசி வத்துங் லப⁴னதோ நிராஸங்கதூ³தோ. புச்சா²ஸபா⁴கே³னாதி புச்சா²வசனபடிபா⁴கே³ன. ‘‘ஏகா கூடட்டி²திகா நாமா’’தி வுத்தமேவத்த²ங் விபா⁴வேதுங் ‘‘ரஞ்ஞோ வா ஹீ’’திஆதி³ வுத்தங்.
Vissaṭṭhadūtoti yathāruci vattuṃ labhanato nirāsaṅkadūto. Pucchāsabhāgenāti pucchāvacanapaṭibhāgena. ‘‘Ekā kūṭaṭṭhitikā nāmā’’ti vuttamevatthaṃ vibhāvetuṃ ‘‘rañño vā hī’’tiādi vuttaṃ.
ஸப்³ப³ங் பத்தஸ்ஸாமிகஸ்ஸ ஹோதீதி சீவராதி³கம்பி ஸப்³ப³ங் பத்தஸ்ஸாமிகஸ்ஸேவ ஹோதி, மயா ப⁴த்தமேவ ஸந்தா⁴ய வுத்தங், ந சீவராதி³ந்தி வத்வா க³ஹேதுங் ந வட்டதீதி அத்தோ².
Sabbaṃ pattassāmikassa hotīti cīvarādikampi sabbaṃ pattassāmikasseva hoti, mayā bhattameva sandhāya vuttaṃ, na cīvarādinti vatvā gahetuṃ na vaṭṭatīti attho.
அகதபா⁴கோ³னாமாதி ஆக³ந்துகபா⁴கோ³ நாம, அதி³ன்னபுப்³ப³பா⁴கோ³தி அத்தோ².
Akatabhāgonāmāti āgantukabhāgo nāma, adinnapubbabhāgoti attho.
கிங் ஆஹரீயதீதி அவத்வாதி ‘‘கதரப⁴த்தங் வா தயா ஆஹரீயதீ’’தி தா³யகங் அபுச்சி²த்வா. பகதிட்டி²திகாயாதி உத்³தே³ஸப⁴த்தட்டி²திகாய.
Kiṃ āharīyatīti avatvāti ‘‘katarabhattaṃ vā tayā āharīyatī’’ti dāyakaṃ apucchitvā. Pakatiṭṭhitikāyāti uddesabhattaṭṭhitikāya.
உத்³தே³ஸப⁴த்தகதா²வண்ணனா நிட்டி²தா.
Uddesabhattakathāvaṇṇanā niṭṭhitā.
