| Library / Tipiṭaka / तिपिटक • Tipiṭaka / चूळनिद्देसपाळि • Cūḷaniddesapāḷi |
१३. उदयमाणवपुच्छा
13. Udayamāṇavapucchā
१३०.
130.
‘‘झायिं विरजमासीनं, [इच्चायस्मा उदयो]
‘‘Jhāyiṃ virajamāsīnaṃ, [iccāyasmā udayo]
कतकिच्चं अनासवं।
Katakiccaṃ anāsavaṃ;
पारगुं सब्बधम्मानं, अत्थि पञ्हेन आगमं।
Pāraguṃ sabbadhammānaṃ, atthi pañhena āgamaṃ;
अञ्ञाविमोक्खं पब्रूहि, अविज्जाय पभेदनं’’॥
Aññāvimokkhaṃ pabrūhi, avijjāya pabhedanaṃ’’.
१३१.
131.
‘‘पहानं कामच्छन्दानं, [उदयाति भगवा]
‘‘Pahānaṃ kāmacchandānaṃ, [udayāti bhagavā]
दोमनस्सान चूभयं।
Domanassāna cūbhayaṃ;
थिनस्स च पनूदनं, कुक्कुच्चानं निवारणं॥
Thinassa ca panūdanaṃ, kukkuccānaṃ nivāraṇaṃ.
१३२.
132.
‘‘उपेक्खासतिसंसुद्धं , धम्मतक्कपुरेजवं।
‘‘Upekkhāsatisaṃsuddhaṃ , dhammatakkapurejavaṃ;
अञ्ञाविमोक्खं पब्रूमि, अविज्जाय पभेदनं’’॥
Aññāvimokkhaṃ pabrūmi, avijjāya pabhedanaṃ’’.
१३३.
133.
‘‘किंसु संयोजनो लोको, किंसु तस्स विचारणं।
‘‘Kiṃsu saṃyojano loko, kiṃsu tassa vicāraṇaṃ;
किस्सस्स विप्पहानेन, निब्बानं इति वुच्चति’’॥
Kissassa vippahānena, nibbānaṃ iti vuccati’’.
१३४.
134.
‘‘नन्दिसंयोजनो लोको, वितक्कस्स विचारणं।
‘‘Nandisaṃyojano loko, vitakkassa vicāraṇaṃ;
तण्हाय विप्पहानेन, निब्बानं इति वुच्चति’’॥
Taṇhāya vippahānena, nibbānaṃ iti vuccati’’.
१३५.
135.
‘‘कथं सतस्स चरतो, विञ्ञाणं उपरुज्झति।
‘‘Kathaṃ satassa carato, viññāṇaṃ uparujjhati;
भगवन्तं पुट्ठुमागम्म, तं सुणोम वचो तव’’॥
Bhagavantaṃ puṭṭhumāgamma, taṃ suṇoma vaco tava’’.
१३६.
136.
‘‘अज्झत्तञ्च बहिद्धा च, वेदनं नाभिनन्दतो।
‘‘Ajjhattañca bahiddhā ca, vedanaṃ nābhinandato;
एवं सतस्स चरतो, विञ्ञाणं उपरुज्झती’’ति॥
Evaṃ satassa carato, viññāṇaṃ uparujjhatī’’ti.
उदयमाणवपुच्छा तेरसमा।
Udayamāṇavapucchā terasamā.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चूळनिद्देस-अट्ठकथा • Cūḷaniddesa-aṭṭhakathā / १३. उदयमाणवसुत्तनिद्देसवण्णना • 13. Udayamāṇavasuttaniddesavaṇṇanā
