| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
4. உத³பானதா³யகத்தே²ரஅபதா³னவண்ணனா
4. Udapānadāyakattheraapadānavaṇṇanā
விபஸ்ஸினோ ப⁴க³வதோதிஆதி³கங் ஆயஸ்மதோ உத³பானதா³யகத்தே²ரஸ்ஸ அபதா³னங். அயம்பி தே²ரோ புரிமமுனிவரேஸு கதாதி⁴காரோ அனேகேஸு ப⁴வேஸு கதபுஞ்ஞஸஞ்சயோ விபஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴ப்பத்தோ ‘‘பானீயதா³னங் மயா தா³தப்³ப³ங், தஞ்ச நிரந்தரங் கத்வா பவத்தேதுங் வட்டதீ’’தி சிந்தெத்வா ஏகங் கூபங் க²னாபெத்வா உத³கஸம்பத்தகாலே இட்ட²காஹி சினாபெத்வா தி²ரங் கத்வா தத்த² உட்டி²தேன உத³கேன புண்ணங் தங் உத³பானங் விபஸ்ஸிஸ்ஸ ப⁴க³வதோ நிய்யாதே³ஸி. ப⁴க³வா பானீயதா³னானிஸங்ஸதீ³பகங் அனுமோத³னங் அகாஸி . ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ நிப்³ப³த்தனிப்³ப³த்தட்டா²னே பொக்க²ரணீஉத³பானபானீயாதி³ஸம்பன்னோ ஸுக²மனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலே நிப்³ப³த்தோ வுத்³தி⁴மன்வாய ஸத்³தோ⁴ பஸன்னோ பப்³ப³ஜித்வா நசிரஸ்ஸேவ அரஹா அஹோஸி.
Vipassino bhagavatotiādikaṃ āyasmato udapānadāyakattherassa apadānaṃ. Ayampi thero purimamunivaresu katādhikāro anekesu bhavesu katapuññasañcayo vipassissa bhagavato kāle kulagehe nibbatto vuddhippatto ‘‘pānīyadānaṃ mayā dātabbaṃ, tañca nirantaraṃ katvā pavattetuṃ vaṭṭatī’’ti cintetvā ekaṃ kūpaṃ khanāpetvā udakasampattakāle iṭṭhakāhi cināpetvā thiraṃ katvā tattha uṭṭhitena udakena puṇṇaṃ taṃ udapānaṃ vipassissa bhagavato niyyādesi. Bhagavā pānīyadānānisaṃsadīpakaṃ anumodanaṃ akāsi . So tena puññena devamanussesu saṃsaranto nibbattanibbattaṭṭhāne pokkharaṇīudapānapānīyādisampanno sukhamanubhavitvā imasmiṃ buddhuppāde ekasmiṃ kule nibbatto vuddhimanvāya saddho pasanno pabbajitvā nacirasseva arahā ahosi.
18. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ விபஸ்ஸினோ ப⁴க³வதோதிஆதி³மாஹ. தத்த² உத³பானோ கதோ மயாதி உத³கங் பிவந்தி எத்தா²தி உத³பானோ, கூபபொக்க²ரணீதளாகானமேதங் அதி⁴வசனங். ஸோ உத³பானோ கூபோ விபஸ்ஸிஸ்ஸ ப⁴க³வதோ அத்தா²ய கதோ க²னிதோதி அத்தோ². ஸேஸங் உத்தானத்த²மேவாதி.
18. So aparabhāge attano pubbakammaṃ saritvā somanassajāto pubbacaritāpadānaṃ pakāsento vipassino bhagavatotiādimāha. Tattha udapāno kato mayāti udakaṃ pivanti etthāti udapāno, kūpapokkharaṇītaḷākānametaṃ adhivacanaṃ. So udapāno kūpo vipassissa bhagavato atthāya kato khanitoti attho. Sesaṃ uttānatthamevāti.
உத³பானதா³யகத்தே²ரஅபதா³னவண்ணனா ஸமத்தா.
Udapānadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 4. உத³பானதா³யகத்தே²ரஅபதா³னங் • 4. Udapānadāyakattheraapadānaṃ
