| Library / Tipiṭaka / තිපිටක • Tipiṭaka / අපදානපාළි • Apadānapāḷi |
24. උදකාසනවග්ගො
24. Udakāsanavaggo
1. උදකාසනදායකත්ථෙරඅපදානං
1. Udakāsanadāyakattheraapadānaṃ
1.
1.
‘‘ආරාමද්වාරා නික්ඛම්ම, ඵලකං සන්ථරිං අහං;
‘‘Ārāmadvārā nikkhamma, phalakaṃ santhariṃ ahaṃ;
උදකඤ්ච උපට්ඨාසිං, උත්තමත්ථස්ස පත්තියා.
Udakañca upaṭṭhāsiṃ, uttamatthassa pattiyā.
2.
2.
‘‘එකත්තිංසෙ ඉතො කප්පෙ, යං කම්මමකරිං තදා;
‘‘Ekattiṃse ito kappe, yaṃ kammamakariṃ tadā;
දුග්ගතිං නාභිජානාමි, ආසනෙ චොදකෙ ඵලං.
Duggatiṃ nābhijānāmi, āsane codake phalaṃ.
3.
3.
‘‘ඉතො පන්නරසෙ කප්පෙ, අභිසාමසමව්හයො;
‘‘Ito pannarase kappe, abhisāmasamavhayo;
සත්තරතනසම්පන්නො, චක්කවත්තී මහබ්බලො.
Sattaratanasampanno, cakkavattī mahabbalo.
4.
4.
‘‘පටිසම්භිදා චතස්සො, විමොක්ඛාපි ච අට්ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්ඤා සච්ඡිකතා, කතං බුද්ධස්ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්ථං සුදං ආයස්මා උදකාසනදායකො ථෙරො ඉමා ගාථායො අභාසිත්ථාති.
Itthaṃ sudaṃ āyasmā udakāsanadāyako thero imā gāthāyo abhāsitthāti.
උදකාසනදායකත්ථෙරස්සාපදානං පඨමං.
Udakāsanadāyakattherassāpadānaṃ paṭhamaṃ.
