7. Ucchaṅgapupphiyattheraapadānaṃ

142.

‘‘Nagare bandhumatiyā, ahosiṃ māliko tadā;

Ucchaṅgaṃ pūrayitvāna, agamaṃ antarāpaṇaṃ.

143.

‘‘Bhagavā tamhi samaye, bhikkhusaṅghapurakkhato;

Mahatā ānubhāvena, niyyāti lokanāyako.

144.

‘‘Disvāna lokapajjotaṃ, vipassiṃ lokatāraṇaṃ;

Pupphaṃ paggayha ucchaṅgā, buddhaseṭṭhaṃ apūjayiṃ.

145.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

146.

‘‘Kilesā jhāpitā mayhaṃ…pe… viharāmi anāsavo.

147.

‘‘Svāgataṃ vata me āsi…pe… kataṃ buddhassa sāsanaṃ.

148.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ucchaṅgapupphiyo thero imā gāthāyo abhāsitthāti.

Ucchaṅgapupphiyattherassāpadānaṃ sattamaṃ.