| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৩. উভযত্থসুত্তং
3. Ubhayatthasuttaṃ
২৩. ৰুত্তঞ্হেতং ভগৰতা, ৰুত্তমরহতাতি মে সুতং –
23. Vuttañhetaṃ bhagavatā, vuttamarahatāti me sutaṃ –
‘‘একধম্মো , ভিক্খৰে, ভাৰিতো বহুলীকতো উভো অত্থে সমধিগয্হ তিট্ঠতি – দিট্ঠধম্মিকঞ্চেৰ অত্থং সম্পরাযিকঞ্চ। কতমো একধম্মো? অপ্পমাদো কুসলেসু ধম্মেসু। অযং খো, ভিক্খৰে, একধম্মো ভাৰিতো বহুলীকতো উভো অত্থে সমধিগয্হ তিট্ঠতি – দিট্ঠধম্মিকঞ্চেৰ অত্থং সম্পরাযিকঞ্চা’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Ekadhammo , bhikkhave, bhāvito bahulīkato ubho atthe samadhigayha tiṭṭhati – diṭṭhadhammikañceva atthaṃ samparāyikañca. Katamo ekadhammo? Appamādo kusalesu dhammesu. Ayaṃ kho, bhikkhave, ekadhammo bhāvito bahulīkato ubho atthe samadhigayha tiṭṭhati – diṭṭhadhammikañceva atthaṃ samparāyikañcā’’ti. Etamatthaṃ bhagavā avoca. Tatthetaṃ iti vuccati –
‘‘অপ্পমাদং পসংসন্তি, পুঞ্ঞকিরিযাসু পণ্ডিতা।
‘‘Appamādaṃ pasaṃsanti, puññakiriyāsu paṇḍitā;
অপ্পমত্তো উভো অত্থে, অধিগণ্হাতি পণ্ডিতো॥
Appamatto ubho atthe, adhigaṇhāti paṇḍito.
‘‘দিট্ঠে ধম্মে চ যো অত্থো, যো চত্থো সম্পরাযিকো।
‘‘Diṭṭhe dhamme ca yo attho, yo cattho samparāyiko;
অত্থাভিসমযা ধীরো, পণ্ডিতোতি পৰুচ্চতী’’তি॥
Atthābhisamayā dhīro, paṇḍitoti pavuccatī’’ti.
অযম্পি অত্থো ৰুত্তো ভগৰতা, ইতি মে সুতন্তি। ততিযং।
Ayampi attho vutto bhagavatā, iti me sutanti. Tatiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৩. উভযত্থসুত্তৰণ্ণনা • 3. Ubhayatthasuttavaṇṇanā
