| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৫৪. উভতোব্যঞ্জনকৰত্থুকথা
54. Ubhatobyañjanakavatthukathā
১১৬. উভতোব্যঞ্জনকোতি এত্থ বাহিরত্থসমাসং দস্সেন্তো আহ ‘‘ইত্থিনিমিত্তুপ্পাদনকম্মতো চা’’তিআদি। তত্থ ‘‘ইত্থি…পে॰… কম্মতো চা’’তি ইমিনা উভযসরূপং দস্সেতি। উভতো কম্মতো পৰত্তন্তি পাঠসেসো যোজেতব্বো। ব্যঞ্জনন্তি নিমিত্তং। অস্সাতি জনস্স। করোতিপি কারেতিপীতি এত্থ করধাতুযা সুদ্ধকম্মকারিতকম্মানি দস্সেন্তো আহ ‘‘পুরিসনিমিত্তেনা’’তিআদি। তত্থ ‘‘ৰীতিক্কম’’ন্তি ইমিনা সুদ্ধকম্মং দস্সেতি, ‘‘পর’’ন্তি ইমিনা কারিতকম্মং দস্সেতি। সমাদপেত্ৰাতি উয্যোজেত্ৰা। তস্স দুৰিধভাৰং দস্সেন্তো আহ ‘‘দুৰিধো’’তিআদি। তত্থ ইত্থিভাৰেন লক্খিতো উভতোব্যঞ্জনকো ইত্থিউভতোব্যঞ্জনকো। এস নযো ইতরত্থাপি।
116.Ubhatobyañjanakoti ettha bāhiratthasamāsaṃ dassento āha ‘‘itthinimittuppādanakammato cā’’tiādi. Tattha ‘‘itthi…pe… kammato cā’’ti iminā ubhayasarūpaṃ dasseti. Ubhato kammato pavattanti pāṭhaseso yojetabbo. Byañjananti nimittaṃ. Assāti janassa. Karotipi kāretipīti ettha karadhātuyā suddhakammakāritakammāni dassento āha ‘‘purisanimittenā’’tiādi. Tattha ‘‘vītikkama’’nti iminā suddhakammaṃ dasseti, ‘‘para’’nti iminā kāritakammaṃ dasseti. Samādapetvāti uyyojetvā. Tassa duvidhabhāvaṃ dassento āha ‘‘duvidho’’tiādi. Tattha itthibhāvena lakkhito ubhatobyañjanako itthiubhatobyañjanako. Esa nayo itaratthāpi.
তত্থাতি দুৰিধেসু উভতোব্যঞ্জনকেসু। ইত্থিনিমিত্তন্তি ইত্থিযা অঙ্গজাতং। এসেৰ নযো ‘‘পুরিসনিমিত্ত’’ন্তি এত্থাপি। পাকটং পটিচ্ছন্নন্তি সভাৰতো পাকটং পটিচ্ছন্নং। পুন পটিচ্ছন্নং পাকটন্তি রাগৰসেন পটিচ্ছন্নং পাকটং। পরং গণ্হাপেতীতি পরমেৰ গণ্হাপেতীতি অত্থো। ইদন্তি কারণং। এতেসন্তি দ্ৰিন্নং উভতোব্যঞ্জনকানং। কুরুন্দিযং পন ৰুত্তং, কিং ৰুত্তন্তি যোজনা। তত্থাতি উভতোব্যঞ্জনকে। ৰিচারণক্কমোতি ৰীমংসনানুক্কমো। ‘‘তত্থ ৰিচারক্কমো’’তিপি পাঠো। ৰিচারণক্কমো ধম্মসঙ্গহট্ঠকথায ৰেদিতব্বো, ইধ পন কিং ৰেদিতব্বন্তি আহ ‘‘ইদমিধ ৰেদিতব্ব’’ন্তি। তত্থ ইদন্তি নপব্বজ্জূপসম্পদকারণং। ইধাতি ইমিস্সং ৰিনযট্ঠকথাযং।
Tatthāti duvidhesu ubhatobyañjanakesu. Itthinimittanti itthiyā aṅgajātaṃ. Eseva nayo ‘‘purisanimitta’’nti etthāpi. Pākaṭaṃ paṭicchannanti sabhāvato pākaṭaṃ paṭicchannaṃ. Puna paṭicchannaṃ pākaṭanti rāgavasena paṭicchannaṃ pākaṭaṃ. Paraṃ gaṇhāpetīti parameva gaṇhāpetīti attho. Idanti kāraṇaṃ. Etesanti dvinnaṃ ubhatobyañjanakānaṃ. Kurundiyaṃ pana vuttaṃ, kiṃ vuttanti yojanā. Tatthāti ubhatobyañjanake. Vicāraṇakkamoti vīmaṃsanānukkamo. ‘‘Tattha vicārakkamo’’tipi pāṭho. Vicāraṇakkamo dhammasaṅgahaṭṭhakathāya veditabbo, idha pana kiṃ veditabbanti āha ‘‘idamidha veditabba’’nti. Tattha idanti napabbajjūpasampadakāraṇaṃ. Idhāti imissaṃ vinayaṭṭhakathāyaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৫৪. উভতোব্যঞ্জনকৰত্থু • 54. Ubhatobyañjanakavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / উভতোব্যঞ্জনকৰত্থুকথা • Ubhatobyañjanakavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / উভতোব্যঞ্জনকৰত্থুকথাৰণ্ণনা • Ubhatobyañjanakavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উভতোব্যঞ্জনকৰত্থুকথাৰণ্ণনা • Ubhatobyañjanakavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / উভতোব্যঞ্জনকৰত্থুকথাৰণ্ণনা • Ubhatobyañjanakavatthukathāvaṇṇanā
